9.45C Vancouver 9.45C VancouverNov 23, 2023 5:01 PM - The Canadian Press
ਕੈਨੇਡਾ-ਅਮਰੀਕਾ ਵਿਚਕਾਰ ਰੈਂਬੋ ਬ੍ਰਿਜ ਕਰਾਸਿੰਗ 'ਤੇ ਬੁੱਧਵਾਰ ਵਾਪਰੇ ਹਾਦਸੇ ਮਗਰੋਂ ਦੂਜੇ ਦਿਨ ਸਵੇਰੇ ਵੀ ਇਹ ਕਰਾਸਿੰਗ ਟ੍ਰੈਫਿਕ ਲਈ ਬੰਦ ਸੀ। ਅਮਰੀਕੀ ਜਾਂਚ ਏਜੰਸੀ ਐੱਫਬੀਆਈ ਨੇ ਕਿਹਾ ਕਿ ਨਿਊਯਾਰਕ ਅਤੇ ਓਨਟੇਰੀਓ ਵਿਚਕਾਰ ਪੈਂਦੇ ਰੈਂਬੋ ਬ੍ਰਿਜ ਬਾਰਡਰ 'ਤੇ ਕਾਰ ਹਾਦਸੇ ਮਗਰੋਂ ਹੋਏ ਧਮਾਕੇ ਵਿੱਚ ਕੋਈ ਅੱਤਵਾਦੀ ਸੰਕੇਤ ਨਹੀਂ ਮਿਲਿਆ। ਘਟਨਾ ਵਾਲੀ ਥਾਂ 'ਤੇ ਕੋਈ ਵਿਸਫੋਟਕ ਸਮੱਗਰੀ ਨਹੀਂ ਪਾਈ ਗਈ ਅਤੇ ਟ੍ਰੈਫਿਕ ਜਾਂਚ ਦੇ ਰੂਪ ਵਿੱਚ ਮਾਮਲਾ ਨਿਆਗਰਾ ਫਾਲਜ਼ ਪੁਲਿਸ ਵਿਭਾਗ ਨੂੰ ਸੌਂਪ ਦਿੱਤਾ ਗਿਆ ਹੈ।
ਫੈਡਰਲ ਪਬਲਿਕ ਸੇਫਟੀ ਮੰਤਰੀ ਡੋਮਿਨਿਕ ਲੇਬਲੈਂਕ ਦਾ ਕਹਿਣਾ ਹੈ ਕਿ ਕੈਨੇਡਾ ਅਤੇ ਅਮਰੀਕਾ ਦੋਵੇਂ ਹਿੰਸਕ ਹਾਲਾਤ ਨੂੰ ਬਹੁਤ ਗੰਭੀਰਤਾ ਨਾਲ ਲੈ ਰਹੇ ਹਨ । ਨਿਊਯਾਰਕ ਦੀ ਗਵਰਨਰ ਕੈਥੀ ਹੋਕੋ ਨੇ ਜ਼ੋਰ ਦੇ ਕੇ ਕਿਹਾ ਕਿ ਇਹ ਇੱਕ ਹਾਦਸਾ ਸੀ ਨਾ ਕਿ ਅੱਤਵਾਦੀ ਹਮਲਾ।
ਅਮਰੀਕਾ ਵੱਲੋਂ ਜਾਰੀ ਵੀਡੀਓ ਵਿੱਚ ਕਾਰ ਤੇਜ਼ ਰਫ਼ਤਾਰ ਨਾਲ ਅਮਰੀਕੀ ਪਾਸੇ ਦੀ ਸਰਹੱਦ ਦੇ ਚੌਕੀ ਨਾਲ ਟਕਰਾਈ ਦੇਖੀ ਜਾ ਸਕਦੀ ਹੈ। ਇਸ ਵਿੱਚ ਦੋ ਲੋਕਾਂ ਦੀ ਮੌਤ ਹੋਈ, ਜਿਨ੍ਹਾਂ ਦੀ ਪਛਾਣ ਫਿਲਹਾਲ ਜਾਰੀ ਨਹੀਂ ਕੀਤੀ ਗਈ ਪਰ ਜਾਂਚ ਬਾਰੇ ਜਾਣਕਾਰੀ ਦੇਣ ਵਾਲੇ ਇੱਕ ਵਿਅਕਤੀ ਨੇ ਦੱਸਿਆ ਕਿ ਉਹ ਪਤੀ-ਪਤਨੀ ਸਨ।
ਇਹ ਹਾਦਸਾ ਅਮਰੀਕੀ ਥੈਂਕਸਗਿਵਿੰਗ ਛੁੱਟੀ ਦੀ ਪੂਰਵ ਸੰਧਿਆ ਮੌਕੇ ਵਾਪਰਿਆ ਜਿਸ ਦੇ ਚੱਲਦੇ ਨਿਆਗਰਾ ਖੇਤਰ ਵਿੱਚ ਚਾਰੇ ਬਾਰਡਰ ਕਰਾਸਿੰਗ ਨੂੰ ਬੰਦ ਕਰਨਾ ਪਿਆ।
