ਜਸਟਿਨ ਟਰੂਡੋ ਨੂੰ ਆਨਲਾਈਨ ਵੀਡੀਓ ਵਿਚ ਹਿੰਸਕ ਧਮਕੀਆਂ ਦੇਣ ਦੇ ਦੋਸ਼ ਵਿਚ ਇਕ ਵਿਅਕਤੀ ਨੂੰ ਕੀਤਾ ਗ੍ਰਿਫਤਾਰ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਇੱਕ ਆਨਲਾਈਨ ਵੀਡੀਓ ਵਿਚ ਹਿੰਸਕ ਧਮਕੀਆਂ ਦੇਣ ਦੇ ਦੋਸ਼ ਵਿਚ ਆਰ.ਸੀ.ਐੱਮ.ਪੀ. ਨੇ ਗ੍ਰੇਟਰ ਟੋਰੌਂਟੋ ਏਰੀਏ ਤੋਂ ਇੱਕ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਹੈ। ਆਰ.ਸੀ.ਐੱਮ.ਪੀ. ਦੀ ਰਾਸ਼ਟਰੀ ਸੁਰੱਖਿਆ ਇਨਫੋਰਸਮੈਂਟ ਟੀਮ ਨੇ ਇਹ ਕਾਰਵਾਈ ਯਾਰਕ ਰਿਜਲਨਲ ਪੁਲਿਸ ਦੀ ਮਦਦ ਨਾਲ ਕੀਤੀ।

ਆਰ.ਸੀ.ਐੱਮ.ਪੀ ਮੁਤਾਬਕ, ਸ਼ੱਕੀ ਦੀ ਪਛਾਣ 33 ਸਾਲਾ ਡੇਵਿਡ ਜਾਲੇਵਸਕੀ ਦੇ ਰੂਪ ਵਿਚ ਕੀਤੀ ਗਈ, ਜਿਸ ਦਾ ਕੋਈ ਨਿਸ਼ਚਿਤ ਪਤਾ ਨਹੀਂ ਹੈ। ਜਾਲੇਵਸਕੀ ’ਤੇ ਧਮਕੀ ਦੇਣ ਦੇ ਦੋ ਮਾਮਲਿਆਂ ਵਿਚ ਆਰੋਪ ਲਗਾਏ ਗਏ ਹਨ।

ਆਰ.ਸੀ.ਐੱਮ.ਪੀ. ਨੇ ਇੱਕ ਸਟੇਟਮੈਂਟ ਵਿਚ ਦੱਸਿਆ ਕਿ ਜਾਲੇਵਸਕੀ ਨੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ, ਪੁਲਿਸ ਅਤੇ ਸੁਰੱਖਿਆ ਕਰਮਚਾਰੀਆਂ ਨੂੰ ਹਿੰਸਕ ਧਮਕੀਆਂ ਦਿੰਦੇ ਹੋਏ ਆਨਲਾਈਨ ਵੀਡੀਓ ਪੋਸਟ ਕੀਤਾ ਸੀ, ਜਿਸ ਦੀ ਜਾਣਕਾਰੀ ਮਿਲਦੇ ਹੀ ਆਰ.ਸੀ.ਐੱਮ.ਪੀ. ਦੀ ਰਾਸ਼ਟਰੀ ਸੁਰੱਖਿਆ ਇਨਫੋਰਸਮੈਂਟ ਟੀਮ ਨੇ ਜਾਂਚ ਸ਼ੁਰੂ ਕੀਤੀ ਅਤੇ ਉਸ ਤੱਕ ਪਹੁੰਚ ਲਈ ਯੌਰਕ ਪੁਲਿਸ ਦੀ ਮਦਦ ਲਈ ਗਈ।

ਗੌਰਤਲਬ ਹੈ ਕਿ ਟਰੂਡੋ ਨੂੰ ਔਨਲਾਈਨ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦੇਣ ਦੇ ਮਾਮਲੇ ਪਹਿਲਾਂ ਵੀ ਸਾਹਮਣੇ ਆ ਚੁੱਕੇ ਹਨ। 6 ਜੂਨ ਨੂੰ ਕੈਲਗਰੀ ਨਿਵਾਸੀ 23 ਸਾਲਾ ਮੇਸਨ ਜੌਨ ਬੇਕਰ ਅਤੇ 13 ਜੂਨ ਨੂੰ ਐਡਮਿੰਟਨ ਨਿਵਾਸੀ 67 ਸਾਲਾ ਗੈਰੀ ਬੇਲਜ਼ੇਵਿਕ ’ਤੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦੇਣ ਦੇ ਮਾਮਲੇ ਵਿਚ ਚਾਰਜਿਜ਼ ਲਗਾਏ ਗਏ ਸਨ।