ਐਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਨੇ ਕੀਤੀ ਪੁਸ਼ਟੀ, ਉਨ੍ਹਾਂ ਦੀ ਪਾਰਟੀ ਬਜਟ ਦਾ ਕਰੇਗੀ ਸਮਰਥਨ

ਐਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਨੇ ਪੁਸ਼ਟੀ ਕਰ ਦਿੱਤੀ ਹੈ ਕਿ ਉਨ੍ਹਾਂ ਦੀ ਪਾਰਟੀ ਬਜਟ ਦਾ ਸਮਰਥਨ ਕਰੇਗੀ। ਪਾਰਲੀਮੈਂਟ ਹਿੱਲ ਵਿਖੇ ਪੱਤਰਕਾਰਾਂ ਨਾਲ ਗੱਲ ਕਰਦੇ ਹੋਏ ਉਨ੍ਹਾਂ ਕਿਹਾ ਕਿ ਉਹ ਬਜਟ ਨੂੰ ਸਪੋਰਟ ਦੇਣ ਜਾ ਰਹੇ ਹਨ ਪਰ ਇਸ ਦੇ ਨਾਲ ਹੀ ਉਨ੍ਹਾਂ ਇਹ ਵੀ ਕਿਹਾ ਕਿ ਜੋ ਮੁੱਦੇ ਉਨ੍ਹਾਂ ਨੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਕੋਲ ਉਠਾਏ ਸਨ ਉਨ੍ਹਾਂ ਤੋਂ ਉਹ ਪਿੱਛੇ ਨਹੀਂ ਹਟਣ ਵਾਲੇ।

ਜਗਮੀਤ ਸਿੰਘ ਨੇ ਖਾਸ ਤੌਰ ’ਤੇ ਵਿਕਲਾਂਗ ਕੈਨੇਡੀਅਨਾਂ ਨੂੰ ਜੁਲਾਈ 2025 ਤੋਂ ਪ੍ਰਤੀ ਮਹੀਨਾ ਦਿੱਤੇ ਜਾਣ ਵਾਲੇ 200 ਡਾਲਰ ਦਾ ਮੁੱਦਾ ਉਠਾਇਆ, ਜਿਸ ਨੂੰ ਐੱਨ. ਡੀ. ਪੀ. ਨੇ ਵਿਕਲਾਂਗ ਕੈਨੇਡੀਅਨਾਂ ਲਈ ਨਾਕਾਫ਼ੀ ਸਪੋਰਟ ਕਰਾਰ ਦਿੱਤਾ ਹੈ।

ਉਥੇ ਹੀ, ਹਾਊਸ ਔਫ ਕੌਮਨਜ਼ ਵਿਚ ਜਗਮੀਤ ਸਿੰਘ ਨੇ ਗ੍ਰੋਸਰੀ ਕੀਮਤਾਂ ਦਾ ਮੁੱਦਾ ਵੀ ਉਠਾਇਆ, ਉਨ੍ਹਾਂ ਟਰੂਡੋ ਨੂੰ ਸੰਬੋਧਨ ਕਰਦੇ ਕਿਹਾ ਕਿ ਲੋਬਲਾ ਨੇ ਆਪਣੇ ਲਾਭ ਵਿਚ 10 ਫੀਸਦੀ ਦਾ ਵਾਧਾ ਦਰਜ ਕੀਤਾ ਹੈ, ਪ੍ਰਧਾਨ ਮੰਤਰੀ ਇਸ ਦਾ ਜਵਾਬ ਦੇਣ ਕਿ ਉਹ ਵੱਡੇ ਗ੍ਰੋਸਰੀ ਸਟੋਰਾਂ ਨੂੰ ਕੈਨੇਡੀਅਨ ਨੂੰ ਕਿਉਂ ਲੁੱਟਣ ਦੇ ਰਹੇ ਹਨ। ਟਰੂਡੋ ਨੇ ਕਿਹਾ ਕਿ ਉਹ ਵੀ ਬਾਕੀਆਂ ਦੀਆਂ ਤਰ੍ਹਾਂ ਕੈਨੇਡੀਅਨ ਲਈ ਚਿੰਤਤ ਹਨ ਅਤੇ ਇਸ ਲਈ ਕਈ ਸਾਰੇ ਕਦਮ ਉਠਾ ਰਹੇ ਹਨ।