14.61C Vancouver 14.61C VancouverFeb 13, 2025 5:38 PM - Connect Newsroom
ਕੈਨੇਡਾ ਵਿਚ ਮਾਰਚ ਵਿਚ ਚੋਣਾਂ ਦਾ ਬਿਗਲ ਵੱਜ ਸਕਦਾ ਹੈ। ਜਗਮੀਤ ਸਿੰਘ ਦੀ ਪਾਰਟੀ ਐਨ.ਡੀ.ਪੀ. ਨੇ ਇੱਕ ਇੰਟਰਨਲ ਮੈਮੋ ਵਿਚ ਉਮੀਦਵਾਰਾਂ ਨੂੰ ਜਲਦ ਫੈਡਰਲ ਚੋਣਾਂ ਲਈ ਤਿਆਰ ਰਹਿਣ ਲਈ ਕਿਹਾ ਹੈ।
ਮੈਮੋ ਵਿਚ ਆਰੋਪ ਲਗਾਇਆ ਗਿਆ ਹੈ ਕਿ ਲਿਬਰਲ - ਟੈਰਿਫ ਸੰਕਟ ਨੂੰ ਰਾਜਨੀਤਿਕ ਮੌਕੇ ਵਿਚ ਬਦਲਣ ਦੀ ਕੋਸ਼ਿਸ਼ ਵਿਚ ਹਨ ਅਤੇ ਜੇ ਮਾਰਕ ਕਾਰਨੀ 9 ਮਾਰਚ ਨੂੰ ਲਿਬਰਲ ਪਾਰਟੀ ਦੇ ਲੀਡਰ ਚੁਣੇ ਜਾਂਦੇ ਹਨ ਤਾਂ ਚੋਣਾਂ ਜਲਦ ਹੋਣੀਆਂ ਸੰਭਵ ਹਨ। ਐਨ.ਡੀ.ਪੀ. ਨੇ ਇੰਟਰਨਲ ਮੈਮੋ ਵਿਚ ਆਪਣੇ ਕਰੀਬ 140 ਨਾਮਜ਼ਦ ਉਮੀਦਵਾਰਾਂ ਨੂੰ ਕਿਹਾ ਹੈ ਕਿ ਉਸ ਨੂੰ ਸੂਤਰਾਂ ਤੋਂ ਪਤਾ ਲੱਗਾ ਹੈ ਕਿ ਕਾਰਨੀ ਦਾ ਲਿਬਰਲ ਪਾਰਟੀ ਦੇ ਲੀਡਰ ਬਣਨ ਤੋਂ ਤੁਰੰਤ ਬਾਅਦ ਚੋਣਾਂ ਕਰਵਾਉਣ ਦਾ ਇਰਾਦਾ ਹੈ।
ਐਨ.ਡੀ.ਪੀ. ਮੁਤਾਬਕ, ਲਿਬਰਲਸ ਦਾ ਮੰਨਣਾ ਹੈ ਕਿ ਉਹ ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਦੀ ਤਰ੍ਹਾਂ ਟੈਰਿਫ ਸੰਕਟ ਨੂੰ ਆਪਣੇ ਲਈ ਰਾਜਨੀਤਿਕ ਲਾਭ ਵਿਚ ਬਦਲ ਸਕਦੇ ਹਨ। ਓਨਟਾਰੀਓ ਵਿਚ ਫੋਰਡ ਵਲੋਂ ਟਰੰਪ ਦੇ ਟੈਰਿਫ ਨਾਲ ਨਜਿੱਠਣ ਦਾ ਹਵਾਲਾ ਦਿੰਦੇ ਹੋਏ ਸਮੇਂ ਤੋਂ ਪਹਿਲਾਂ ਵਿਧਾਨ ਸਭਾ ਚੋਣਾਂ ਕਰਵਾਈਆਂ ਜਾ ਰਹੀਆਂ ਹਨ। ਗੌਰਤਲਬ ਹੈ ਕਿ ਕਾਰਨੀ ਬੈਂਕ ਔਫ ਕੈਨੇਡਾ ਦੇ ਸਾਬਕਾ ਗਵਰਨਰ ਹਨ, ਫਿਲਹਾਲ ਉਹਨਾਂ ਕੋਲ ਹਾਊਸ ਔਫ ਕੌਮਨਜ਼ ਵਿਚ ਸੀਟ ਨਹੀਂ ਹੈ, ਲਿਬਰਲ ਪਾਰਟੀ ਦੇ ਲੀਡਰਸ਼ਿਪ ਮੁਕਾਬਲੇ ਵਿਚ ਉਹਨਾਂ ਦਾ ਮੁੱਖ ਮੁਕਾਬਲਾ 4 ਵਾਰ ਦੀ ਸੰਸਦ ਮੈਂਬਰ ਕ੍ਰਿਸਟੀਆ ਫ੍ਰੀਲੈਂਡ ਨਾਲ ਮੰਨਿਆ ਜਾਂਦਾ ਹੈ।
