ਬ੍ਰੈਂਪਟਨ 'ਚ ਟਾਇਰ ਬਿਜ਼ਨੈੱਸ ‘ਤੇ ਗੋਲੀਆਂ ਚਲਾਉਣ ਦੇ ਮਾਮਲੇ ‘ਚ ਬੀਸੀ ਦਾ ਪੰਜਾਬੀ ਨੌਜਵਾਨ ਗ੍ਰਿਫ਼ਤਾਰ

ਬ੍ਰੈਂਪਟਨ ਦੇ ਇੱਕ ਟਾਇਰ ਬਿਜ਼ਨੈੱਸ ‘ਤੇ ਸ਼ਨੀਵਾਰ ਨੂੰ ਵਾਪਰੀ ਗੋਲੀਬਾਰੀ ਦੀ ਘਟਨਾ ਦੇ ਸਬੰਧ ਵਿਚ ਪੁਲਿਸ ਨੇ ਬ੍ਰਿਟਿਸ਼ ਕੋਲੰਬੀਆ ਦੇ ਐਬਸਫੋਰਡ ਦੇ 23 ਸਾਲਾ ਨੌਜਵਾਨ ਨੂੰ ਗ੍ਰਿਫ਼ਤਾਰ ਕੀਤਾ ਹੈ।

ਨੌਜਵਾਨ ਦੀ ਪਛਾਣ ਤਨਮਨਜੋਤ ਗਿੱਲ ਵਜੋਂ ਹੋਈ ਹੈ। ਪੁਲਿਸ ਮੁਤਾਬਕ ਸ਼ਨੀਵਾਰ ਤੜਕੇ ਲਗਭਗ 3.37 ਵਜੇ ਬ੍ਰੈਂਪਟਨ ਦੇ ਕਲਾਰਕ ਬੁਲੇਵਾਰਡ ਅਤੇ ਰਦਰਫ਼ੋਰਡ ਸਾਊਥ ਇਲਾਕੇ ਵਿੱਚ ਇੱਕ ਟਾਇਰ ਬਿਜ਼ਨੈੱਸ ‘ਤੇ ਗੋਲੀਆਂ ਚਲਾਈਆਂ ਗਈਆਂ ਸਨ।

ਇਸ ਮਾਮਲੇ ਵਿੱਚ ਦੂਸਰਾ ਸ਼ੱਕੀ ਅਜੇ ਵੀ ਫ਼ਰਾਰ ਹੈ। ਪੁਲਿਸ ਨੇ ਕਿਹਾ ਕਿ ਰਿਪੋਰਟ ਮਿਲਣ 'ਤੇ ਅਧਿਕਾਰੀ ਤੁਰੰਤ ਘਟਨਾ ਸਥਾਨ 'ਤੇ ਪਹੁੰਚੇ ਜਿੱਥੇ ਇੱਕ ਸ਼ੱਕੀ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ। ਗਿੱਲ 'ਤੇ ਲਾਪਰਵਾਹੀ ਨਾਲ ਹਥਿਆਰ ਚਲਾਉਣ ਅਤੇ ਅਪਰਾਧ ਨਾਲ ਪ੍ਰਾਪਤ ਕੀਤੀ ਜਾਇਦਾਦ 'ਤੇ ਕਬਜ਼ਾ ਕਰਨ ਸਮੇਤ ਅੱਧੀ ਦਰਜਨ ਦੋਸ਼ ਲਗਾਏ ਗਏ ਹਨ।

ਪੁਲਿਸ ਨੁੰ ਉਸ ਕੋਲੋਂ 2 ਪਿਸਤੌਲ, ਇੱਕ ਭਰੀ ਹੋਈ ਮੈਗਜ਼ੀਨ ਅਤੇ ਗੋਲਾ-ਬਾਰੂਦ ਪ੍ਰਾਪਤ ਹੋਏ ਹਨ। ਪੁਲਿਸ ਅਨੁਸਾਰ ਦੂਜਾ ਫਰਾਰ ਸ਼ੱਕੀ ਇੱਕ ਸਾਊਥ ਏਸ਼ੀਅਨ ਵਿਅਕਤੀ ਹੈ, ਜਿਸ ਦਾ ਮੱਧਰਾ ਕੱਦ, ਕਾਲੇ ਵਾਲ ਅਤੇ ਪੂਰੀ ਦਾੜ੍ਹੀ ਹੈ। ਘਟਨਾ ਸਮੇ ਉਸਨੇ ਗ੍ਰੇ ਰੰਗ ਦੀ ਸਵੈਟ ਸ਼ਰਟ ਪਹਿਨੀ ਹੋਈ ਸੀ।