8.15C Vancouver 8.15C VancouverMay 29, 2020 7:32 PM -
ਅਮਰੀਕਾ 'ਚ ਮੀਨੀਆਪੌਲਿਸ 'ਚ ਜਾਰਜ ਫਲਾਇਡ ਨਾਮ ਦੇ ਵਿਅਕਤੀ ਦੀ ਮੌਤ ਦੇ ਮਾਮਲੇ 'ਚ ਹਿੰਸਕ ਪ੍ਰਦਰਸ਼ਨ ਜਾਰੀ ਹਨ, ਪਰ ਮਾਮਲੇ ਨਾਲ ਜੁੜੇ ਇੱਕ ਪੁਲਿਸ ਅਫ਼ਸਰ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ।
ਪੁਲਿਸ ਅਫ਼ਸਰ ਦਾ ਨਾਮ ਡੈਰੇਕ ਚੌਵਿਨ ਹੈ। ਇਹ ਉਹੀ ਅਫ਼ਸਰ ਹੈ ਜਿਸ ਦਾ ਇੱਕ ਵੀਡੀਓ ਉਜਾਗਰ ਹੋਇਆ ਸੀ, ਜਿਸ ਵਿੱਚ ਅਫ਼ਸਰ ਨੂੰ ਪੀੜਤ ਵਿਅਕਤੀ ਦੀ ਗਰਦਨ 'ਤੇ ਗੋਡੇ ਨਾਲ ਦਬਾਅ ਬਣਾਉਂਦੇ ਹੋਏ ਵੇਖਿਆ ਜਾ ਸਕਦਾ ਹੈ।
ਇਸ ਦੌਰਾਨ ਪੀੜਤ ਲਗਾਤਾਰ ਕਹਿ ਰਿਹਾ ਸੀ ਕਿ ਉਸ ਨੂੰ ਸਾਹ ਲੈਣ 'ਚ ਪ੍ਰੇਸ਼ਾਨੀ ਹੋ ਰਹੀ ਹੈ।
ਇਸ ਅਫ਼ਸਰ ਦੀ ਗ੍ਰਿਫਤਾਰੀ ਨਾਲ ਜੁੜੀ ਮੰਗ ਸੰਬੰਧੀ ਪ੍ਰਦਰਸ਼ਨਾਂ ਨੇ ਹਿੰਸਕ ਰੂਪ ਧਾਰ ਲਿਆ ਹੈ।
ਇਲਾਕੇ 'ਚ ਲੁੱਟ-ਕਸੁੱਟ ਹੋ ਰਹੀ ਹੈ। ਬੀਤੀ ਰਾਤ ਉਸ ਪੁਲਿਸ ਥਾਣੇ ਨੂੰ ਵੀ ਅੱਗ ਦੇ ਹਵਾਲੇ ਕਰ ਦਿੱਤਾ ਗਿਆ ਸੀ, ਜਿਸ ਦੇ ਨਾਲ ਇਨ੍ਹਾਂ ਅਫ਼ਸਰਾਂ ਦਾ ਵਾਸਤਾ ਦੱਸਿਆ ਗਿਆ ਸੀ।
ਮਿਨੇਸੋਟਾ ਗਵਰਨਰ ਟਿਮ ਵਾਲਜ਼ ਦਾ ਕਹਿਣਾ ਹੈ ਕਿ ਪ੍ਰਦਰਸ਼ਨਾਂ ਸੰਬੰਧੀ ਕਾਰਵਾਈ ਹੁਣ ਸੂਬੇ ਵੱਲੋਂ ਕੀਤੀ ਜਾਵੇਗੀ, ਅਤੇ ਪੀੜਤਾਂ ਦੇ ਸਨਮਾਨ ਦਾ ਧਿਆਨ ਰੱਖਿਆ ਜਾਵੇਗਾ।
ਕੀ ਹੈ ਪੂਰਾ ਮਾਮਲਾ ?
ਯਾਦ ਰਹੇ ਲੋਕਾਂ ਵੱਲੋਂ ਜਾਰਜ ਫਲਾਇਡ ਨਾਮ ਦੇ ਵਿਅਕਤੀ ਦੀ ਮੌਤ ਦੇ ਮਾਮਲੇ 'ਚ ਇਹ ਪ੍ਰਦਰਸ਼ਨ ਕੀਤੇ ਜਾ ਰਹੇ ਹਨ।
ਮੈਮੋਰੀਅਲ ਡੇਅ ਮੌਕੇ ਇੱਕ ਅਫ਼ਸਰ ਨੇ ਕਿਸੇ ਮਾਮਲੇ ਸੰਬੰਧੀ ਜਾਰਜ ਫਲਾਇਡ ਨੂੰ ਕਾਬੂ ਕੀਤਾ ਸੀ, ਅਤੇ ਬਾਅਦ ਵਿੱਚ ਇੱਕ ਵੀਡੀਓ ਸਾਹਮਣੇ ਆਇਆ ਜਿਸ ਦੌਰਾਨ ਅਫ਼ਸਰ ਨੇ ਆਪਣਾ ਗੋਡਾ, ਪੀੜਤ ਦੀ ਧੌਣ 'ਤੇ ਕਰੀਬ 8 ਮਿੰਟਾਂ ਤੱਕ ਦੱਬ ਕੇ ਰੱਖਿਆ, ਜਿਸ ਦੌਰਾਨ ਪੀੜਤ ਵਾਰ-ਵਾਰ ਕਹਿੰਦਾ ਰਿਹਾ ਕਿ ਉਸ ਨੂੰ ਸਾਹ ਨਹੀਂ ਆ ਰਿਹਾ ਹੈ।
ਪੀੜਤ ਨੇ ਦਮ ਤੋੜ ਦਿੱਤਾ ਸੀ। ਮਾਮਲੇ ਸੰਬੰਧੀ 4 ਅਫ਼ਸਰਾਂ ਨੂੰ ਫੋਰਸ ਤੋਂ ਕੱਢ ਦਿੱਤਾ ਗਿਆ ਸੀ, ਅਤੇ ਹੁਣ ਇਨ੍ਹਾਂ ਵਿੱਚੋਂ ਇੱਕ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ।
