15.14C Vancouver 15.14C VancouverJul 23, 2026 3:49 PM - Connect Newsroom -Pervez Sandhu
ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਨੇ ਪ੍ਰੋਜੈਕਟ ਬੇਅ ਤਹਿਤ ਇੱਕ ਸਰਹੱਦ ਪਾਰ ਜਾਂਚ ਵਿਚ ਸਰਹੱਦ ਰਾਹੀਂ ਹੋ ਰਹੀ ਡਰੱਗ ਤਸਕਰੀ ਦਾ ਪਰਦਾਫਾਸ਼ ਕਰਦਿਆਂ 1.7 ਟਨ ਤੋਂ ਵੱਧ ਗੈਰ-ਕਾਨੂੰਨੀ ਨਸ਼ੀਲੇ ਪਦਾਰਥ ਜ਼ਬਤ ਕੀਤੇ ਹਨ। ਇਨ੍ਹਾਂ ਦੀ ਅੰਦਾਜ਼ਨ ਸਟ੍ਰੀਟ ਵੈਲਿਊ $139 ਮਿਲੀਅਨ ਤੋਂ ਵੱਧ ਦੱਸੀ ਗਈ ਹੈ। ਇਸ ਮਾਮਲੇ ਵਿਚ ਕੁੱਲ 21 ਲੋਕ ਨਾਮਜ਼ਦ ਕੀਤੇ ਗਏ ਹਨ, ਜਿਨ੍ਹਾਂ ਵਿਚੋਂ 19 ਨੂੰ ਗ੍ਰਿਫ਼ਤਾਰ ਕੀਤਾ ਜਾ ਚੁੱਕਾ ਹੈ।
ਦੋ ਮੁਲਜ਼ਮ ਫਰਾਰ ਹਨ, ਜਿਨ੍ਹਾਂ ਖਿਲਾਫ ਵਾਰੰਟ ਜਾਰੀ ਹਨ। ਇਨ੍ਹਾਂ ਵਿਚੋਂ 14 ਸ਼ੱਕੀ ਪੰਜਾਬੀ ਹਨ ਅਤੇ ਬਹੁਤੇ ਬਰੈਂਪਟਨ ਦੇ ਰਹਿਣ ਵਾਲੇ ਹਨ, ਜਿਨ੍ਹਾਂ ਵਿਚ ਗਗਨਦੀਪ ਥਿੰਦਲ, ਸਿਮਰਨਜੀਤ ਸਿੰਘ, ਅਤੇ ਤਰਮਿੰਦਰ ਸਿੰਘ ਸ਼ਾਮਲ ਹਨ, ਜੋ ਕੋਕੇਨ, ਹੈਰੋਇਨ ਅਤੇ ਅਫ਼ੀਮ ਦੀ ਤਸਕਰੀ ਸਮੇਤ ਗੈਰ-ਕਾਨੂੰਨੀ ਹਥਿਆਰ ਰੱਖਣ ਦੇ ਗੰਭੀਰ ਦੋਸ਼ਾਂ ਤਹਿਤ ਹਿਰਾਸਤ ਵਿਚ ਹਨ। ਬਰੈਂਪਟਨ ਦੇ ਹੀ ਹੋਰ ਮੁਲਜ਼ਮਾਂ ਵਿਚ ਜਤਿੰਦਰਪਾਲ ਸਿੰਘ , ਜਸਵਿੰਦਰ ਸੋਹੀ ਅਤੇ ਤੇਜਵਿੰਦਰ ਸੰਧੂ ਕੋਕੇਨ ਇੰਪੋਰਟ ਕਰਨ ਦੀ ਸਾਜ਼ਿਸ਼ ਦੇ ਦੋਸ਼ਾਂ ਹੇਠ ਜ਼ਮਾਨਤ 'ਤੇ ਹਨ।
ਇਸ ਤੋਂ ਇਲਾਵਾ ਬਰੈਂਪਟਨ ਦੇ ਗੁਨਦੀਪ ਧਾਰੀਵਾਲ, ਮਹਿਕਪ੍ਰੀਤ ਸਿੰਘ ਅਤੇ ਕਰਨਦੀਪ ਸਿੰਘ 'ਤੇ ਵੀ ਨਸ਼ਾ ਤਸਕਰੀ ਦੇ ਦੋਸ਼ ਹਨ। ਬਰੈਂਪਟਨ ਤੋਂ ਬਾਹਰ ਦੇ ਇਲਾਕਿਆਂ ਵਿਚ LaSalle ਤੋਂ ਕੰਵਰਪਾਲ ਕੁਲਾਰ, Kitchener ਤੋਂ ਹਰਜਵਿੰਦਰ ਸੰਧੂ, Barrie ਤੋਂ ਹਨਿੰਦਰਪਾਲ ਗਰੇਵਾਲ ਅਤੇ ਸ਼ੈਲਬਰਨ ਤੋਂ ਅਵਤਾਰ ਸਹੋਤਾ ਦੇ ਨਾਮ ਇਸ ਕੇਸ ਵਿਚ ਦਰਜ ਹਨ, ਜੋ ਫਿਲਹਾਲ ਜ਼ਮਾਨਤ 'ਤੇ ਬਾਹਰ ਹਨ ਅਤੇ ਆਉਣ ਵਾਲੇ ਅਗਸਤ ਅਤੇ ਸਤੰਬਰ ਮਹੀਨਿਆਂ ਵਿਚ ਟੋਰੌਂਟੋ ਅਤੇ ਸਾਰਨੀਆ ਦੀਆਂ ਅਦਾਲਤਾਂ ਵਿਚ ਪੇਸ਼ ਹੋਣਗੇ।
