ਮਾਂਟਰੀਅਲ ਨੇੜੇ ਉਸਾਰੀ ਅਧੀਨ ਜਗ੍ਹਾ ਦਾ ਢਾਂਚਾ ਢਹਿਣ ਨਾਲ ਇੱਕ ਵਰਕਰ ਦੀ ਮੌਤ

ਮਾਂਟਰੀਅਲ ਨੇੜੇ ਅੱਜ ਇੱਕ ਉਸਾਰੀ ਵਾਲੀ ਥਾਂ ਦਾ ਢਾਂਚਾ ਢਹਿਣ ਨਾਲ ਇੱਕ ਵਰਕਰ ਦੀ ਮੌਤ ਹੋ ਗਈ ਅਤੇ ਦੋ ਹੋਰ ਲੋਕ ਜ਼ਖਮੀ ਹੋ ਗਏ। ਇਹ ਘਟਨਾ ਸਵੇਰ ਸਮੇਂ ਬਲੇਨਵਿਲ ਵਿਚ ਵਾਪਰੀ, ਜਿਥੇ ਇੱਕ ਵਪਾਰਕ ਬਿਲਡਿੰਗ ਦਾ ਨਿਰਮਾਣ ਚੱਲ ਰਿਹਾ ਸੀ। ਘੱਟੋ-ਘੱਟ ਇੱਕ ਮਜ਼ਦੂਰ ਅਜੇ ਵੀ ਮਲਬੇ ਹੇਠ ਫਸਿਆ ਦੱਸਿਆ ਜਾਂਦਾ ਹੈ।

ਅਧਿਕਾਰੀਆਂ ਮੁਤਾਬਕ, ਸਵੇਰੇ 11 ਵਜੇ ਦੇ ਕਰੀਬ 911 'ਤੇ ਘਟਨਾ ਦੀ ਸੂਚਨਾ ਮਿਲੀ। ਜਦੋਂ ਉਸਾਰੀ ਵਾਲੀ ਥਾਂ ਦਾ ਢਾਂਚਾ ਟੁੱਟਾ ਤਾਂ ਤਿੰਨ ਕਾਰਾਂ ਅਤੇ ਇੱਕ ਟ੍ਰੇਲਰ ਟੋਏ ਵਿਚ ਜਾ ਡਿੱਗੇ। ਜ਼ਖਮੀਆਂ ਵਿਚ ਇੱਕ ਔਰਤ ਵੀ ਸੀ।

ਬਲੇਨਵਿਲ ਪੁਲਿਸ ਨੇ ਕਿਹਾ ਕਿ ਫਾਇਰਫਾਈਟਰਜ਼ ਅਜੇ ਵੀ ਜ਼ਮੀਨ ਨੂੰ ਸਥਿਰ ਕਰਨ ਲਈ ਕੰਮ ਕਰ ਰਹੇ ਹਨ ਤਾਂ ਜੋ ਟੋਏ ਵਿਚ ਜਾਣਾ ਅਤੇ ਜਾਂਚ ਜਾਰੀ ਰੱਖਣਾ ਸੇਫ ਹੋ ਸਕੇ। ਕਿਊਬੈਕ ਦੇ ਲੇਬਰ ਮੰਤਰੀ ਜੀਨ ਬੌਲੇਟ ਨੇ ਇਸ ਘਟਨਾ ਵਿਚ ਜਾਨ ਗੁਆਉਣ ਵਾਲੇ ਵਰਕਰ ਦੇ ਪਰਿਵਾਰ ਨਾਲ ਹਮਦਰਦੀ ਪ੍ਰਗਟ ਕੀਤੀ ਹੈ। ਉਥੇ ਹੀ, ਵਰਕ ਪਲੇਸ ਸੇਫਟੀ ਬੋਰਡ ਨੇ ਵੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।