19.17C Vancouver 19.17C VancouverOct 22, 2020 3:36 PM -
ਕੰਜ਼ਰਵੇਟਿਵ ਲੀਡਰ, ਏਰਿਨ ਓ’ਟੂਲ ਇਸ ਗੱਲ ਤੋਂ ਇਨਕਾਰ ਕਰ ਰਹੇ ਹਨ ਕਿ ਉਨ੍ਹਾਂ ਦੀ ਪਾਰਟੀ ਪਾਰਲੀਮੈਂਟ ਵਿੱਚ ਇੱਕ ਹੋਰ ਵਿਸ਼ਵਾਸ ਮਤੇ ਦੀ ਤਿਆਰੀ ਕਰ ਰਹੀ ਹੈ।
ਬੁੱਧਵਾਰ ਨੂੰ ਕੰਜ਼ਰਵੇਟਿਵ ਮਤੇ ‘ਤੇ ਵਿਸ਼ਵਾਸ ਵੋਟ ਤੋਂ ਬਚਣ ਤੋਂ ਇੱਕ ਦਿਨ ਬਾਅਦ, ਘੱਟ ਗਿਣਤੀ ਲਿਬਰਲ ਸਰਕਾਰ ਅੱਜ ਟੋਰੀ ਪਾਰਟੀ ਵਲੋਂ ਪ੍ਰਸਤਾਵਤ ਇੱਕ ਹੋਰ ਮਤੇ ਦਾ ਸਾਮਣਾ ਕਰੇਗੀ, ਜਿਸ ਸਦਕਾ ਇੱਕ ਵਾਰ ਫਿਰ ਮਹਾਂਮਾਰੀ ਦੌਰਾਨ ‘ਸਨੈਪ ਇਲੈਕਸ਼ਨ’ ਦੀ ਸੰਭਾਵਨਾ ਬਣ ਸਕਦੀ ਹੈ।
ਓ’ਟੂਲ ਮੁਤਾਬਕ ਇਸ ਮਤੇ ਵਿੱਚ ਸਰਕਾਰ ਤੋਂ ਕੋਵਿਡ -19 ਦੇ ਰਾਹਤ ਪ੍ਰੋਗਰਾਮਾਂ ਨਾਲ ਜੁੜੇ ਮੁੱਦਿਆਂ ਦੀ ਪੜਤਾਲ ਦੀ ਮੰਗ ਕੀਤੀ ਜਾ ਰਹੀ ਹੈ।
ਇਹ ਮਤਾ ਅਤੇ ਇਸ ਵਿੱਚ ਦਸਤਾਵੇਜ਼ਾਂ ਦੀ ਮੰਗ ਇੰਨੀ ਵਿਸ਼ਾਲ ਹੈ ਕਿ ਲਿਬਰਲ ਪਾਰਟੀ ਤੋਂ ਇਸ ਬਹਿਸ ਦੀ ਉਮੀਦ ਕੀਤੀ ਜਾ ਰਹੀ ਹੈ ਕਿ ਇਸ ਨਾਲ ਸਰਕਾਰ ਕਮਜ਼ੋਰ ਪੈ ਸਕਦੀ ਹੈ।
ਇਹ ਦਲੀਲ, ਲਿਬਰਲ ਪਾਰਟੀ ਵਲੋਂ ਕੰਜ਼ਰਵੇਟਿਵ ਪਾਰਟੀ ਦੇ ‘ਵੀ’ ਸੰਸਥਾ ਸੰਬੰਧੀ ਮਤੇ ਦੌਰਾਨ ਵੀ ਪੇਸ਼ ਕੀਤੀ ਗਈ ਸੀ।
ਬੁੱਧਵਾਰ ਦੁਪਹਿਰ ਨੂੰ ਲਿਬਰਲ ਸਰਕਾਰ ਐਨ.ਡੀ.ਪੀ. ਅਤੇ ਗ੍ਰੀਨ ਪਾਰਟੀ ਦੇ ਸਮਰਥਨ ਕਾਰਣ ਬੱਚ ਗਈ ਸੀ।
ਓ’ਟੂਲ ਅਨੁਸਾਰ ਭਾਂਵੇ ਉਨ੍ਹਾਂ ਨੂੰ ਸਰਕਾਰ ਉੱਤੇ ਭਰੋਸਾ ਨਹੀਂ ਹੈ ਪਰ ਇਸ ਦਾ ਇਹ ਮਤਲਬ ਨਹੀਂ ਕਿ ਹਰ ਮੁੱਦੇ ਨੂੰ ਵਿਸ਼ਵਾਸ ਮਤੇ ਨਾਲ ਜੋੜਿਆ ਜਾਵੇ।
ਉਨ੍ਹਾਂ ਕਿਹਾ ਕਿ ਜੇ ਲਿਬਰਲ ਸਰਕਾਰ ਰਾਜਨੀਤਕ ਖੇਡ ਖੇਡਣਾ ਚਾਹੁੰਦੀ ਹੈ, ਇਹ ਉਨ੍ਹਾਂ ਦਾ ਫੈਸਲਾ ਹੈ ਪਰ ਕੰਜ਼ਰਵੇਟਿਵ ਪਾਰਟੀ ਦੀ ਦਿਲਚਸਪੀ ਕੋਵਿਡ -19 ਲਈ ਬਿਹਤਰ ਹੱਲ ਪ੍ਰਦਾਨ ਕਰਨ ਵਿੱਚ ਹੈ।
