31.12C Vancouver 31.12C VancouverMar 16, 2021 3:24 PM -
ਨੈਸ਼ਨਲ ਐਡਵਾਈਜ਼ਰੀ ਕਮੇਟੀ ਆਨ ਇਮੂਨਾਇਜੇਸ਼ਨ (ਨੈਸੀ) ਜੋ ਕਿ ਕੈਨੇਡਾ ਵਿੱਚ ਨਵੇਂ ਪ੍ਰਵਾਨਤ ਟੀਕਿਆਂ ਦੀ ਵਰਤੋਂ ਬਾਰੇ ਸਿਫ਼ਾਰਸ਼ਾਂ ਕਰਦੀ ਹੈ, ਵੱਲੋਂ ਔਕਸਫਰਡ-ਐਸਟ੍ਰਾਜ਼ੈਨਕਾ ਦੀ ਵੈਕਸੀਨ ਸਬੰਧੀ ਆਪਣੇ ਦਿਸ਼ਾ ਨਿਰਦੇਸ਼ ਹੁਣ ਬਦਲ ਦਿੱਤੇ ਗਏ ਹਨ ਅਤੇ ਕਮੇਟੀ ਵੱਲੋਂ ਹੁਣ ਇਨ੍ਹਾਂ ਟੀਕਿਆਂ ਨੂੰ 65 ਸਾਲ ਤੋਂ ਵੱਧ ਉਮਰ ਦੇ ਲੋਕਾਂ ਲਈ ਸੁਰੱਖਿਅਤ ਅਤੇ ਅਸਰਦਾਰ ਦੱਸਿਆ ਗਿਆ ਹੈ।
ਜ਼ਿਕਰਯੋਗ ਹੈ ਕਿ ਪਹਿਲਾਂ ਨੈਸੀ ਦੇ ਮਾਹਰਾਂ ਦਾ ਕਹਿਣਾ ਸੀ ਕਿ ਔਕਸਫਰਡ-ਐਸਟ੍ਰਾਜ਼ੈਨਕਾ ਨੇ 65 ਸਾਲ ਤੋਂ ਵੱਧ ਉਮਰ ਦੇ ਬਹੁਤੇ ਲੋਕਾਂ ’ਤੇ ਇਸ ਟੀਕੇ ਨੂੰ ਨਹੀਂ ਅਜ਼ਮਾਇਆ।
ਨੈਸੀ ਦੀ ਮੁੱਖੀ ਡਾਕਟਰ ਕੈਰੋਲੀਨ ਕੁਏਸ਼ ਮੁਤਾਬਕ ਉਸ ਤੋਂ ਬਾਅਦ ਯੂਨਾਈਟਡ ਕਿੰਗਡਮ ਵਿੱਚ ਵੈਕਸੀਨ ਨਾਲ ਸੰਬੰਧਤ ਦੋ ਸਟੱਡੀ ਕੀਤੀਆਂ ਗਈਆਂ ਹਨ ਜਿਨ੍ਹਾਂ ਦੇ ਨਤੀਜੇ ਇਹ ਦਰਸ਼ਾਉਂਦੇ ਹਨ ਕਿ ਇਹ ਟੀਕਾ ਕੋਵਿਡ-19 ਦੇ ਗੰਭੀਰ ਲੱਛਣਾਂ ਤੋਂ ਬਚਾਅ ਲਈ ਅਸਰਦਾਰ ਅਤੇ ਸੁਰੱਖਿਅਤ ਹੈ।
ਯਾਦ ਰਹੇ ਕਿ ਇਸ ਟੀਕੇ ਦੀ ਵਰਤੋਂ ਤੋਂ ਬਾਅਦ ਬਲੱਡ ਕਲੌਟ ਦੇ ਕੁਝ ਮਾਮਲੇ ਸਾਹਮਣੇ ਆਉਣ ਕਾਰਨ ਯੂਰਪ ਦੇ ਕਈ ਦੇਸ਼ਾਂ ਵੱਲੋਂ ਇਸ ਉੱਤੇ ਪਾਬੰਦੀ ਲਾਈ ਗਈ ਹੈ ਅਤੇ ਹੁਣ ਇਸ ਸੂਚੀ ਵਿਚ ਸਵੀਡਨ ਦਾ ਨਾਂ ਵੀ ਸ਼ਾਮਲ ਹੋ ਗਿਆ ਹੈ।
ਯੂਰਪੀਅਨ ਮੈਡੀਸਨ ਏਜੰਸੀ ਵੱਲੋਂ ਜਾਰੀ ਕੀਤੇ ਗਏ ਬਿਆਨ ਮੁਤਾਬਕ ਇਸ ਗੱਲ ਦਾ ਕੋਈ ਸਬੂਤ ਨਹੀਂ ਹੈ ਕਿ ਔਕਸਫਰਡ-ਐਸਟ੍ਰਾਜ਼ੈਨਕਾ ਦੀ ਵੈਕਸੀਨ ਨਾਲ ਬਲੱਡ ਕਲੌਟ ਹੁੰਦੇ ਹਨ ਅਤੇ ਈ.ਐਮ.ਏ. ਅਨੁਸਾਰ ਇਸ ਵੈਕਸੀਨ ਦੇ ਫਾਇਦੇ ਇਸ ਦੇ ਨੁਕਸਾਨ ਨਾਲੋਂ ਕਿਤੇ ਵੱਧ ਹਨ।
