14.05C Vancouver 14.05C VancouverDec 23, 2021 10:01 PM - Connect News
ਬੀ.ਸੀ. ਸਰਕਾਰ ਨੇ ਸੂਬੇ 'ਚ ਲਾਗੂ ਕੀਤੀਆਂ ਗਈਆਂ ਨਵੀਆਂ ਪਬੰਦੀਆਂ ਵਿਚਾਲੇ ਨੁਕਸਾਨ ਦਾ ਸਾਹਮਣਾ ਕਰ ਰਹੇ ਵਪਾਰਾਂ ਲਈ ਕੁਝ ਰਾਹਤ ਪ੍ਰਦਾਨ ਕਰਨ ਦਾ ਐਲਾਨ ਕੀਤਾ ਹੈ।
ਸੂਬਾ ਸਰਕਾਰ ਵੱਲੋਂ ਉਨ੍ਹਾਂ ਵਪਾਰਾਂ ਲਈ $10,000 ਦੀ ਇੱਕ ਵਾਰ ਦੀ ਗ੍ਰਾਂਟ ਦਾ ਐਲਾਨ ਕੀਤਾ ਗਿਆ ਹੈ ਜੋ ਕਿ ਨਵੇਂ ਸਿਹਤ ਨਿਰਦੇਸ਼ਾਂ ਵਿਚਾਲੇ ਬੰਦ ਹੋਣ 'ਤੇ ਮਜਬੂਰ ਹੋ ਗਏ ਹਨ।
ਕੋਵਿਡ-19 ਕਲੋਜ਼ਰ ਰਿਲੀਫ ਗ੍ਰਾਂਟ ਦਾ ਲਾਭ ਬਾਰਜ਼, ਨਾਈਟਕਲੱਬਸ, ਜਿੰਮਾਂ, ਫਿਟਨੈਸ ਸੈਂਟਰਾਂ ਅਤੇ ਡਾਂਸ ਸਟੂਡੀਓਸ ਨੂੰ ਮਿਲਣ ਦੀ ਗੱਲ ਆਖੀ ਗਈ ਹੈ।
ਯਾਦ ਰਹੇ ਸੂਬੇ 'ਚ ਇਸੇ ਹਫ਼ਤੇ ਨਵੀਆਂ ਪਬੰਦੀਆਂ ਦਾ ਐਲਾਨ ਕੀਤਾ ਗਿਆ ਹੈ ਜੋ ਕਿ ਅੱਜ ਤੜਕਸਾਰ ਲਾਗੂ ਕਰ ਦਿੱਤੀਆਂ ਗਈਆਂ ਹਨ।
ਇਹ ਪਬੰਦੀਆਂ ਓਮੀਕਰੌਨ ਵੇਰੀਐਂਟ ਦੇ ਵਧਦੇ ਫੈਲਾਅ ਵਿਚਾਲੇ ਐਲਾਨੀਆਂ ਗਈਆਂ ਹਨ।
ਜਿਹੜੇ ਈਵੈਂਟ ਵੈਨਿਊਸ ਹੁਣ ਪਬੰਦੀਆਂ ਵਿਚਾਲੇ ਆਪਰੇਟ ਨਹੀਂ ਕਰ ਸਕਣਗੇ, ਉਨ੍ਹਾਂ ਨੂੰ ਵੀ ਇਹ ਗ੍ਰਾਂਟ ਹਾਸਿਲ ਹੋ ਸਕੇਗੀ।
ਇਸ ਸੰਬੰਧੀ ਜਾਣਕਾਰੀ ਅੱਜ ਸੂਬੇ ਦੇ ਜੌਬਸ ਮੰਤਰੀ ਰਵੀ ਕਾਹਲੋਂ ਨੇ ਦਿੱਤੀ।
ਇਸ ਸੰਬੰਧੀ ਐਪਲੀਕੇਸ਼ਨਾਂ ਜਨਵਰੀ ਤੋਂ ਖੋਲ੍ਹੀਆਂ ਜਾ ਰਹੀਆਂ ਹਨ।
ਸਰਕਾਰ ਦਾ ਕਹਿਣਾ ਹੈ ਕਿ ਅਗਲੇ ਕੁਝ ਹਫਤਿਆਂ ਗ੍ਰਾਂਟ ਵਾਸਤੇ ਅਪਲਾਈ ਕਰਨ ਸੰਬੰਧੀ ਵਧੇਰੇ ਵੇਰਵੇ ਜਾਰੀ ਕੀਤੇ ਜਾਣਗੇ।
ਇਸ ਗ੍ਰਾਂਟ ਦੌਰਾਨ ਲਾਭ ਹਾਸਿਲ ਕਰਨ ਵਾਲੇ ਵਪਾਰਾਂ ਨੂੰ ਕੁੱਲ 1,000 ਤੋਂ 10,000 ਡਾਲਰ ਤਕ ਦੀ ਰਾਸ਼ੀ ਹਾਸਿਲ ਹੋ ਸਕੂਗੀ।
ਕਿੰਨੀ ਰਾਸ਼ੀ ਮਿਲ ਸਕਦੀ ਹੈ, ਇਹ ਮੁੱਖ ਤੌਰ 'ਤੇ ਕਿਸੇ ਵਪਾਰ ਦੀ ਐਂਪਲਾਈਸ ਦੀ ਗਿਣਤੀ 'ਤੇ ਨਿਰਭਰ ਕਰੇਗਾ।
ਸਰਕਾਰ ਦਾ ਕਹਿਣਾ ਹੈ ਕਿ ਇਹ ਗ੍ਰਾਂਟ ਸੂਬੇ 'ਚ ਪਹਿਲਾਂ ਚਲਾਈ ਗਈ 'ਸਰਕਟ ਬ੍ਰੇਕਰ ਰਿਲੀਫ ਗ੍ਰਾਂਟ' ਦੇ ਨਾਲ ਮੇਲ ਖਾਂਦੀ ਹੈ।
ਐਪਲੀਕੇਸ਼ਨਾਂ ਦਾਖਿਲ ਕਰਨ ਦੀ ਪ੍ਰੀਕਿਰਿਆ ਫਰਵਰੀ ਦੇ ਅੰਤ ਤਕ ਜਾਰੀ ਰਹੇਗੀ।
ਸੂਬਾ ਸਰਕਾਰ ਤੇ 'ਸਮਾਲ ਬਿਜਨਸ ਬੀ.ਸੀ.' ਵੱਲੋਂ ਇਸ ਗ੍ਰਾਂਟ 'ਚ ਮਦਦ ਸੰਬੰਧੀ ਇੱਕ ਕਾਲ ਸੈਂਟਰ ਵੀ ਸਥਾਪਿਤ ਕੀਤਾ ਜਾਣਾ ਹੈ।
ਇਹ ਕਾਲ ਸੈਂਟਰ ਜਨਵਰੀ ਦੀ ਸ਼ੁਰੂਆਤ 'ਚ ਸਥਾਪਿਤ ਕਰਨ ਦੀ ਗੱਲ ਆਖੀ ਗਈ ਹੈ।
ਵਪਾਰਾਂ ਵੱਲੋਂ ਗ੍ਰਾਂਟ ਸੰਬੰਧੀ ਸਵਾਲ covid@smallbusinessbc.ca 'ਤੇ ਈਮੇਲ ਕਰਕੇ ਵੀ ਪੁੱਛੇ ਜਾ ਸਕਣਗੇ।
