ਓਨਟਾਰੀਓ ਵਿਚ ਖਸਰੇ ਦੇ ਮਾਮਲਿਆਂ 'ਚ ਹੋ ਰਿਹਾ ਲਗਾਤਾਰ ਵਾਧਾ

ਕੈਨੇਡਾ ਦੇ ਸਭ ਤੋਂ ਵੱਧ ਆਬਾਦੀ ਵਾਲੇ ਸੂਬੇ ਓਨਟਾਰੀਓ ਵਿਚ ਖਸਰੇ ਦੇ ਮਾਮਲੇ ਲਗਾਤਾਰ ਵੱਧ ਰਹੇ ਹਨ, ਓਨਟਾਰੀਓ ਦੇ ਪਬਲਿਕ ਹੈਲਥ ਡਿਪਾਰਮੈਂਟ ਨੇ ਵੀਰਵਾਰ ਨੂੰ ਰਿਪੋਰਟ ਦਿੱਤੀ ਕਿ ਪਿਛਲੇ ਹਫ਼ਤੇ ਇਸ ਦੇ 100 ਤੋਂ ਵੱਧ ਨਵੇਂ ਮਾਮਲੇ ਸਾਹਮਣੇ ਆਏ ਹਨ। ਇਸ ਨਾਲ 2025 ਦੀ ਸ਼ੁਰੂਆਤ ਤੋਂ ਲੈ ਕੇ ਇਸ ਬੁੱਧਵਾਰ ਤੱਕ ਓਨਟਾਰੀਓ ਵਿਚ ਖਸਰੇ ਦੇ ਕੁੱਲ ਮਾਮਲੇ 440 ਹੋ ਗਏ ਹਨ, ਜਿਨ੍ਹਾਂ ਵਿਚ 357 ਪੁਸ਼ਟੀ ਹੋਈ ਹੈ ਅਤੇ 83 ਸੰਭਾਵੀ ਹਨ।

ਕੈਨੇਡਾ ਵਿਚ ਖਸਰੇ ਦਾ ਫੈਲਣਾ ਇੱਕ ਵਧਦੀ ਹੋਈ ਚਿੰਤਾ ਹੈ, ਇਹ 1998 ਦੀ ਸਥਿਤੀ ਦੇ ਬਿਲਕੁਲ ਉਲਟ ਹੈ, ਜਦੋਂ ਇਸ ਬਿਮਾਰੀ ਨੂੰ ਖਤਮ ਮੰਨਿਆ ਗਿਆ ਸੀ। ਓਨਟਾਰੀਓ ਤੋਂ ਇਲਾਵਾ ਨਿਊ ਬਰੰਸਵਿਕ, ਕਿਊਬੈਕ ਅਤੇ ਐਲਬਰਟਾ ਵਿਚ ਵੀ ਹਾਲ ਹੀ ਵਿਚ ਮਾਮਲੇ ਸਾਹਮਣੇ ਆਏ ਹਨ। ਉਥੇ ਹੀ, ਅਮਰੀਕਾ ਦੇ ਨਿਊ ਮੈਕਸੀਕੋ ਅਤੇ ਟੈਕਸਾਸ ਦੇ ਪੇਂਡੂ ਇਲਾਕਿਆਂ ਵਿਚ ਵੀ ਇਸ ਦਾ ਪ੍ਰਕੋਪ ਦੇਖਣ ਨੂੰ ਮਿਲਿਆ ਹੈ।

ਕੈਨੇਡਾ ਦੀ ਮੁੱਖ ਜਨ ਸਿਹਤ ਅਧਿਕਾਰੀ ਥੈਰੇਸਾ ਟੈਮ ਨੇ ਕਿਹਾ ਕਿ ਕੈਨੇਡਾ ਵਿਚ ਰਿਪੋਰਟ ਕੀਤੇ ਗਏ ਖਸਰੇ ਦੇ ਜ਼ਿਆਦਾਤਰ ਮਾਮਲੇ ਬਿਨਾਂ ਟੀਕਾਕਰਨ ਵਾਲੇ ਲੋਕਾਂ ਵਿਚ ਹਨ, ਇਨ੍ਹਾਂ ਵਿਚ ਬਹੁਤ ਸਾਰੇ ਬੱਚੇ ਅਤੇ ਨਵਜੰਮੇ ਬੱਚੇ ਹਨ।