17.29C Vancouver 17.29C VancouverJan 11, 2023 1:54 AM - The Canadian Press
ਨੋਵਾ ਸਕੌਸ਼ੀਆ ਦੀ ਇੱਕ ਸਿਆਸਤਦਾਨ ਨੂੰ ਲੀਗਲ ਐਕਸ਼ਨ ਦੀ ਧਮਕੀ ਮਿਲੀ ਹੈ।
ਮਾਮਲਾ ਇੱਕ ਸੋਸ਼ਲ ਮੀਡੀਆ ਪੋਸਟ ਨਾਲ ਸੰਬੰਧਤ ਹੈ ਜਿਸ 'ਚ ਇੱਕ ਔਰਤ ਦੀ ਮੌਤ ਬਾਰੇ ਦੱਸਿਆ ਗਿਆ ਸੀ ਜਿਸ ਨੇ ਹਸਪਤਾਲ 'ਚ ਇਲਾਜ ਦੀ ਉਡੀਕ ਕਰਦਿਆਂ ਕਈ ਘੰਟੇ ਦੀ ਉਡੀਕ ਤੋਂ ਬਾਅਦ ਦਮ ਤੋੜ ਦਿੱਤਾ ਸੀ।
ਕੰਬਰਲੈਂਡ ਨੌਰਥ ਤੋਂ ਸੁਤੰਤਰ ਐਮ.ਐਲ.ਏ. ਐਲਿਜ਼ਾਬੈਥ ਸਮਿਥ ਮੈਕਰੌਸਿਨ ਦਾ ਕਹਿਣਾ ਹੈ ਕਿ ਸੂਬੇ ਦੇ ਜਸਟਿਸ ਡਿਪਾਰਟਮੈਂਟ ਨੇ ਉਨ੍ਹਾਂ ਨੂੰ ਦੱਸਿਆ ਹੈ ਕਿ ਫੇਸਬੁੱਕ 'ਤੇ ਸਾਂਝੀ ਕੀਤੀ ਗਈ ਇੱਕ ਚਿੱਠੀ ਨੂੰ ਹਟਾਇਆ ਜਾਵੇ ਜੋ ਕਿ ਉਨ੍ਹਾਂ ਨੇ ਸੂਬੇ ਦੇ ਸਿਹਤ ਮੰਤਰੀ ਮਿਸ਼ੈਲ ਥਾਂਪਸਨ ਨੂੰ ਲਿਖੀ ਸੀ।
ਇਸ ਚਿੱਠੀ 'ਚ ਐਮ.ਐਲ.ਏ. ਨੇ 37 ਸਾਲਾ ਐਲੀ ਹੋਲਥੌਫ ਦਾ ਜ਼ਿਕਰ ਕੀਤਾ ਸੀ ਅਤੇ ਦੱਸਿਆ ਸੀ ਕਿ ਇਲਾਜ ਦਾ ਉਡੀਕ ਕਰਦਿਆਂ 3 ਬੱਚਿਆਂ ਦੀ ਮਾਂ ਨੇ 31 ਦਿਸੰਬਰ ਨੂੰ ਜਾਨ ਗਵਾ ਦਿੱਤੀ ਸੀ।
6 ਜਨਵਰੀ ਦੀ ਈ-ਮੇਲ 'ਚ ਜਸਟਿਸ ਡਿਪਾਰਟਮੈਂਟ ਨੇ ਚੇਤਾਵਨੀ ਦਿੱਤੀ ਕਿ ਨੋਵਾ ਸਕੌਸ਼ੀਆ ਸਰਕਾਰ ਨਿਜੀ ਹੈਲਥ ਜਾਣਕਾਰੀ ਔਨਲਾਈਨ ਸਾਂਝੀ ਕਰਨ 'ਤੇ ਸਾਰੇ ਲੀਗਲ ਆਪਸ਼ਨ ਵਰਤ ਸਕਦੀ ਹੈ।
ਇਹ ਵੀ ਪੜ੍ਹਨਾ ਜ਼ਰੂਰੀ
ਯਾਦ ਰਹੇ ਬੀਤੇ ਕੱਲ ਇੱਕ ਪ੍ਰੈਸ ਕਾਨਫਰੰਸ ਕਰ ਨੋਵਾ ਸਕੌਸ਼ੀਆ 'ਚ ਇੱਕ ਪਰਿਵਾਰ ਨੇ ਸੂਬੇ ਦੇ ਹੈਲਥ ਸੰਕਟ 'ਤੇ ਤੁਰੰਤ ਐਕਸ਼ਨ ਦੀ ਮੰਗ ਚੁੱਕੀ ਸੀ।
ਇਸ ਪਰਿਵਾਰ ਨੇ 31 ਦਿਸੰਬਰ ਨੂੰ ਆਪਣੇ ਇੱਕ ਮੈਂਬਰ ਨੂੰ ਐਮਹਰਸਟ ਦੇ ਇੱਕ ਹਸਪਤਾਲ 'ਚ ਸਾਂਭ-ਸੰਭਾਲ ਦੀ ਉਡੀਕ ਕਰਦਿਆਂ ਗਵਾ ਦਿੱਤਾ ਸੀ।
ਪੀੜਤ ਔਰਤ ਦਾ ਨਾਮ ਐਲੀ ਲਿਆਹ ਹੋਲਥੌਫ ਸੀ। 37 ਸਾਲਾ ਔਰਤ ਦੇ ਪਰਿਵਾਰ ਨੇ ਦੱਸਿਆ ਕਿ ਐਲੀ ਹੋਲਥੌਫ ਨੂੰ ਕੰਬਰਲੈਂਡ ਰੀਜਨਲ ਹੈਲਥ ਕੇਅਰ ਸੈਂਟਰ ਦੇ ਐਮਰਜੈਂਸੀ ਡਿਪਾਰਟਮੈਂਟ 'ਚ 'ਕੇਅਰ' ਲਈ ਕਈ ਘੰਟੇ ਉਡੀਕ ਕਰਨੀ ਪਈ ਸੀ ਅਤੇ ਉਹ ਵੀ ਅਜਿਹੇ ਸਮੇਂ ਜਦ ਉਹ ਸਪਸ਼ਟ ਤੌਰ 'ਤੇ ਮੈਡਿਕਲ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰ ਰਹੀ ਸੀ।
ਕੰਬਰਲੈਂਡ ਨੌਰਥ ਦੀ ਇੰਡੀਪੈਂਡੈਂਟ ਐਮ.ਐਲ.ਏ. ਐਲਿਜ਼ਾਬੈਥ ਸਮਿਥ ਮੈਕਰੌਸਿਨ ਨੇ ਦੱਸਿਆ ਕਿ ਉਨ੍ਹਾਂ ਪ੍ਰੀਮਿਅਰ ਟਿਮ ਹੂਸਟਨ ਨੂੰ ਇੱਕ ਚਿੱਠੀ ਭੇਜੀ ਹੈ ਅਤੇ ਤੁਰੰਤ ਇੱਕ ਪਲੈਨ ਲਾਂਚ ਕਰਨ ਦੀ ਮੰਗ ਕੀਤੀ ਹੈ, ਜਿਸ ਨਾਲ ਹਸਪਤਾਲਾਂ 'ਚ ਲੋਕਾਂ ਨੂੰ ਸਹੀ ਸਾਂਭ-ਸੰਭਾਲ ਮਿਲ ਸਕੇ।
ਨੋਵਾ ਸਕੌਸ਼ੀਆ ਹੈਲਥ ਦਾ ਕਹਿਣਾ ਹੈ ਕਿ ਮਾਮਲੇ ਦੀ ਜਾਂਚ ਹੋ ਰਹੀ ਹੈ ਅਤੇ ਇਸ ਦੇ ਨਤੀਜੇ ਪਰਿਵਾਰ ਨਾਲ ਸਾਂਝੇ ਕੀਤੇ ਜਾਣਗੇ।
ਪੀੜਤ ਔਰਤ ਦੇ ਪਤੀ ਗੰਥਰ ਹੋਲਥੌਫ ਨੇ ਕਿਹਾ ਕਿ ਉਹ ਉਮੀਦ ਕਰਦੇ ਹਨ ਕਿ ਇਸ ਪ੍ਰਕਾਰ ਦੀ ਸਥਿਤੀ ਦਾ ਸਾਹਮਣਾ ਕਿਸੇ ਹੋਰ ਨੂੰ ਨਾ ਕਰਨਾ ਪਵੇ।
