17.94C Vancouver 17.94C VancouverDec 30, 2020 9:29 PM -
ਔਂਟੈਰੀਓ ਦੇ ਪ੍ਰੀਮਿਅਰ ਡਗ ਫੋਰਡ ਨੇ ਸੂਬੇ ਦੇ ਵਿੱਤ ਮੰਤਰੀ ਰੌਡ ਫਿਲਿਪਸ ਬਾਰੇ ਚੁੱਪੀ ਤੋੜੀ ਹੈ।
ਉਨ੍ਹਾਂ ਸਖਤ ਰਵਈਆ ਅਖਤਿਆਰ ਕਰਦਿਆਂ, ਵਿੱਤ ਮੰਤਰੀ ਦੇ ਪੈਂਡੇਮਿਕ ਵਿਚਾਲੇ ਦੇਸ਼ ਤੋਂ ਬਾਹਰ ਛੁੱਟੀ 'ਤੇ ਜਾਣ ਦੇ ਫੈਸਲੇ ਦੀ ਸਖਤ ਆਲੋਚਨਾ ਕੀਤੀ ਹੈ।
ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਪਹਿਲਾਂ ਹੀ ਪਤਾ ਸੀ ਕਿ ਰੌਡ ਫਿਲਿਪਸ ਦੇਸ਼ ਤੋਂ ਬਾਹਰ ਹਨ। ਉਨ੍ਹਾਂ ਕਿਹਾ ਕਿ "ਮੈਨੂੰ ਉਸੇ ਮੌਕੇ ਫਿਲਿਪਸ ਨੂੰ ਦੇਸ਼ ਪਰਤਣ ਨੂੰ ਕਹਿਣਾ ਚਾਹੀਦਾ ਸੀ, ਪਰ ਮੈਂ ਅਜਿਹਾ ਨਹੀਂ ਕੀਤਾ।"
ਡਗ ਫੋਰਡ ਨੇ ਕਿਹਾ ਕਿ ਉਨ੍ਹਾਂ ਦੀ ਕੱਲ ਫਿਰ ਤੋਂ ਫਿਲਿਪਸ ਨਾਲ ਗੱਲ ਹੋਈ ਹੈ ਅਤੇ ਉਨ੍ਹਾਂ ਨੂੰ ਦੇਸ਼ ਪਰਤਣ ਨੂੰ ਕਿਹਾ ਹੈ।
ਯਾਦ ਰਹੇ ਅੱਜ ਰੌਡ ਫਿਲਿਪਸ ਨੇ ਕਰੇਬੀਅਨ 'ਚ ਆਪਣੇ ਛੁੱਟੀ ਮਨਾਉਣ ਦੇ ਫੈਸਲੇ ਨੂੰ ਗਲਤ ਦੱਸਿਆ ਹੈ ਅਤੇ ਅਜਿਹਾ ਕਰਨ ਲਈ ਮੁਆਫੀ ਮੰਗੀ ਹੈ।
ਵਿਰੋਧੀ ਧਿਰ ਦੀ ਲੀਡਰ ਨੇ ਵਿੱਤ ਮੰਤਰੀ ਨੂੰ ਹਟਾਉਣ ਦੀ ਕੀਤੀ ਮੰਗ
ਔਂਟੈਰੀਓ 'ਚ ਵਿਰੋਧੀ ਧਿਰ ਦੀ ਲੀਡਰ, ਆਂਡਰਿਆ ਹੋਰਵਾਥ ਦਾ ਕਹਿਣਾ ਹੈ ਕਿ ਸੂਬੇ ਦੇ ਵਿੱਤ ਮੰਤਰੀ ਰੌਡ ਫਿਲਿਪਸ ਨੂੰ ਅਹੁਦੇ ਤੋਂ ਹਟਾਇਆ ਜਾਣਾ ਚਾਹੀਦਾ ਹੈ।
ਫਿਲਿਪਸ ਨੇ ਕੱਲ ਖੁਲਾਸਾ ਕੀਤਾ ਸੀ ਕਿ ਉਹ 13 ਦਿਸੰਬਰ ਤੋਂ ਸੇਂਟ ਬਾਰਟਸ ਵਿੱਚ ਛੁੱਟੀ ਮਨ ਰਹੇ ਹਨ।
ਹੋਰਵਾਥ ਦਾ ਕਹਿਣਾ ਹੈ ਕਿ ਵਿੱਤ ਮੰਤਰੀ ਨੇ ਆਪਣੀ ਹੀ ਸਰਕਾਰ ਦੇ ਪਬਲਿਕ ਹੈਲਥ ਨਿਰਦੇਸ਼ਾਂ ਦੀ ਅਣਦੇਖੀ ਕੀਤੀ ਹੈ।
ਉਨ੍ਹਾਂ ਕਿਹਾ ਕਿ ਇਹ ਮੰਨਣਾ ਮੁਸ਼ਕਿਲ ਹੈ ਕਿ ਪੈਂਡੇਮਿਕ ਦੇ ਵਧਦੇ ਮਾਮਲਿਆਂ ਵਿਚਾਲੇ ਵਿੱਤ ਮੰਤਰੀ ਨੇ ਪ੍ਰੀਮਿਅਰ ਨੂੰ ਬਿਨਾ ਦੱਸੇ, ਦੇਸ਼ ਤੋਂ ਬਾਹਰ ਛੁੱਟੀ 'ਤੇ ਜਾਣ ਦਾ ਫੈਸਲਾ ਲੈ ਲਿਆ।
