ਮੈਕਗਿਲ ਦੇ ਪ੍ਰੋਫੈਸਰ ਕਲਾਸਾਂ ਸ਼ੁਰੂ ਹੁੰਦੇ ਹੀ ਅਣਮਿੱਥੇ ਸਮੇਂ ਲਈ ਹੜਤਾਲ ’ਤੇ

ਮੈਕਗਿਲ ਯੂਨੀਵਰਸਿਟੀ ਦੇ ਫੁੱਲ-ਟਾਈਮ ਕਾਨੂੰਨ ਦੇ ਪ੍ਰੋਫੈਸਰ-ਕਲਾਸਾਂ ਦੇ ਪਹਿਲੇ ਹਫ਼ਤੇ ਹੀ ਅਣਮਿੱਥੇ ਸਮੇਂ ਲਈ ਹੜਤਾਲ ’ਤੇ ਚਲੇ ਗਏ ਹਨ। ਯੂਨੀਅਨ ਦੀ ਉੱਪ ਪ੍ਰਧਾਨ ਅਤੇ ਕਾਨੂੰਨ ਦੇ ਪ੍ਰੋਫੈਸਰ ਕਰਸਟਨ ਐਂਕਰ ਨੇ ਕਿਹਾ ਕਿ ਪ੍ਰੋਫੈਸਰ ਦੀਆਂ ਮੁੱਖ ਮੰਗਾਂ ਫੈਕਲਟੀ ਗਵਰਨੈਂਸ ਤੇ ਤਨਖਾਹਾਂ ਨਾਲ ਸਬੰਧਤ ਹਨ।

ਉਨ੍ਹਾਂ ਕਿਹਾ ਕਿ ਤਨਖਾਹਾਂ ਦੇ ਮੁੱਦੇ ’ਤੇ ਯੂਨੀਅਨ ਵਲੋਂ ਵਿਚੋਲਗੀ ’ਤੇ ਸਹਿਮਤੀ ਜਾਣ ਦੇ ਬਾਵਜੂਦ ਯੂਨੀਵਰਸਿਟੀ ਉਨ੍ਹਾਂ ਨਾਲ ਬੈਠਕ ਕਰਨ ਤੋਂ ਨਾਂਹ ਨੁਕਰ ਕਰ ਰਹੀ ਹੈ। ਐਂਕਰ ਨੇ ਕਿਹਾ ਕਿ ਮੈਕਗਿਲ ਦੀ ਕਾਨੂੰਨ ਪ੍ਰੋਫੈਸਰ ਐਸੋਸੀਏਸ਼ਨ ਨੂੰ 2022 ਵਿਚ ਸੂਬੇ ਦੀ ਲੇਬਰ ਟ੍ਰਿਬਿਊਨਲ ਨੇ ਮਾਨਤਾ ਦਿੱਤੀ ਸੀ, ਜਿਸ ਦੀ ਹੋਂਦ ਨੂੰ ਯੂਨੀਰਸਿਟੀ ਚੁਣੌਤੀ ਦੇ ਰਹੀ ਹੈ। ਇਸ ਲਈ ਯੂਨੀਅਨ ਯੂਨੀਵਰਸਿਟੀ ਨੂੰ ਇਸ ਕਦਮ ਤੋਂ ਰੋਕਣ ਤੇ ਗੱਲਬਾਤ ਜ਼ਰੀਏ ਇੱਕ ਸਮੂਹਿਕ ਸਮਝੌਤਾ ਹਾਸਲ ਕਰਨ ਦਾ ਯਤਨ ਕਰ ਰਹੀ ਹੈ।

ਗੌਰਤਲਬ ਹੈ ਕਿ ਇਸ ਸਾਲ ਦੇ ਸ਼ੁਰੂ ਵਿਚ ਵੀ ਯੂਨੀਅਨ ਦੇ ਮੈਂਬਰ ਹੜਤਾਲ ’ਤੇ ਗਏ ਸਨ ਪਰ ਐਂਕਰ ਦਾ ਕਹਿਣਾ ਹੈ ਕਿ ਇਹ ਪਹਿਲੀ ਹੜਤਾਲ ਹੈ ਜਿਸ ਨਾਲ ਲੰਮੇ ਸਮੇਂ ਤੱਕ ਕਲਾਸਾਂ ਪ੍ਰਭਾਵਿਤ ਹੋਣ ਦੀ ਸੰਭਾਵਨਾ ਹੈ। ਉਨ੍ਹਾਂ ਦੱਸਿਆ ਕਿ ਪਹਿਲੇ ਸਾਲ ਦੇ ਕਾਨੂੰਨ ਦੇ ਵਿਦਿਆਰਥੀਆਂ ਦਾ ਸੁਆਗਤ ਸੈਸ਼ਨ ਨਾਲ ਸ਼ੈਡਿਊਲ ਅੱਜ ਤੋਂ ਸ਼ੁਰੂ ਹੋਣਾ ਸੀ ਅਤੇ ਕਲਾਸਾਂ ਬੁੱਧਵਾਰ ਤੋਂ ਸ਼ੁਰੂ ਹੋਣੀਆਂ ਸਨ।