ਐਲਬਰਟਾ 'ਚ ਦੋ ਵਿਅਕਤੀਆਂ ਦੇ ਕਤਲ ਦੇ ਦੋਸ਼ ਵਿਚ ਇਕ ਵਿਅਕਤੀ ਗ੍ਰਿਫਤਾਰ

ਗ੍ਰੈਂਡ ਪ੍ਰੈਰੀ ਕਾਉਂਟੀ ਵਿਚ ਸ਼ਨੀਵਾਰ ਤੜਕੇ ਗੋਲੀਆਂ ਚੱਲਣ ਦੇ ਸਬੰਧ ਵਿੱਚ ਆਰ.ਸੀ.ਐਮ.ਪੀ.ਨੇ 42 ਸਾਲਾ ਕਰਟਿਸ ਫਿਲਿਪ ਹੈਲਡੇ 'ਤੇ ਸੈਕਿੰਡ ਡਿਗਰੀ ਮਰਡਰ ਦੇ ਦੋ ਦੋਸ਼ ਲਗਾਏ ਹਨ। ਪੁਲਿਸ ਨੇ ਦੱਸਿਆ ਕਿ ਅਧਿਕਾਰੀਆਂ ਨੂੰ ਰੇਂਜ ਰੋਡ 35 ਅਤੇ ਰੇਂਜ ਰੋਡ 730 ਦੇ ਖੇਤਰ ਵਿੱਚ ਰੂਰਲ ਰੋਡ 'ਤੇ ਗੋਲੀ ਚੱਲਣ ਦੀਆਂ ਰਿਪੋਰਟਾਂ ਮਿਲੀਆਂ ਸਨ।

ਮੌਕੇ 'ਤੇ ਪਹੁੰਚੀ ਐਮਰਜੈਂਸੀ ਟੀਮ ਨੂੰ ਇੱਥੇ ਇਕ ਵਿਅਕਤੀ ਅਤੇ ਔਰਤ ਮ੍ਰਿਤਕ ਮਿਲੇ,ਜਿਨ੍ਹਾਂ ਦੀ ਪਛਾਣ 54 ਸਾਲਾ ਡੇਵਿਡ ਲਾਗਾਸ ਅਤੇ 44 ਸਾਲਾ ਮਿਸ਼ੇਲ ਲਾਗਾਸ ਵਜੋਂ ਹੋਈ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਇਹ ਕੋਈ ਅਚਾਨਕ ਹੋਇਆ ਹਮਲਾ ਨਹੀਂ ਸੀ।ਅਜਿਹਾ ਲੱਗਦਾ ਹੈ ਕਿ ਹਮਲਾਵਰ ਅਤੇ ਪੀੜਤ ਇੱਕ-ਦੂਜੇ ਨੂੰ ਪਹਿਲਾਂ ਤੋਂ ਜਾਣਦੇ ਸਨ। ਹਮਲੇ ਤੋਂ ਬਾਅਦ ਦੋਸ਼ੀ ਫ਼ਰਾਰ ਹੋ ਗਿਆ ਸੀ।

ਪੁਲਿਸ ਨੇ 'ਪਬਲਿਕ ਅਲਰਟ' ਜਾਰੀ ਕਰਕੇ ਲੋਕਾਂ ਨੂੰ ਸਾਵਧਾਨ ਕੀਤਾ ਸੀ ਕਿਉਂਕਿ ਦੋਸ਼ੀ ਹਥਿਆਰਬੰਦ ਅਤੇ ਖ਼ਤਰਨਾਕ ਸੀ। ਦੁਪਹਿਰ 1 ਵਜੇ ਦੇ ਕਰੀਬ,ਪੁਲਿਸ ਨੇ ਮੈਕਲੇਨਨ ਦੇ ਨੇੜੇ ਉਸ ਦੀ ਗੱਡੀ ਦਾ ਪਿੱਛਾ ਕਰਕੇ ਉਸ ਨੂੰ ਹਿਰਾਸਤ ਵਿੱਚ ਲੈ ਲਿਆ। ਹੈਲਡੇ ਨੂੰ 8 ਜਨਵਰੀ, 2026 ਨੂੰ ਗ੍ਰੈਂਡ ਪ੍ਰੈਰੀ ਦੀ ਅਦਾਲਤ ਵਿਚ ਪੇਸ਼ ਕੀਤਾ ਜਾਵੇਗਾ।