ਟਿਊਸ਼ਨ ਫੀਸ ਵਿਚ ਵਾਧਾ ਕੀਤੇ ਜਾਣ ਤੋਂ ਬਾਅਦ ਮਾਂਟਰੀਅਲ ਦੀ ਕੋਨਕੋਰਡੀਆ ਯੂਨੀਵਰਸਿਟੀ ’ਤੇ ਪਿਆ ਵੱਡਾ ਅਸਰ

ਕਿਊਬੈਕ ਸਰਕਾਰ ਵਲੋਂ ਟਿਊਸ਼ਨ ਫੀਸ ਵਿਚ ਵਾਧਾ ਕੀਤੇ ਜਾਣ ਦਾ ਮਾਂਟਰੀਅਲ ਦੀ ਕੋਨਕੋਰਡੀਆ ਯੂਨੀਵਰਸਿਟੀ ’ਤੇ ਵੱਡਾ ਅਸਰ ਪਿਆ ਹੈ। ਯੂਨੀਵਰਸਿਟੀ ਨੇ ਕਿਊਬੈਕ ਤੋਂ ਬਾਹਰੋਂ ਆਉਣ ਵਾਲੇ ਸਟੂਡੈਂਟਸ ਦੀ ਗਿਣਤੀ ਵਿਚ 30 ਫੀਸਦੀ ਗਿਰਾਵਟ ਦੀ ਸੂਚਨਾ ਦਿੱਤੀ ਹੈ। ਕੋਨਕੋਰਡੀਆ ਯੂਨੀਵਰਸਿਟੀ ਨੇ ਕਿਹਾ ਕਿ ਪਿਛਲੇ ਸਾਲ ਦੀ ਤੁਲਨਾ ਵਿਚ ਇੰਟਰਨੈਸ਼ਨਲ ਸਟੂਡੈਂਟਸ ਦੇ ਦਾਖਲਿਆਂ ਵਿਚ ਵੀ 11 ਫੀਸਦੀ ਗਿਰਾਵਟ ਆਈ ਹੈ।

ਗੌਰਤਲਬ ਹੈ ਕਿ ਕਿਊਬੈਕ ਦੀ ਫਰੈਂਕੋਇਸ ਲੇਗੌਲਟ ਸਰਕਾਰ ਨੇ ਫਰੈਂਚ ਭਾਸ਼ਾ ਨੂੰ ਬਚਾਉਣ ਦਾ ਹਵਾਲਾ ਦਿੰਦੇ ਹੋਏ ਸੂਬੇ ਤੋਂ ਬਾਹਰ ਦੇ ਸਟੂਡੈਂਟਸ ਲਈ ਟਿਊਸ਼ਨ ਫੀਸ $9,000 ਤੋਂ ਵਧਾ ਕੇ $12,000 ਕੀਤੀ ਹੈ, ਜਦੋਂ ਕਿ ਸੂਬੇ ਦੀਆਂ ਦੋ ਵੱਡੀਆਂ ਯੂਨੀਵਰਸਿਟੀਜ਼ ਕੋਨਕੋਰਡੀਆ ਅਤੇ ਮੈਕਗਿਲ ਇਸ ਦੇ ਵਿਰੋਧ ਵਿਚ ਸਨ।

ਮੈਕਗਿਲ ਯੂਨੀਵਰਿਸਟੀ ਨੇ ਕਿਹਾ ਕਿ ਅੰਤਿਮ ਦਾਖਲੇ ਸਬੰਧੀ ਰਿਪੋਰਟ ਅਜੇ ਉਹ ਅਕਤੂਬਰ ਤੱਕ ਜਾਰੀ ਕਰਨ ਦੀ ਸਥਿਤੀ ਵਿਚ ਨਹੀਂ ਹੈ ਪਰ ਪਿਛਲੇ ਸਾਲ ਦਸੰਬਰ ਵਿਚ ਮੈਕਗਿਲ ਨੇ ਕਿਹਾ ਸੀ ਕਿ ਉਸ ਨੂੰ ਬਾਹਰ ਤੋਂ ਮਿਲਣ ਵਾਲੇ ਦਾਖਲਿਆਂ ਵਿਚ 20 ਫੀਸਦੀ ਗਿਰਾਵਟ ਦੀ ਉਮੀਦ ਹੈ। ਦੋਵੇਂ ਯੂਨੀਵਰਸਿਟੀਜ਼ ਨਵੀਂ ਟਿਊਸ਼ਨ ਪੌਲਿਸੀ ਨੂੰ ਲੈ ਕੇ ਕਿਊਬੈਕ ਸਰਕਾਰ ’ਤੇ ਮੁਕੱਦਮਾ ਕਰ ਰਹੀਆਂ ਹਨ, ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਨੀਤੀ ਭੇਦਭਾਵਪੂਰਨ ਹੈ।