ਬੀ.ਸੀ. ਵਿਚ ਬੇਘਰ ਲੋਕਾਂ ਦੀਆਂ ਮੌਤਾਂ ਵਿਚ ਦਰਜ ਕੀਤਾ ਗਿਆ ਵੱਡਾ ਵਾਧਾ

ਬੀ.ਸੀ. ਵਿਚ ਬੇਘਰ ਲੋਕਾਂ ਦੀਆਂ ਮੌਤਾਂ ਵਿਚ ਵੱਡਾ ਵਾਧਾ ਦਰਜ ਕੀਤਾ ਗਿਆ ਹੈ। ਬੀ.ਸੀ. ਕੋਰੋਨਰ ਸਰਵਿਸ ਨੇ ਅੱਜ ਜਾਰੀ ਰਿਪੋਰਟ ਵਿਚ ਕਿਹਾ ਕਿ 2023 ਵਿਚ ਘੱਟੋ-ਘੱਟ 458 ਬੇਘਰ ਲੋਕਾਂ ਦੀ ਮੌਤ ਹੋਈ, ਜੋ ਪਿਛਲੇ ਸਾਲਾਂ ਨਾਲੋਂ ਨਾਟਕੀ ਵਾਧਾ ਹੈ। ਏਜੰਸੀ ਨੇ ਇਸ ਲਈ ਨਸ਼ੇ ਦੇ ਸੰਕਟ ਨੂੰ ਮੁੱਖ ਤੌਰ 'ਤੇ ਜ਼ਿੰਮੇਵਾਰ ਦੱਸਿਆ ਹੈ।

ਬੀ.ਸੀ. ਕੋਰੋਨਰ ਸਰਵਿਸ ਨੇ ਕਿਹਾ ਕਿ 2023 ਵਿਚ ਬੇਘਰ ਲੋਕਾਂ ਦੀ ਮੌਤਾਂ ਦੀ ਗਿਣਤੀ 2022 ਦੇ ਮੁਕਾਬਲੇ 23 ਫੀਸਦੀ ਵੱਧ ਹੈ ਅਤੇ 2020 ਦੇ ਨਾਲੋਂ ਲਗਭਗ ਤਿੰਨ ਗੁਣਾ ਜ਼ਿਆਦਾ ਹੈ। ਰਿਪੋਰਟ ਮੁਤਾਬਕ, 2023 ਵਿਚ ਬੇਘਰ ਮ੍ਰਿਤਕਾਂ ਵਿਚ ਅੱਧੇ ਤੋਂ ਵੱਧ ਲੋਕ 30 ਤੋਂ 49 ਸਾਲ ਦੇ ਸਨ ਅਤੇ ਇਨ੍ਹਾਂ ਵਿਚ ਕਰੀਬ 79 ਫੀਸਦੀ ਪੁਰਸ਼ ਸਨ।

ਸੂਬੇ ਦੇ ਮੁੱਖ ਕੋਰੋਨਰ ਡਾ. ਜਤਿੰਦਰ ਬੈਦਵਾਨ ਨੇ ਕਿਹਾ ਕਿ ਇਹ ਅੰਕੜੇ ਬੀ. ਸੀ. ਵਿਚ ਕਈ ਲੋਕਾਂ ਵਲੋਂ ਮੁਸ਼ਕਲ ਹਾਲਾਤ ਦਾ ਸਾਹਮਣਾ ਕਰਨ ਦੀ ਹਕੀਕਤ ਬਿਆਨ ਕਰਦੇ ਹਨ। ਉਹਨਾਂ ਕਿਹਾ ਕਿ 2016 ਤੋਂ 2023 ਤੱਕ 1,940 ਬੇਘਰ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ ਅਤੇ ਇਹ ਅੰਕੜੇ ਵੀ ਅਜੇ ਸ਼ੁਰੂਆਤੀ ਮੰਨੇ ਜਾਂਦੇ ਹਨ। ਰਿਪੋਰਟ ਮੁਤਾਬਕ, ਪਿਛਲੇ ਸਾਲ ਸਭ ਤੋਂ ਵੱਧ ਬੇਘਰ ਲੋਕਾਂ ਦੀਆਂ ਮੌਤਾਂ ਫਰੇਜ਼ਰ ਹੈਲਥ ਖੇਤਰ ਵਿਚ ਹੋਈਆਂ, ਜੋ ਕਿ 117 ਸਨ।