16.89C Vancouver 16.89C VancouverApr 3, 2020 5:21 PM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਮੁਤਾਬਕ ਉੱਤਰੀ ਕਿਊਬੈਕ ਵਿੱਚ ਕੋਵਿਡ-19 ਨਾਲ ਨਜਿੱਠਣ ਲਈ ਕੀਤੇ ਜਾ ਰਹੇ ਯਤਨਾਂ ਵਿੱਚ ਸਹਿਯੋਗ ਪ੍ਰਦਾਨ ਕਰਨ ਲਈ ਕਨੇਡੀਅਨ ਫੋਰਸਿਜ਼ ਭੇਜੀਆਂ ਜਾ ਰਹੀਆਂ ਹਨ।
ਉਨ੍ਹਾਂ ਕਿਹਾ ਕਿ ਫੈਡਰਲ ਸਰਕਾਰ ਵੱਲੋਂ ਇਹ ਕਦਮ ਕਿਊਬੈਕ ਸਰਕਾਰ ਦੀ ਦਰਖਾਸਤ ਉੱਤੇ ਚੁੱਕਿਆ ਜਾ ਰਿਹਾ ਹੈ।
ਆਟਵਾ ਵਿੱਚ ਆਪਣੇ ਰੋਜ਼ਾਨਾ ਸੰਬੋਧਨ ਦੌਰਾਨ ਟਰੂਡੋ ਨੇ ਇਹ ਗੱਲ ਵੀ ਸਾਂਝੀ ਕੀਤੀ ਕਿ ਕੈਨੇਡਾ ਦੇ ਵੱਖ ਵੱਖ ਹਿੱਸਿਆਂ ਵਿੱਚ ਮੈਡੀਕਲ ਸਪਲਾਈ ਪਹੁੰਚਾਉਣ ਲਈ ਫੈਡਰਲ ਸਰਕਾਰ ਨੇ ਐਮਾਜ਼ਾਨ ਦੇ ਨਾਲ ਐਗਰੀਮੈਂਟ ਕੀਤਾ ਹੈ।
ਪ੍ਰਧਾਨ ਮੰਤਰੀ ਨੇ ਇਹ ਐਲਾਨ ਵੀ ਕੀਤਾ ਕਿ ਮੁਲਕ ਭਰ ਵਿੱਚ ਖਾਣ ਪੀਣ ਦੀਆਂ ਚੀਜ਼ਾਂ ਲੋੜਵੰਦ ਭਾਈਚਾਰਿਆਂ ਤੱਕ ਪਹੁੰਚਾਉਣ ਲਈ $100 ਮਿਲੀਅਨ ਦਾ ਨਿਵੇਸ਼ ਕੀਤਾ ਜਾ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਜਿੱਥੇ ਇਸ ਰਾਹੀਂ ਇੰਡੀਜੀਨਸ ਭਾਈਚਾਰਿਆਂ ਨੂੰ ਸਹਾਇਤਾ ਮਿਲੇਗੀ ਉੱਥੇ ਹੀ ਫੂਡ ਬੈਂਕਸ ਕੈਨੇਡਾ, ਬ੍ਰੇਕਫਾਸਟ ਕਲੱਬ ਆਫ ਕੈਨੇਡਾ ਅਤੇ ਸੈਲਵੇਸ਼ਨ ਆਰਮੀ ਵਰਗੀਆਂ ਸੰਸਥਾਵਾਂ ਨੂੰ ਵੀ ਸਹਿਯੋਗ ਪ੍ਰਦਾਨ ਕੀਤਾ ਜਾ ਸਕੇਗਾ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਮੁਤਾਬਕ ਉਹ ਅਮਰੀਕਾ ਨਾਲ ਆਪਸੀ ਵਪਾਰ ਦੀ ਅਹਿਮੀਅਤ ਦੇ ਸੰਬੰਧ ਵਿੱਚ ਗੱਲ ਕਰਨਗੇ।
ਉਨ੍ਹਾਂ ਇਹ ਬਿਆਨ ਵ੍ਹਾਈਟ ਹਾਊਸ ਵੱਲੋਂ 3 ਐੱਮ ਕੰਪਨੀ ਦੇ ਕੈਨੇਡਾ ਨੂੰ ਐੱਨ-95 ਮਾਸਕ ਸਪਲਾਈ ਉੱਤੇ ਲਾਈ ਰੋਕ ਤੋਂ ਬਾਅਦ ਦਿੱਤਾ ਹੈ।
