ਜ਼ਿਮਨੀ ਚੋਣ ਤੋਂ ਪਹਿਲਾਂ ਮਾਂਟਰੀਅਲ ’ਚ ਚੋਣ ਪ੍ਰਚਾਰ ਦੇ ਸੰਕੇਤਾਂ ’ਤੇ ਟਰੂਡੋ ਦੀ ਕੋਈ ਫੋਟੋ ਨਹੀਂ

ਮਾਂਟਰੀਅਲ ਏਰੀਏ ਦੀ ਹੌਟ ਸੀਟ ਲਾਸਾਲੇ-ਏਮਾਰਡ ਵਰਡਨ ’ਤੇ 16 ਸਤੰਬਰ ਨੂੰ ਹੋਣ ਵਾਲੀ ਜ਼ਿਮਨੀ ਚੋਣ ਤੋਂ ਪਹਿਲਾਂ ਸਾਰੇ ਉਮੀਦਵਾਰਾਂ ਦੇ ਮੁਹਿੰਮ ਦੇ ਚਿੰਨ ਬੋਰਡ ’ਤੇ ਉਨ੍ਹਾਂ ਦੇ ਨਾਲ ਉਨ੍ਹਾਂ ਦੇ ਪਾਰਟੀ ਲੀਡਰਸ ਦੀਆਂ ਤਸਵੀਰਾਂ ਲੱਗੀਆਂ ਹਨ ਪਰ ਇੱਕ ਚਿਹਰਾ ਜੋ ਗਾਇਬ ਹੈ ਉਹ ਟਰੂਡੋ ਹਨ। ਲਿਬਰਲ ਉਮੀਦਵਾਰ ਲੌਰਾ ਫਲਸਤੀਨੀ ਨਾਲ ਉਨ੍ਹਾਂ ਦੀ ਕਿਸੇ ਵੀ ਪ੍ਰਮੁੱਖ ਚੌਰਾਹੇ, ਗਲੀਆਂ ਜਾਂ ਲੈਂਪਪੋਸਟ ’ਤੇ ਤਸਵੀਰ ਨਹੀਂ ਹੈ।

ਇਹ ਲਿਬਰਲਸ ਲਈ ਵੱਡਾ ਝਟਕਾ ਮੰਨਿਆ ਜਾ ਰਿਹਾ ਹੈ। ਮਾਂਟਰੀਅਲ ਦੇ ਸਾਊਥ ਵੈਸਟ ਹਲਕੇ ਦੀ ਲਾਸਾਲੇ-ਏਮਾਰਡ ਵਰਡਨ ਸੰਸਦੀ ਸੀਟ ਲਿਬਰਲਸ ਦਾ ਗੜ੍ਹ ਰਹੀ ਹੈ ਪਰ ਇਸ ਵਾਰ ਮੁਕਾਬਲਾ ਐੱਨ. ਡੀ. ਪੀ. ਅਤੇ ਬਲਾਕ ਕਿਊਬੇਕੋਇਸ ਵਿਚਕਾਰ ਮੰਨਿਆ ਜਾ ਰਿਹਾ ਹੈ। ਸਾਬਕਾ ਕੈਬਨਿਟ ਮਿਨਿਸਟਰ ਡੇਵਿਡ ਲੈਮੇਟੀ 2015 ਤੋਂ ਇੱਥੋਂ ਐੱਮ.ਪੀ. ਸਨ, ਜਿਨ੍ਹਾਂ ਨੇ ਟਰੂਡੋ ਵਲੋਂ ਉਨ੍ਹਾਂ ਦਾ ਪੋਰਟਫੋਲੀਓ ਬਦਲਣ ਤੋਂ ਬਾਅਦ ਜਨਵਰੀ ਵਿਚ ਅਸਤੀਫਾ ਦੇ ਦਿੱਤਾ ਸੀ, ਇਸ ਕਾਰਨ ਇਹ ਸੀਟ ਖਾਲੀ ਹੋਈ।

ਲਿਬਰਲ ਦੇ ਬੁਲਾਰੇ ਨੇ ਪਾਰਟੀ ਦੀ ਉਮੀਦਵਾਰ ਫਲਸਤੀਨੀ ਨਾਲ ਮੁਹਿੰਮ ਦੇ ਚਿੰਨ ਬੋਰਡ ’ਤੇ ਟਰੂਡੋ ਦੀ ਤਸਵੀਰ ਨਾ ਹੋਣ ਬਾਰੇ ਸਫਾਈ ਦਿੰਦੇ ਕਿਹਾ ਕਿ ਫਲਸਤੀਨੀ ਦੇ ਸਾਰੇ ਮੁਹਿੰਮ ਦੇ ਚਿੰਨ ਦੇ ਥੱਲੇ ਵਿਚ ’ਟੀਮ ਟਰੂਡੋ’ ਪਿ੍ਰੰਟਿਡ ਹੈ ਅਤੇ ਪ੍ਰਧਾਨ ਮੰਤਰੀ ਨੇ ਪਿਛਲੇ ਮਹੀਨੇ ਹਲਕੇ ਦਾ ਦੌਰਾ ਵੀ ਕੀਤਾ ਸੀ। ਗੌਰਤਲਬ ਹੈ ਕਿ ਇਸ ਜ਼ਿਮਨੀ ਚੋਣ ਵਿਚ ਰਿਕਾਰਡ 91 ਉਮੀਦਵਾਰ ਮੈਦਾਨ ਵਿਚ ਹਨ।