ਮਿਸ਼ਨ ਵਿਚ ਘਰ 'ਚ ਦਾਖਲ ਹੋ ਕੇ ਪਰਿਵਾਰਕ ਮੈਂਬਰਾਂ 'ਤੇ ਹਮਲਾ, ਹਮਲਾਵਰਾਂ ਦੀ ਕੀਤੀ ਜਾ ਰਹੀ ਭਾਲ

ਮਿਸ਼ਨ ਵਿਚ ਵਿਡਨ ਐਵੇਨਿਊ ਖੇਤਰ ਦੇ ਇੱਕ ਘਰ ਵਿਚ ਜ਼ਬਰਦਸਤੀ ਦਾਖਲ ਹੋ ਕੇ ਪਰਿਵਾਰਕ ਮੈਂਬਰਾਂ 'ਤੇ ਹਮਲਾ ਕਰਨ ਦਾ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ। ਹਮਲਾਵਰਾਂ ਨੇ ਪੀੜਤਾਂ 'ਤੇ ਪੈਪਰ ਸਪਰੇਅ ਕੀਤਾ ਅਤੇ ਇੱਕ ਵਿਅਕਤੀ ਦੇ ਲੋਹੇ ਦੀ ਰੌਡ ਮਾਰੀ। ਘਰ ਦੇ ਮਾਲਕ ਵਲੋਂ ਵਿਰੋਧ ਦੌਰਾਨ ਇੱਕ ਸ਼ੱਕੀ ਨੂੰ ਸੱਟਾਂ ਲੱਗੀਆਂ ਅਤੇ ਹਮਲਾਵਰ ਮੌਕੇ ਤੋਂ ਲੰਬੀਆਂ ਬੰਦੂਕਾਂ ਚੋਰੀ ਕਰਕੇ ਫ਼ਰਾਰ ਹੋ ਗਏ।

ਮਿਸ਼ਨ ਆਰ.ਸੀ.ਐਮ.ਪੀ. ਮੁਤਾਬਕ, ਘਟਨਾ 13 ਨਵੰਬਰ ਦੇ ਵੱਡੇ ਤੜਕੇ ਲਗਭਗ 1:30 ਵਜੇ ਵਾਪਰੀ ਅਤੇ ਲਗਭਗ 2:00 ਵਜੇ ਇੱਕ ਲੋਕਲ ਹਸਪਤਾਲ ਨੇ ਪੁਲਿਸ ਨੂੰ ਸੂਚਿਤ ਕੀਤਾ ਕਿ ਇੱਕ ਵਿਅਕਤੀ ਨੂੰ ਸ਼ੱਕੀ ਸੱਟਾਂ ਨਾਲ ਉੱਥੇ ਛੱਡਿਆ ਗਿਆ ਹੈ।

ਪੁਲਿਸ ਨੇ ਇਸ ਸ਼ੱਕੀ ਨੂੰ ਹਿਰਾਸਤ ਵਿਚ ਲੈ ਲਿਆ, ਜਦੋਂ ਕਿ ਡੌਜ ਕੈਰਾਵੈਨ ਗੱਡੀ ਜੋ ਉਸ ਨੂੰ ਹਸਪਤਾਲ ਛੱਡ ਕੇ ਗਈ ਸੀ ਅਧਿਕਾਰੀ ਨੇ ਉਸ ਦਾ ਐਬਟਸਫੋਰਡ ਤੱਕ ਪਿੱਛਾ ਕੀਤਾ, ਇਹ ਤੇਜ਼ ਰਫ਼ਤਾਰ ਨਾਲ ਭਜਾਈ ਜਾ ਰਹੀ ਸੀ, ਬਾਅਦ ਵਿਚ ਗੱਡੀ ਖਾਲੀ ਮਿਲੀ।

ਇਨਵੈਸਟੀਗੇਟਰਸ ਦਾ ਕਹਿਣਾ ਹੈ ਕਿ ਘਰ ਵਿਚ ਹਮਲੇ ਵਿਚ ਤਿੰਨ ਸ਼ੱਕੀ ਸ਼ਾਮਲ ਸਨ ਦੋ ਅਜੇ ਵੀ ਫ਼ਰਾਰ ਹਨ। ਮਿਸ਼ਨ ਆਰ.ਸੀ.ਐਮ.ਪੀ. ਨੇ ਇਸ ਸਬੰਧ ਵਿਚ ਇੱਕ ਸ਼ੱਕੀ ਦੀ ਤਸਵੀਰ ਜਾਰੀ ਕਰਦੇ ਹੋਏ ਉਸ ਦੀ ਪਛਾਣ ਕਰਨ ਵਿਚ ਮਦਦ ਮੰਗੀ ਹੈ ਅਤੇ ਇਸ ਘਟਨਾ ਨੂੰ ਟਾਰਗੇਟਡ ਹਮਲਾ ਮੰਨ ਕੇ ਜਾਂਚ ਕਰ ਰਹੀ ਹੈ।