ਵੈਨਕੂਵਰ ਪੁਲਿਸ ਵਲੋਂ ਇਕ ਲੰਮੇ ਅਪਰਾਧਿਕ ਰਿਕਾਰਡ ਵਾਲੇ ਵਿਅਕਤੀ ਨੂੰ ਕੀਤਾ ਗਿਆ ਗ੍ਰਿਫਤਾਰ

ਵੈਨਕੂਵਰ ਪੁਲਿਸ ਨੇ ਕਿਹਾ ਹੈ ਕਿ 50 ਤੋਂ ਵੱਧ ਅਪਰਾਧਿਕ ਦੋਸ਼ਾਂ ਵਾਲਾ ਇਕ ਵਿਅਕਤੀ ਦੁਬਾਰਾ ਹਿਰਾਸਤ ਵਿਚ ਹੈ, ਜਦੋਂ ਉਸ ’ਤੇ ਪੁਲਿਸ ਕਾਰ ਚੋਰੀ ਕਰਨ ਅਤੇ ਉਸਨੂੰ ਬੇਪਰਵਾਹੀ ਨਾਲ ਚਲਾਉਣ ਦਾ ਦੋਸ਼ ਲੱਗਾ ਹੈ। ਇਸ ਘਟਨਾ ਦੌਰਾਨ ਪਾਰਕ ਵਿਚ ਮੌਜੂਦ ਕਈ ਪਰਿਵਾਰਾਂ ਦੀ ਜਾਨ ਨੂੰ ਖ਼ਤਰਾ ਪੈਦਾ ਹੋਇਆ।

ਘਟਨਾ ਐਤਵਾਰ ਸਵੇਰੇ 10:45 ਵਜੇ ਦੇ ਕਰੀਬ ਈਸਟ ਵੈਨਕੂਵਰ ਵਿਚ ਵਾਪਰੀ, ਜਦੋਂ ਪੁਲਿਸ ਅਧਿਕਾਰੀਆਂ ਨੂੰ ਇਕ ਮੁਸੀਬਤਜ਼ਦਾ ਔਰਤ ਦੀ ਮਦਦ ਲਈ ਰੋਕਿਆ ਗਿਆ। ਜਦ ਪੁਲਿਸ ਉਸ ਦੀ ਸਹਾਇਤਾ ਕਰ ਰਹੀ ਸੀ, 41 ਸਾਲਾ ਦੋਸ਼ੀ ਨੇ ਖਾਲੀ ਖੜ੍ਹੀ ਪੁਲਿਸ ਕਾਰ ਚਲਾ ਲਈ ਅਤੇ ਟੈਂਪਲਟਨ ਪਾਰਕ ਵੱਲ ਰੁਖ ਕਰ ਲਿਆ, ਜਿੱਥੇ ਕਈ ਪਰਿਵਾਰ ਮੌਜੂਦ ਸਨ।

ਪੁਲਿਸ ਨੇ ਕਿਹਾ ਕਿ ਉਸਨੂੰ ਤਿੰਨ ਮਿੰਟਾਂ ਅੰਦਰ ਹੀ ਕਾਬੂ ਕਰ ਲਿਆ ਗਿਆ। ਉਸ ਦੀ ਗ੍ਰਿਫ਼ਤਾਰੀ ਵਿਚ ਪੁਲਿਸ ਕੁੱਤੇ ਦੀ ਸਹਾਇਤਾ ਲਈ ਗਈ ਅਤੇ ਬਾਅਦ ਵਿਚ ਉਸਨੂੰ ਜ਼ਖ਼ਮਾਂ ਦੇ ਇਲਾਜ ਲਈ ਹਸਪਤਾਲ ਭੇਜਿਆ ਗਿਆ।

ਪੁਲਿਸ ਨੇ ਦੱਸਿਆ ਕਿ ਚੋਰੀ, ਚੋਰੀਸ਼ੁਦਾ ਸੰਪਤੀ ਦੀ ਮਾਲਕੀ ਅਤੇ ਗੱਡੀ ਚਲਾਉਣ ਨਾਲ ਸੰਬੰਧਿਤ ਅਪਰਾਧਾਂ ਦੇ ਕਈ ਦੋਸ਼ਾਂ ਦੀ ਸਿਫ਼ਾਰਸ਼ ਕੀਤੀ ਜਾ ਰਹੀ ਹੈ।

ਸਰਜੰਟ ਸਟੀਵ ਐਡੀਸਨ, ਵੈਨਕੂਵਰ ਪੁਲਿਸ ਦੇ ਬੁਲਾਰੇ ਨੇ ਕਿਹਾ ਕਿ ਇਹ ਘਟਨਾ “ਬੇਹੱਦ ਬੇਪਰਵਾਹੀ ਭਰੀ ਅਤੇ ਖ਼ਤਰਨਾਕ ਸੀ,” ਜੋ ਕਿ “ਪਰਿਵਾਰਾਂ ਦੀ ਜਾਨ ਲੈ ਸਕਦੀ ਸੀ।”

ਇਹ ਘਟਨਾ ਬੀ.ਸੀ. ਵਿਚ ਵਾਰ-ਵਾਰ ਅਪਰਾਧ ਕਰਨ ਵਾਲੇ ਦੋਸ਼ੀਆਂ (ਰੀਪੀਟ ਆਫ਼ੈਂਡਰਜ਼) ਬਾਰੇ ਚਿੰਤਾਵਾਂ ਨੂੰ ਦੁਬਾਰਾ ਉਜਾਗਰ ਕਰਦੀ ਹੈ। ਸਰੀ, ਐਬਟਸਫ਼ੋਰਡ ਅਤੇ ਬਰਨਬੀ ਵਰਗੇ ਸ਼ਹਿਰਾਂ ਵਿਚ ਲੋਕਾਂ ਵੱਲੋਂ ਇਹ ਮੰਗ ਕੀਤੀ ਜਾ ਰਹੀ ਹੈ ਕਿ ਦੁਬਾਰਾ ਗ੍ਰਿਫ਼ਤਾਰ ਹੋਣ ਵਾਲਿਆਂ ਲਈ ਕਾਨੂੰਨ ਹੋਰ ਕੜੇ ਕੀਤੇ ਜਾਣ।