ਮਾਰਕ ਕਾਰਨੀ ਮੰਤਰੀ ਮੰਡਲ ਦੀ ਘੋਸ਼ਣਾ, ਕਮਲ ਖਹਿਰਾ ਬਣੀ ਕੈਨੇਡਾ ਦੀ ਨਵੀਂ ਹੈਲਥ ਮਿਨਿਸਟਰ

ਕੈਨੇਡਾ ਦੇ ਨਵ-ਨਿਯੁਕਤ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦੇ ਮੰਤਰੀ ਮੰਡਲ ਵਿਚ ਵਿੱਤ ਮੰਤਰੀ ਦੀ ਜ਼ਿੰਮੇਵਾਰੀ ਫ੍ਰਾਂਸਵਾ-ਫਿਲਿਪ ਸ਼ੈਂਪੇਨ ਨੂੰ ਸੌਂਪ ਦਿੱਤੀ ਗਈ ਹੈ ਅਤੇ ਡੋਮਿਨਿਕ ਲੇਬਲੈਂਕ ਤੋਂ ਇਹ ਮੰਤਰਾਲਾ ਲੈ ਕੇ ਉਨ੍ਹਾਂ ਨੂੰ ਅੰਤਰਰਾਸ਼ਟਰੀ ਵਪਾਰ ਮੰਤਰੀ ਬਣਾ ਦਿੱਤਾ ਗਿਆ ਹੈ।

ਓਧਰ ਕ੍ਰਿਸਟੀਆ ਫ੍ਰੀਲੈਂਡ ਦੀ ਕੈਬਨਿਟ ਵਿਚ ਵਾਪਸੀ ਹੋਈ ਹੈ, ਉਨ੍ਹਾਂ ਨੂੰ ਟਰਾਂਸਪੋਰਟ ਅਤੇ ਅੰਦਰੂਨੀ ਵਪਾਰ ਮੰਤਰੀ ਬਣਾਇਆ ਗਿਆ ਹੈ। ਅਨੀਤਾ ਆਨੰਦ ਨੂੰ ਇਨੋਵੇਸ਼ਨ, ਸਾਇੰਸ ਅਤੇ ਉਦਯੋਗ ਮਿਨਿਸਟਰ ਦੀ ਜ਼ਿੰਮੇਵਾਰੀ ਦਿੱਤੀ ਗਈ ਹੈ। ਉਥੇ ਹੀ, ਪੰਜਾਬੀ ਮੂਲ ਦੀ ਕਮਲ ਖਹਿਰਾ ਦੀ ਤਰੱਕੀ ਹੋਈ ਹੈ, ਉਹ ਹੁਣ ਕੈਨੇਡਾ ਦੀ ਨਵੇਂ ਸਿਹਤ ਮੰਤਰੀ ਹੋਣਗੇ।

ਪਹਿਲਾਂ ਹੈਲਥ ਮੰਤਰਾਲਾ ਮਾਰਕ ਹੌਲੈਂਡ ਕੋਲ ਸੀ, ਜਿਨ੍ਹਾਂ ਨੇ ਬੀਤੇ ਕੱਲ੍ਹ ਅਗਲੀਆਂ ਚੋਣਾਂ ਨਾ ਲੜਨ ਦੀ ਘੋਸ਼ਣਾ ਕੀਤੀ ਸੀ। ਉਥੇ ਹੀ, ਕਾਰਬਨ ਟੈਕਸ ਸਮਰਥਕ ਸਟੀਵਨ ਗਿਲਬੌਲਟ ਦਾ ਪੋਰਟਫੋਲੀਓ ਵਾਤਾਵਰਣ ਮਿਨਿਸਟਰ ਤੋਂ ਬਦਲ ਕੇ ਕਲਚਰ ਅਤੇ ਪਾਰਕਸ ਕੈਨੇਡਾ ਕਰ ਦਿੱਤਾ ਗਿਆ ਹੈ। ਮਾਰਕ ਮਿਲਰ ਦੀ ਥਾਂ ਹੁਣ ਕੈਨੇਡਾ ਦੀ ਇਮੀਗ੍ਰੇਸ਼ਨ ਮਿਨਿਸਟਰ ਰੇਚਲ ਬੇਨਦਾਯਨ ਹੋਵੇਗੀ। ਮੇਲਾਨੀ ਜੋਲੀ ਦਾ ਵਿਦੇਸ਼ੀ ਮਾਮਲੇ ਮਿਨਿਸਟਰ ਵਜੋਂ ਅਹੁਦਾ ਬਰਕਰਾਰ ਰੱਖਿਆ ਗਿਆ ਹੈ।