10.19C Vancouver 10.19C VancouverJul 29, 2020 4:39 PM -
'ਵੀ ਚੈਰਿਟੀ' ਮਾਮਲੇ ਦੀ ਚੱਲ ਰਹੀ ਜਾਂਚ ਨੂੰ ਅੱਗੇ ਵਧਾਉਣ ਲਈ ਹਾਊਸ ਔਫ਼ ਕੌਮਨਜ਼ ਦੀ ਐਥਿਕਸ ਕਮੇਟੀ ਦੇ ਮੈਂਬਰ ਅੱਜ ਦੁਪਹਿਰ ਮਿਲਣਗੇ।
'ਵੀ ਚੈਰਿਟੀ' ਦੇ ਸਮਾਗਮਾਂ ਵਿੱਚ ਟਰੂਡੋ ਪਰਿਵਾਰ ਦੀ ਸ਼ਮੂਲੀਅਤ ਉੱਤੇ ਸੰਸਥਾ ਵੱਲੋਂ ਖਰਚ ਕੀਤੀ ਗਈ ਲੱਗਭਗ $300,000 ਦੀ ਰਾਸ਼ੀ ਦੇ ਨਾਲ ਸੰਬੰਧਤ ਦਸਤਾਵੇਜ਼ਾਂ ਦੀ ਕਮੇਟੀ ਵੱਲੋਂ ਮੰਗ ਕੀਤੀ ਜਾ ਰਹੀ ਹੈ।
ਵਿਰੋਧੀ ਧਿਰ ਦੇ ਮੈਂਬਰਾਂ ਵੱਲੋਂ ਆਪਣੀ ਵੱਧ ਸੰਖਿਆ ਦੇ ਦਮ 'ਤੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਕਮੇਟੀ ਸਾਹਮਣੇ ਪੇਸ਼ ਹੋਣ ਲਈ ਕਹੇ ਜਾਣ ਦਾ ਮਤਾ ਪਾਸ ਕੀਤਾ ਗਿਆ ਸੀ।
ਕੱਲ ਜਸਟਿਨ ਟਰੂਡੋ ਪਾਰਲੀਮੈਂਟ ਦੀ ਫ਼ਾਇਨੈਂਸ ਕਮੇਟੀ ਸਾਹਮਣੇ ਪੇਸ਼ ਹੋਕੇ, ਸਟੂਡੈਂਟ ਗ੍ਰਾਂਟ ਪ੍ਰੋਗਰਾਮ ਦੀ ਜਿੰਮੇਦਾਰੀ 'ਵੀ ਚੈਰਿਟੀ' ਨੂੰ ਦਿੱਤੇ ਜਾਣ ਦੇ ਸੰਬੰਧ ਵਿੱਚ ਸਵਾਲਾਂ ਦੇ ਜਵਾਬ ਦੇਣਗੇ।
ਐਥਿਕਸ ਕਮੇਟੀ ਵੱਲੋਂ ਇਸ ਮਾਮਲੇ ਨਾਲ ਸੰਬੰਧਿਤ ਨੈਤਿਕਤਾ ਦੇ ਪ੍ਰਸ਼ਨਾਂ ਬਾਰੇ ਇੱਕ ਵੱਖਰੀ ਜਾਂਚ ਕੀਤੀ ਜਾ ਰਹੀ ਹੈ।
ਲਿਬਰਲ ਸਰਕਾਰ ਵੱਲੋਂ ਇਸ ਪ੍ਰੋਗਰਾਮ ਲਈ $912 ਮਿਲੀਅਨ ਪਾਸ ਕੀਤੇ ਗਏ ਸਨ, ਪਰ ਸਮਝੌਤੇ ਮੁਤਾਬਕ ਪ੍ਰੋਗਰਾਮ ਉੱਤੇ ਵੱਧ ਤੋਂ ਵੱਧ $543.5 ਮਿਲੀਅਨ ਹੀ ਖਰਚ ਹੋਣੇ ਸਨ, ਜਿਨ੍ਹਾਂ ਵਿੱਚੋਂ $43.5 ਮਿਲੀਅਨ ਇਸ ਪ੍ਰੋਗਰਾਮ ਦੇ ਸੰਚਾਲਨ ਲਈ 'ਵੀ ਚੈਰਿਟੀ' ਨੂੰ ਦਿੱਤੇ ਜਾਣ ਦਾ ਪ੍ਰਬੰਧ ਸੀ।
ਮੰਗਲਵਾਰ ਨੂੰ ਵੀ ਚੈਰਿਟੀ ਦੇ ਸੰਸਥਾਪਕਾਂ ਕ੍ਰੇਗ ਅਤੇ ਮਾਰਕ ਕੀਲਬਰਗਰ ਨੇ ਫ਼ਾਇਨੈਂਸ ਕਮੇਟੀ ਨੂੰ ਦੱਸਿਆ ਕਿ ਉਹਨਾਂ ਮੁਤਾਬਕ ਇਸ ਪ੍ਰੋਗਰਾਮ ਉੱਤੇ ਵੱਧ ਤੋਂ ਵੱਧ $300 ਮਿਲੀਅਨ ਹੀ ਖਰਚ ਹੋਣੇ ਸਨ।
