ਸਰੀ ਦੀ ਮੇਅਰ ਨੇ ਪੁਲਿਸਿੰਗ ਨੂੰ ਲੈ ਕੇ ਅਦਾਲਤੀ ਚੁਣੌਤੀ ਦਾ ਕੀਤਾ ਐਲਾਨ

ਬ੍ਰਿਟਿਸ਼ ਕੋਲੰਬੀਆ ਸਰਕਾਰ ਨੇ ਸਰੀ ਪੁਲਿਸ ਬੋਰਡ ਨੂੰ ਪੂਰੀ ਤਰ੍ਹਾਂ ਸਸਪੈਂਡ ਕਰ ਦਿੱਤਾ ਸੀ ਅਤੇ ਇਸ ਦੀ ਜਗ੍ਹਾ ਇੱਕ ਪ੍ਰਬੰਧਕ ਦੀ ਨਿਯੁਕਤੀ ਕਰ ਦਿੱਤੀ ਗਈ ਸੀ। ਜਿਸ ਤੋਂ ਬਾਅਦ ਹੁਣ ਸਰੀ ਦੀ ਮੇਅਰ ਬਰੈਂਡਾ ਲੌਕ ਨੇ ਸਿਟੀ ਵੱਲੋਂ ਅਦਾਲਤੀ ਚੁਣੌਤੀ ਦੇਣ ਦਾ ਐਲਾਨ ਕੀਤਾ ਹੈ।ਲੌਕ ਦਾ ਕਹਿਣਾ ਹੈ ਕਿ ਸਿਟੀ ਕਿਸੇ ਵੀ ਤਬਦੀਲੀ ਨੂੰ ਮਨਜ਼ੂਰੀ ਨਹੀਂ ਦੇਵੇਗੀ।

ਬਰੈਂਡਾ ਲੌਕ ਦਾ ਕਹਿਣਾ ਹੈ ਕਿ ਸੋਮਵਾਰ ਨੂੰ ਇੱਕ ਸੋਧੀ ਹੋਈ ਅਦਾਲਤ ਦੀ ਪਟੀਸ਼ਨ ਦਾਇਰ ਕੀਤੀ ਜਾਵੇਗੀ ਜਿਸ ਵਿੱਚ ਸਿਟੀ ਨੇ ਪਹਿਲਾਂ ਹੀ ਆਰਸੀਐੱਮਪੀ ਦੇ ਨਾਲ ਅੱਗੇ ਵੱਧਣ ਲਈ ਸੂਬੇ ਦੇ ਨਿਰਦੇਸ਼ਾਂ ਦੀ ਨਿਆਂਇਕ ਸਮੀਖਿਆ ਦੀ ਬੇਨਤੀ ਕੀਤੀ ਸੀ।

ਲੌਕ ਨੇ ਇੱਕ ਈਮੇਲ ਵੀ ਜਾਰੀ ਕੀਤੀ ਜੋ ਉਸਨੇ ਸਾਲਿਸਟਰ ਜਨਰਲ ਮਾਈਕ ਫਾਰਨਵਰਥ ਨੂੰ ਭੇਜੀ ਸੀ ਜਿਸ ਵਿੱਚ ਉਸਨੇ ਇੱਕ ਪ੍ਰਸ਼ਾਸਕ ਦੀ ਨਿਯੁਕਤੀ ਨੂੰ ਇਤਰਾਜ਼ਯੋਗ ਦੱਸਿਆ ਸੀ ਅਤੇ ਇਹ ਕਿਹਾ ਕਿ ਇਹ ਸਿਟੀ ਨੂੰ ਬਿਨਾਂ ਕਿਸੇ ਸਲਾਹ ਜਾਂ ਨੋਟਿਸ ਦੇ ਕੀਤੀ ਗਈ ਸੀ।ਲੌਕ ਦਾ ਕਹਿਣਾ ਹੈ ਕਿ ਇਹ ਸਰੀ ਪੁਲਿਸ ਸਰਵਿਸ ਨਹੀਂ ਹੈ ਇਹ ਇੱਕ ਐੱਨਡੀਪੀ ਪੁਲਿਸ ਸਰਵਿਸ ਹੈ। ਜੋ ਸੌਲੀਸਿਟਰ ਜਨਰਲ ਨੂੰ ਸਿੱਧੇ ਤੌਰ 'ਤੇ ਰਿਪੋਰਟ ਕਰਦੀ ਹੈ।

ਜਨਤਕ ਸੁਰੱਖਿਆ ਮੰਤਰੀ ਮਾਈਕ ਫਾਰਨਵਰਥ ਨੇ ਇਸ ਵਿਵਾਦ ਵਿਚਕਾਰ ਐਬਸਫੋਰਡ ਦੇ ਸਾਬਕਾ ਪੁਲਿਸ ਚੀਫ ਮਾਈਕ ਸੇਰ ਨੂੰ ਸਰੀ ਪੁਲਿਸ ਸਰਵਿਸ ਸਥਾਪਤਿ ਕਰਨ ਵਿੱਚ ਸਹਾਇਤਾ ਕਰਨ ਲਈ ਪੁਲਿਸ ਬੋਰਡ ਦਾ ਪ੍ਰਬੰਧਕ ਨਿਯੁਕਤ ਕੀਤਾ ਹੈ।