ਵੈਨਕੂਵਰ ਪੁਲਿਸ ਨੇ ਵਾਹਨ ਚੋਰੀ ਅਤੇ ਅੱਗਜ਼ਨੀ ਦੀ ਘਟਨਾ ਤੋਂ ਬਾਅਦ ਇੱਕ ਸ਼ੱਕੀ ਵਿਅਕਤੀ ਨੂੰ ਕੀਤਾ ਗ੍ਰਿਫਤਾਰ

ਵੈਨਕੂਵਰ ਪੁਲਿਸ ਨੇ ਵੀਰਵਾਰ ਨੂੰ ਇੱਕ ਮੋਟਰਸਾਈਕਲ ਚੋਰੀ ਹੋਣ ਅਤੇ ਇੱਕ ਟਰੱਕ ਨੂੰ ਅੱਗ ਲਾਉਣ ਦੀਆਂ ਲੜੀਵਾਰ ਰਿਪੋਰਟਸ 'ਤੇ ਕਾਰਵਾਈ ਕਰਦੇ ਹੋਏ ਇੱਕ ਸ਼ੱਕੀ ਨੂੰ ਗ੍ਰਿਫਤਾਰ ਕੀਤਾ। ਪੁਲਿਸ ਮੁਤਾਬਕ, ਇਹ ਸਾਰਾ ਘਟਨਾਕ੍ਰਮ ਦੁਪਹਿਰ 1:50 ਵਜੇ ਸ਼ੁਰੂ ਹੋਇਆ, ਜਦੋਂ ਮੁਲਜ਼ਮ ਨੇ ਮੇਨ ਸਟ੍ਰੀਟ ਅਤੇ ਇੰਡਸਟਰੀਅਲ ਐਵੇਨਿਊ ਦੇ ਨੇੜਿਓਂ ਇੱਕ ਮੋਟਰਸਾਈਕਲ ਚੋਰੀ ਕੀਤਾ।

ਇਸ ਤੋਂ ਕਰੀਬ ਇੱਕ ਘੰਟੇ ਬਾਅਦ ਉਸ ਨੇ ਚੋਰੀ ਦਾ ਮੋਟਰਸਾਈਕਲ ਫਰੇਜ਼ਰ ਸਟ੍ਰੀਟ ਅਤੇ ਈਸਟ 41st ਐਵੇਨਿਊ ਵਿਖੇ ਮਾਊਂਟੇਨਵਿਊ ਕਬਰੀਸਤਾਨ ਨੇੜੇ ਸੁੱਟ ਦਿੱਤਾ, ਜਿੱਥੇ ਉਸ ਨੇ ਕਬਰੀਸਤਾਨ ਵਿਚ ਖੜ੍ਹੇ ਇੱਕ ਵਰਕ ਟਰੱਕ ਵਿਚ ਵੜ ਕੇ ਪਹਿਲਾਂ ਉਸ ਨੂੰ ਇੱਕ ਦਰੱਖਤ ਵਿਚ ਮਾਰਿਆ ਅਤੇ ਫਿਰ ਟਰੱਕ ਦੇ ਕੈਬਿਨ ਨੂੰ ਅੱਗ ਲਗਾ ਦਿੱਤੀ।

ਜਦੋਂ ਪੁਲਿਸ ਨੇ ਮੇਨ ਸਟ੍ਰੀਟ ਅਤੇ ਈਸਟ 41st ਐਵੇਨਿਊ ਦੇ ਨੇੜੇ ਸ਼ੱਕੀ ਦਾ ਪਿੱਛਾ ਕੀਤਾ ਤਾਂ 41 ਸਾਲਾ ਮੁਲਜ਼ਮ ਟ੍ਰੈਫਿਕ ਵਿਚ ਦੌੜ ਪਿਆ, ਇਸ ਦੌਰਾਨ ਉਹ ਇੱਕ ਕਾਰ ਨਾਲ ਟਕਰਾ ਗਿਆ ਅਤੇ ਪੁਲਿਸ ਵਲੋਂ ਉਸ ਨੂੰ ਹਿਰਾਸਤ ਵਿਚ ਲੈਣ ਮਗਰੋਂ ਤੁਰੰਤ ਹਸਪਤਾਲ ਲਿਜਾਇਆ ਗਿਆ,ਜਿੱਥੇ ਉਸ ਦੀ ਹਾਲਤ ਖ਼ਤਰੇ ਤੋਂ ਬਾਹਰ ਦੱਸੀ ਜਾ ਰਹੀ ਹੈ। ਫਿਲਹਾਲ ਸ਼ੱਕੀ ਦਾ ਨਾਮ ਜਨਤਕ ਨਹੀਂ ਕੀਤਾ ਗਿਆ, ਵੈਨਕੂਵਰ ਪੁਲਿਸ ਦਾ ਕਹਿਣਾ ਸੀ ਕਿ ਅਜੇ ਤੱਕ ਦੋਸ਼ ਤੈਅ ਨਹੀਂ ਕੀਤੇ ਗਏ ਹਨ।