13.26C Vancouver 13.26C VancouverMay 20, 2022 7:09 PM - The Canadian Press
ਕੈਨੇਡਾ ਦੇ ਚੋਟੀ ਦੇ ਪਬਲਿਕ ਹੈਲਥ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਦੇਸ਼ 'ਚ ਮੰਕੀਪੌਕਸ ਦਾ ਖਤਰਾ ਬਹੁਤ ਜ਼ਿਆਦਾ ਨਹੀਂ ਹੈ।
ਹਾਲਾਂਕਿ ਇਹ ਵੀ ਆਖਿਆ ਗਿਆ ਕਿ ਦੇਸ਼ 'ਚ ਬਹੁਤ ਸਾਰੇ ਲੋਕ ਇਸ ਦੇ ਲਈ ਕਮਜ਼ੋਰ ਹੋ ਸਕਦੇ ਹਨ ਕਿਉਂਕਿ ਸਮੌਲਪੌਕਸ ਸੰਬੰਧੀ ਰੂਟੀਨ ਵੈਕਸੀਨ ਨੂੰ ਕਈ ਦਹਾਕੇ ਪਹਿਲਾਂ ਬੰਦ ਕਰ ਦਿੱਤਾ ਗਿਆ ਸੀ।
ਚੀਫ਼ ਪਬਲਿਕ ਹੈਲਥ ਅਫ਼ਸਰ, ਡਾ. ਥਰੈਸਾ ਟੈਮ ਨੇ ਆਖਿਆ ਕਿ ਦੇਸ਼ 'ਚ ਮੰਕੀਪੌਕਸ ਦੇ ਪਹਿਲੇ 2 ਮਾਮਲੇ ਕਿਊਬੈਕ 'ਚ ਰਿਪੋਰਟ ਹੋਏ ਹਨ।
ਉਨ੍ਹਾਂ ਇਹ ਵੀ ਕਿਹਾ ਕਿ ਕਰੀਬ 2 ਦਰਜਨ ਸ਼ੱਕੀ ਮਾਮਲਿਆਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਉਨ੍ਹਾਂ ਮੰਨਿਆ ਕਿ ਫੈਡਰਲ ਪਬਲਿਕ ਹੈਲਥ ਏਜੈਂਸੀ ਕੋਲ ਸਹੀ ਜਵਾਬ ਨਹੀਂ ਹਨ ਕਿ ਆਖਿਰ ਇਸ ਬਿਮਾਰੀ ਸੰਬੰਧਤ ਮਾਮਲੇ ਕਿੰਨੇ ਕੁ ਵਧ ਸਕਦੇ ਹਨ।
ਉਨ੍ਹਾਂ ਇਹ ਵੀ ਦੱਸਿਆ ਕਿ ਬੀ.ਸੀ. 'ਚ ਇਸ ਬਿਮਾਰੀ ਸੰਬੰਧਤ 2 ਮਾਮਲਿਆਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਡਾ. ਟੈਮ ਨੇ ਕਿਹਾ ਕਿ ਬੀ.ਸੀ. 'ਚ ਸਾਹਮਣੇ ਆਏ ਮਾਮਲਿਆਂ ਦੇ ਸੈਂਪਲ ਨੈਸ਼ਨਲ ਮਾਈਕਰੋਬਾਇਓਲੋਜੀ ਲੈਬ 'ਚ ਭੇਜੇ ਗਏ ਹਨ ਅਤੇ ਹੋਰ ਸਪਸ਼ਟ ਜਾਣਕਾਰੀ ਜਲਦੀ ਹੀ ਹਾਸਿਲ ਹੋ ਸਕਦੀ ਹੈ।
ਜੇਕਰ ਮਾਮਲਿਆਂ ਦੀ ਪੁਸ਼ਟੀ ਹੋ ਜਾਂਦੀ ਹੈ ਤਾਂ ਕਿਊਬੈਕ ਤੋਂ ਬਾਅਦ ਬੀ.ਸੀ. ਦੇਸ਼ ਦਾ ਦੂਜਾ ਸੂਬਾ ਹੋਵੇਗਾ ਜਿੱਥੇ ਇਹ ਮਾਮਲੇ ਰਿਪੋਰਟ ਹੋਏ ਹੋਣ।
ਆਮ ਤੌਰ 'ਤੇ ਮੰਕੀਪੌਕਸ ਦੇ ਲੱਛਣ ਬਹੁਤੇ ਮਜਬੂਤ ਨਹੀਂ ਮੰਨੇ ਜਾਂਦੇ ਅਤੇ ਇਸ ਕਾਰਨ ਬੁਖਾਰ, ਸਿਰ ਦਰਦ, ਮਸਲਸ ਸੰਬੰਧੀ ਦਰਦ, ਪਿੱਠ ਦਰਦ, ਕੰਬਣੀ ਅਤੇ ਥਕਾਵਟ ਜਿਹੇ ਲੱਛਣ ਸਥਾਪਿਤ ਹੁੰਦੇ ਹਨ।
ਹਾਲਾਂਕਿ ਕੁਝ ਲੋਕਾਂ 'ਚ ਇਸ ਬਿਮਾਰੀ ਕਾਰਨ ਲਿੰਫ ਨੋਡਸ 'ਚ ਸੋਜ ਹੋਣ ਦੀ ਵੀ ਗੱਲ ਆਖੀ ਗਈ ਹੈ।
ਕੀ ਹੈ ਮੰਕੀਪੌਕਸ ਦਾ ਇਤਿਹਾਸ ?
ਯੂਰੋਪੀਅਨ ਅਤੇ ਅਮਰੀਕੀ ਹੈਲਥ ਅਧਿਕਾਰੀਆਂ ਵੱਲੋਂ ਇਸ ਹਫ਼ਤੇ ਅਨੇਕਾਂ ਮੰਕੀਪੌਕਸ ਮਾਮਲਿਆਂ ਦੀ ਪਛਾਣ ਕੀਤੀ ਗਈ ਹੈ।
ਇਸ ਬਿਮਾਰੀ ਸੰਬੰਧੀ ਆਊਟਬ੍ਰੇਕ ਨੂੰ ਅਚੰਭੇ ਭਰਿਆ ਵੀ ਮੰਨਿਆ ਜਾ ਰਿਹਾ ਹੈ ਕਿਉਂਕਿ ਇਸ ਤੋਂ ਪਹਿਲਾਂ ਇਹ ਬਿਮਾਰੀ ਸੈਂਟਰਲ ਅਤੇ ਪੱਛਮੀ ਅਫਰੀਕਾ ਤਕ ਸੀਮਤ ਰਹਿੰਦੀ ਮੰਨੀ ਜਾਂਦੀ ਸੀ।
ਡਾਕਟਰ ਹੁਣ ਵੀ ਕੋਈ ਸਪਸ਼ਟ ਜਾਣਕਾਰੀ ਹਾਸਿਲ ਨਹੀਂ ਕਰ ਸਕੇ ਹਨ ਕਿ ਮੰਕੀਪੌਕਸ ਆਖਿਰ ਫੈਲ ਕਿਵੇਂ ਰਿਹਾ ਹੈ।
ਇਸ ਬਿਮਾਰੀ ਨੂੰ ਆਮ ਤੌਰ 'ਤੇ ਰੋਡੈਂਟਸ ਕਾਰਨ ਜਾਂ ਕਿਸੇ ਪੀੜਤ ਵਿਅਕਤੀ ਦੇ ਬੇਹੱਦ ਨੇੜੇ ਦੇ ਸੰਪਰਕ ਕਾਰਨ ਵਧਣ ਦੇ ਆਸਾਰ ਮੰਨੇ ਜਾਂਦੇ ਹਨ।
ਬ੍ਰਿਟਿਸ਼ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਸ ਬਿਮਾਰੀ ਨਾਲ ਜੂਝਦੇ ਹਾਲ ਦੇ ਬਹੁਤੇ ਮਾਮਲੇ ਉਨ੍ਹਾਂ ਆਦਮੀਆਂ ਨਾਲ ਸੰਬੰਧਤ ਹਨ ਜਿੰਨਾ ਨੇ ਕਿਸੇ ਹੋਰ ਆਦਮੀ ਨਾਲ ਸ਼ਰੀਰਕ ਸੰਬੰਧ ਬਣਾਏ ਸਨ ਅਤੇ ਇਹ ਮਾਮਲੇ ਅਜਿਹੇ ਲੋਕਾਂ ਨਾਲ ਸੰਬੰਧਤ ਸਨ ਜਿੰਨਾ ਦਾ ਕੋਈ ਟਰੈਵਲ ਇਤਿਹਾਸ ਵੀ ਨਹੀਂ ਸੀ।
ਕੀ ਹੈ ਇਸ ਬਿਮਾਰੀ ਦਾ ਇਨਕਿਉਬੇਸ਼ਨ ਪੀਰੀਅਡ ?
ਡਾਕਟਰਾਂ ਦਾ ਕਹਿਣਾ ਹੈ ਕਿ ਆਮ ਤੌਰ 'ਤੇ ਇਸ ਬਿਮਾਰੀ ਦੇ ਵਿਕਸਿਤ ਹੋਣ 'ਚ 7 ਤੋਂ 17 ਦਿਨ ਦਾ ਸਮਾਂ ਲਗਦਾ ਹੈ।
ਹਾਲਾਂਕਿ ਕੁਝ ਮਾਮਲਿਆਂ 'ਚ ਇਸ ਬਿਮਾਰੀ ਦੇ ਲੱਛਣ ਸਥਾਪਿਤ ਹੋਣ 'ਚ 5 ਦਿਨ ਅਤੇ ਕੁਝ ਮਾਮਲਿਆਂ 'ਚ 21 ਦਿਨ ਤਕ ਦਾ ਸਮਾਂ ਲੱਗਣ ਦੀ ਜਾਣਕਾਰੀ ਦਿੱਤੀ ਗਈ ਹੈ।
ਮਾਹਿਰਾਂ ਅਨੁਸਾਰ ਇਹ ਇਨਫੈਕਸ਼ਨ ਆਮ ਤੌਰ 'ਤੇ 2 ਤੋਂ 4 ਹਫ਼ਤੇ ਤਕ ਅਸਰ ਵਿਖਾਉਂਦੀ ਹੈ।
ਕੀ ਹਨ ਮੰਕੀਪੌਕਸ ਦੇ ਲੱਛਣ ?
ਮੰਕੀਪੌਕਸ ਨਾਮ ਦੀ ਬਿਮਾਰੀ ਨਾਲ ਸੰਬੰਧਤ ਲੱਛਣਾਂ ਨੂੰ ਸਮੌਲਪੌਕਸ ਦੇ ਨਾਲ ਰਲਦੇ-ਮਿਲਦੇ ਦੱਸਿਆ ਗਿਆ ਹੈ।
ਇਸ ਦੌਰਾਨ ਬੁਖਾਰ, ਸਿਰ ਦਰਦ, ਮਸਲਸ ਸੰਬੰਧੀ ਦਰਦ, ਪਿੱਠ ਦਰਦ, ਕੰਬਣੀ ਅਤੇ ਥਕਾਵਟ ਜਿਹੇ ਲੱਛਣ ਸਥਾਪਿਤ ਹੁੰਦੇ ਹਨ।
ਹਾਲਾਂਕਿ ਕੁਝ ਲੋਕਾਂ 'ਚ ਇਸ ਬਿਮਾਰੀ ਕਾਰਨ ਲਿੰਫ ਨੋਡਸ 'ਚ ਸੋਜ ਹੋਣ ਦੀ ਵੀ ਗੱਲ ਆਖੀ ਗਈ ਹੈ।
