ਟਰੂਡੋ ਦੀ ਤਾਜ਼ਾ ਕੈਬਿਨਟ ’ਚ ਬੀ.ਸੀ. ਤੋਂ ਇੱਕ ਵੀ ਨਵੇਂ ਚਿਹਰੇ ਨੂੰ ਨਹੀਂ ਮਿਲੀ ਜਗ੍ਹਾ

ਟਰੂਡੋ ਦੀ ਤਾਜ਼ਾ ਕੈਬਿਨਟ ਵਿਚ ਬੀ.ਸੀ. ਤੋਂ ਇੱਕ ਵੀ ਨਵੇਂ ਚਿਹਰੇ ਨੂੰ ਜਗ੍ਹਾ ਨਹੀਂ ਮਿਲੀ ਹੈ। ਪ੍ਰਧਾਨ ਮੰਤਰੀ ਵਲੋਂ ਨਵੇਂ ਮਿਨਿਸਟਰ ਵਿਚ ਓਨਟਾਰੀਓ ਤੋਂ ਰੂਬੀ ਸਹੋਤਾ ਸਮੇਤ ਤਿੰਨ ਸੰਸਦ ਮੈਂਬਰ, ਨਿਊਫਾਊਂਡਲੈਂਡ ਤੇ ਲੈਬਰਾਡੋਰ ਤੋਂ ਇੱਕ ਐਮ.ਪੀ., ਕਿਊਬੈਕ ਤੋਂ ਦੋ, ਮੈਨੀਟੋਬਾ ਅਤੇ ਨੋਵਾ ਸਕੋਸ਼ੀਆ ਤੋਂ ਇੱਕ-ਇੱਕ ਐਮ.ਪੀ. ਨੂੰ ਸ਼ਾਮਲ ਕੀਤਾ ਹੈ।

ਪੰਜਾਬੀ ਮੂਲ ਦੀ ਰੂਬੀ ਸਹੋਤਾ ਨੂੰ ਲੋਕਤੰਤਰੀ ਸੰਸਥਾਵਾਂ ਦਾ ਪੋਰਟਫੋਲੀਓ ਸੌਂਪਿਆ ਗਿਆ ਹੈ, ਨਾਲ ਹੀ ਉਹ ਦੱਖਣੀ ਓਨਟਾਰੀਓ ਲਈ ਫੈਡਰਲ ਆਰਥਿਕ ਵਿਕਾਸ ਏਜੰਸੀ ਦੀ ਜ਼ਿੰਮੇਵਾਰੀ ਵੀ ਸੰਭਾਲਣਗੇ।

ਜਸਟਿਨ ਟਰੂਡੋ ਸਰਕਾਰ ਵਿਚ ਸ਼ਾਮਲ ਹੋਈ ਰੂਬੀ ਸਹੋਤਾ ਬਰੈਂਪਟਨ ਨਾਰਥ ਦੀ ਨੁਮਾਇੰਦਗੀ ਕਰਦੇ ਹਨ।

ਗੌਰਤਲਬ ਹੈ ਕਿ ਪੀ.ਐੱਮ. ਜਸਟਿਨ ਟਰੂਡੋ ਨੇ ਮੰਤਰੀ ਮੰਡਲ ਵਿਚ ਨਵਾਂ ਫੇਰਬਦਲ ਉਸ ਸਮੇਂ ਕੀਤਾ ਹੈ ਜਦੋਂ ਤਿੰਨੋਂ ਪ੍ਰਮੁੱਖ ਵਿਰੋਧੀ ਧਿਰਾਂ ਉਨ੍ਹਾਂ ਦਾ ਅਸਤੀਫਾ ਮੰਗ ਰਹੀਆਂ ਹਨ। ਐੱਨ.ਡੀ.ਪੀ. ਨੇ ਵੀ ਸੰਕਟ ਵਿਚ ਘਿਰੇ ਲਿਬਰਲਸ ਤੋਂ ਕਿਨਾਰਾ ਕਰ ਲਿਆ ਹੈ।