19.08C Vancouver 19.08C VancouverSep 5, 2025 6:41 PM - Connect Newsroom
ਬੀ. ਸੀ. ਸਰਕਾਰ ਨੇ ਕਾਉਵਿਚਨ ਵੈਲੀ ਵਿਚ ਕਈ ਮਹੀਨਿਆਂ ਤੋਂ ਚੱਲ ਰਹੀ ਟਰਾਂਜ਼ਿਟ ਹੜਤਾਲ ਨੂੰ ਖਤਮ ਕਰਨ ਲਈ ਇੱਕ ਹੋਰ ਸਪੈਸ਼ਲ ਮੀਡੀਏਟਰ ਦੀ ਨਿਯੁਕਤੀ ਕੀਤੀ ਹੈ। ਸੂਬੇ ਦੀ ਲੇਬਰ ਮੰਤਰੀ ਜੈਨੀਫਰ ਵ੍ਹਾਈਟਸਾਈਡ ਨੇ ਅੱਜ ਇੱਕ ਬਿਆਨ ਵਿਚ ਕਿਹਾ ਕਿ ਇਸ ਹੜਤਾਲ ਨੇ ਕਾਉਵਿਚਨ ਵੈਲੀ ਵਿਚ ਰਹਿਣ ਵਾਲੇ ਲੋਕਾਂ ਨੂੰ ਬੁਰੀ ਤਰ੍ਹਾਂ ਪ੍ਰਭਾਵਿਤ ਕੀਤਾ ਹੈ, ਖਾਸ ਤੌਰ 'ਤੇ ਉਨ੍ਹਾਂ ਲੋਕਾਂ ਨੂੰ ਜੋ ਕੰਮ 'ਤੇ ਜਾਣ ਤੋਂ ਲੈ ਕੇ ਸਕੂਲ ਜਾਣ, ਮੈਡੀਕਲ ਅਪਾਇਟਮੈਂਟਸ ਵਿਚ ਸ਼ਾਮਲ ਹੋਣ ਅਤੇ ਰੋਜ਼ਾਨਾ ਸੇਵਾਵਾਂ ਤੱਕ ਪਹੁੰਚ ਲਈ ਟਰਾਂਜ਼ਿਟ 'ਤੇ ਨਿਰਭਰ ਹਨ।
ਮੰਤਰੀ ਨੇ ਕਿਹਾ ਕਿ ਇਹ ਵਿਵਾਦ ਬਹੁਤ ਲੰਮੇ ਸਮੇਂ ਤੋਂ ਚੱਲ ਰਿਹਾ ਹੈ, ਇਸ ਲਈ ਦੋਵਾਂ ਧਿਰਾਂ ਨੂੰ ਗੱਲਬਾਤ ਦੀ ਮੇਜ ਉਤੇ ਵਾਪਸ ਲਿਆਉਣਾ ਬਹੁਤ ਜ਼ਰੂਰੀ ਹੈ, ਜਿਸ ਦੇ ਹੱਲ ਲਈ ਉਨ੍ਹਾਂ ਵਿੰਸ ਰੈਡੀ ਨੂੰ ਸਪੈਸ਼ਲ ਮੀਡੀਏਟਰ ਨਿਯੁਕਤ ਕੀਤਾ ਹੈ। ਲੇਬਰ ਮਿਨਿਸਟਰ ਨੇ ਕਿਹਾ ਕਿ ਰੈਡੀ ਇੰਪਲਾਇਰਜ਼ ਅਤੇ ਯੂਨੀਅਨ ਵਿਚ ਸਮਝੌਤਾ ਕਰਵਾਉਣ ਵਿਚ ਆਪਣੀ ਸਫਲਤਾ ਲਈ ਜਾਣੇ ਜਾਂਦੇ ਹਨ ਅਤੇ ਉਨ੍ਹਾਂ ਨੂੰ ਇਸ ਦਾ ਕਾਫੀ ਤਜਰਬਾ ਹੈ।
ਮੰਤਰੀ ਨੇ ਕਿਹਾ ਕਿ ਰੈਡੀ ਤੁਰੰਤ ਕੰਮ ਸ਼ੁਰੂ ਕਰਨਗੇ ਅਤੇ ਜੇ 10 ਦਿਨਾਂ ਵਿਚ ਦੋਵੇਂ ਧਿਰਾਂ ਵਿਚਕਾਰ ਸਮਝੌਤਾ ਨਹੀਂ ਹੁੰਦਾ ਤਾਂ ਉਹ ਮਿਨਿਸਟਰ ਅਤੇ ਸਬੰਧਤ ਧਿਰਾਂ ਨੂੰ ਆਪਣੀ ਸਿਫਾਰਸ਼ਾਂ ਸੌਂਪਣਗੇ, ਜਿਸ 'ਤੇ ਅਗਲੇ ਕਦਮ ਬਾਰੇ ਉਸ ਹਿਸਾਬ ਨਾਲ ਵਿਚਾਰ ਕੀਤਾ ਜਾਵੇਗਾ।
