ਟੋਰਾਂਟੋ ਪੀਅਰਸਨ ਏਅਰਪੋਰਟ 'ਤੇ ਪੁਲਿਸ ਗੋਲੀਬਾਰੀ 'ਚ ਜ਼ਖਮੀ ਵਿਅਕਤੀ ਨੇ ਤੋੜਿਆ ਦਮ

ਟੋਰਾਂਟੋ ਪੀਅਰਸਨ ਏਅਰਪੋਰਟ 'ਤੇ ਅੱਜ ਸਵੇਰ ਇੱਕ ਘਟਨਾ ਦੇ ਸਬੰਧ ਵਿਚ ਪੁਲਿਸ ਨੇ ਇੱਕ ਨੌਜਵਾਨ ਨੂੰ ਗੋਲੀ ਮਾਰ ਦਿੱਤੀ, ਜਿਸ ਦੀ ਬਾਅਦ ਵਿਚ ਹਸਪਤਾਲ ਵਿਚ ਮੌਤ ਹੋ ਗਈ। ਹਥਿਆਰਬੰਦ ਪੁਲਿਸ ਦੀ ਭਾਰੀ ਮੌਜੂਦਗੀ ਨਾਲ ਯਾਤਰੀਆਂ ਵਿਚ ਹਫੜਾ-ਦਫੜੀ ਵੀ ਦੇਖੀ ਗਈ। ਓਨਟਾਰੀਓ ਪੁਲਿਸ ਦੀ ਵਿਸ਼ੇਸ਼ ਜਾਂਚ ਯੂਨਿਟ ਮੁਤਾਬਕ, ਨੌਜਵਾਨ 30 ਕੁ ਸਾਲ ਦਾ ਸੀ।

ਦੱਸਿਆ ਜਾਂਦਾ ਹੈ ਕਿ ਨੌਜਵਾਨ ਨੇ ਅਧਿਕਾਰੀ ਵੱਲ ਗੰਨ ਕੱਢ ਲਈ ਸੀ, ਇਸ ਲਈ ਅਧਿਕਾਰੀ ਕੋਲ ਗੋਲੀ ਚਲਾਉਣ ਤੋਂ ਇਲਾਵਾ ਹੋਰ ਕੋਈ ਵਿਕਲਪ ਨਹੀਂ ਸੀ। ਇਸ ਮਾਮਲੇ ਦੀ ਜਾਂਚ ਓਨਟਾਰੀਓ ਦੀ ਪੁਲਿਸ ਨਿਗਰਾਨ ਏਜੰਸੀ ਕਰ ਰਹੀ ਹੈ।

ਨਿਊਜ਼ ਰਿਲੀਜ਼ ਵਿਚ ਸਪੈਸ਼ਲ ਇਨਵੈਸਟੀਗੇਸ਼ਨ ਯੂਨਿਟ ਨੇ ਕਿਹਾ ਕਿ ਮੁੱਢਲੀ ਜਾਣਕਾਰੀ ਤੋਂ ਪਤਾ ਲੱਗਾ ਹੈ ਕਿ ਟਰਮੀਨਲ 1 ਦੇ ਡਪਾਚਸ ਖੇਤਰ ਵਿਚ ਇੱਕ ਐੱਸ. ਯੂ. ਵੀ. ਵਿਚ ਇੱਕ ਵਿਅਕਤੀ ਦੇ ਸ਼ੱਕੀ ਵਿਵਹਾਰ ਦੀਆਂ ਰਿਪੋਰਟਾਂ 'ਤੇ ਪੀਲ ਪੁਲਿਸ ਸਵੇਰੇ 7 ਵਜੇ ਦੇ ਕਰੀਬ ਹਵਾਈ ਅੱਡੇ 'ਤੇ ਪਹੁੰਚੀ ਸੀ, ਜਦੋਂ ਵਿਅਕਤੀ ਨੇ ਗੰਨ ਕੱਢ ਲਈ ਅਤੇ ਇਸ ਦੇ ਜਵਾਬ ਵਿਚ ਤਿੰਨ ਅਧਿਕਾਰੀਆਂ ਨੇ ਗੋਲੀ ਚਲਾਈ। ਪੁਲਿਸ ਵਾਚਡੌਗ ਅਨੁਸਾਰ, ਛੇ ਜਾਂਚਕਰਤਾ ਅਤੇ ਤਿੰਨ ਫੋਰੈਂਸਿਕ ਜਾਂਚਕਰਤਾ ਨੂੰ ਇਸ ਮਾਮਲੇ ਦੀ ਜਾਂਚ ਸੌਂਪੀ ਗਈ ਹੈ।