ਨੈਨਾਈਮੋ ਵਿਚ $24,000 ਦਾ ਫਰੌਡ ਆਇਆ ਸਾਹਮਣੇ, ਲੋਕਾਂ ਨੂੰ ਜਾਰੀ ਕੀਤੀ ਗਈ ਚਿਤਾਵਨੀ

ਨੈਨਾਈਮੋ ਵਿਚ ਰਾਇਲ ਬੈਂਕ ਔਫ ਕੈਨੇਡਾ ਦੇ ਨਾਮ 'ਤੇ ਲਗਭਗ $24,000 ਦਾ ਫਰੌਡ ਸਾਹਮਣੇ ਆਇਆ ਹੈ, ਪੁਲਿਸ ਮੁਤਾਬਕ,ਘਪਲੇਬਾਜ਼ਾਂ ਵਲੋਂ ਬੈਂਕ ਅਧਿਕਾਰੀ ਬਣ ਕੇ ਲੋਕਾਂ ਨੂੰ ਟਾਰਗੇਟ ਕੀਤਾ ਜਾ ਰਿਹਾ ਹੈ। ਤਾਜ਼ਾ ਮਾਮਲੇ ਵਿਚ ਪੀੜਤ ਨੂੰ ਬੈਂਕ ਦੇ ਨੰਬਰ ਵਰਗੇ ਦਿਖਣ ਵਾਲੇ ਨੰਬਰਾਂ ਤੋਂ ਕਈ ਫੋਨ ਕਾਲ ਅਤੇ ਟੈਕਸਟ ਆਏ ਸਨ। ਇਸ ਤਕਨੀਕ ਨੂੰ 'Call Spoofing' ਕਿਹਾ ਜਾਂਦਾ ਹੈ, ਜਿਸ ਨਾਲ ਕਾਲਰ ਆਈ.ਡੀ. 'ਤੇ ਬੈਂਕ ਦਾ ਨਾਮ ਦਿਖਾਈ ਦਿੰਦਾ ਹੈ।

ਘਪਲੇਬਾਜ਼ਾਂ ਨੇ ਇਸ ਦੀ ਆੜ ਵਿਚ ਪੀੜਤ ਨੂੰ ਭਰੋਸੇ ਵਿਚ ਲੈ ਕੇ ਉਸ ਦੇ ਫੋਨ 'ਤੇ ਆਏ ਸਕਿਓਰਿਟੀ ਵੈਰੀਫੀਕੇਸ਼ਨ ਕੋਡ ਮੰਗੇ। ਜਿਵੇਂ ਹੀ ਪੀੜਤ ਨੇ ਇਹ ਕੋਡ ਸਾਂਝੇ ਕੀਤੇ ਉਸ ਦੇ ਅਕਾਊਂਟ ਵਿਚੋਂ ਪੈਸੇ ਕੱਢ ਲਏ ਗਏ।

ਪੁਲਿਸ ਜਾਂਚ ਵਿਚ ਸਾਹਮਣੇ ਆਇਆ ਕਿ ਇਹ ਲੈਣ-ਦੇਣ ਕਿਸੇ ਦੂਸਰੇ ਸ਼ਹਿਰ ਦੇ IP ਐਡਰੈੱਸ ਤੋਂ ਕੀਤੇ ਗਏ ਸਨ। ਬੈਂਕ ਨੇ ਸਾਫ਼ ਕੀਤਾ ਹੈ ਕਿ ਉਹਨਾਂ ਵਲੋਂ ਕਦੇ ਵੀ ਫੋਨ,ਟੈਕਸਟ ਜਾਂ ਈ-ਮੇਲ ਰਾਹੀਂ ਗਾਹਕਾਂ ਤੋਂ ਵੈਰੀਫਿਕੇਸ਼ਨ ਕੋਡ ਦੀ ਮੰਗ ਨਹੀਂ ਕੀਤੀ ਜਾਂਦੀ। ਨੈਨਾਈਮੋ ਆਰ.ਸੀ.ਐਮ.ਪੀ. ਦੇ ਕਾਂਸਟੇਬਲ ਗੈਰੀ ਓ’ਬਰਾਇਨ ਨੇ ਕਿਹਾ ਕਿ ਕਾਲਰ ਆਈਡੀ 'ਤੇ ਭਰੋਸਾ ਨਾ ਕਰੋ। ਜੇਕਰ ਕੋਈ ਤੁਹਾਡੇ ਤੋਂ ਕੋਡ ਮੰਗਦਾ ਹੈ, ਤਾਂ ਤੁਰੰਤ ਫੋਨ ਕੱਟ ਦਿਓ।