ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਨੂੰ ਜਾਰੀ ਕੀਤੇ ਜਾਣ ਵਾਲੇ ਸਟੱਡੀ ਪਰਮਿਟ ਵਿਚ ਕੀਤੀ ਗਈ ਹੋਰ ਕਟੌਤੀ

ਕੈਨੇਡਾ ਨੇ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਨੂੰ ਜਾਰੀ ਕੀਤੇ ਜਾਣ ਵਾਲੇ ਸਟੱਡੀ ਪਰਮਿਟ ਵਿਚ ਹੋਰ ਕਟੌਤੀ ਕਰ ਦਿੱਤੀ ਹੈ। ਇਮੀਗ੍ਰੇਸ਼ਨ ਮਿਨਿਸਟਰ ਮਾਰਕ ਮਿਲਰ ਨੇ ਬੁੱਧਵਾਰ ਨੂੰ ਕੀਤੀ ਗਈ ਘੋਸ਼ਣਾ ਵਿਚ ਕਿਹਾ ਕਿ 2025 ਲਈ ਸਟੱਡੀ ਪਰਮਿਟ ਦੀ ਗਿਣਤੀ ਮੌਜੂਦਾ ਸਾਲ ਦੇ 485,000 ਪਰਮਿਟ ਤੋਂ 10 ਫੀਸਦੀ ਘਟਾ ਕੇ 437,000 ਪਰਮਿਟ ਕੀਤੀ ਜਾ ਰਹੀ ਹੈ ਅਤੇ 2026 ਤੱਕ ਸਟੱਡੀ ਪਰਮਿਟ ਦੀ ਦਰ ਇਸੇ ਪੱਧਰ ’ਤੇ ਰਹੇਗੀ।

ਇਸ ਦੇ ਨਾਲ ਹੀ ਇੰਟਰਨੈਸ਼ਨਲ ਸਟੂਡੈਂਟਸ ਦੇ ਜੀਵਨ ਸਾਥੀਆਂ ਲਈ ਓਪਨ ਵਰਕ ਪਰਮਿਟ ਦੀ ਵੀ ਸਖ਼ਤੀ ਕਰ ਦਿੱਤੀ ਹੈ। ਹੁਣ ਮਾਸਟਰ ਡਿਗਰੀ ਸਟੂਡੈਂਟ ਦੇ ਜੀਵਨ ਸਾਥੀ ਲਈ ਵਰਕ ਪਰਿਮਟ ਦੀ ਪਾਤਰਤਾ ਸਿਰਫ ਉਨ੍ਹਾਂ ਸਟੂਡੈਂਟਸ ਤੱਕ ਸੀਮਤ ਹੋਵੇਗੀ ਜਿਨ੍ਹਾਂ ਦਾ ਪ੍ਰੋਗਰਾਮ ਘੱਟੋ-ਘੱਟ 16 ਮਹੀਨਿਆਂ ਤੱਕ ਦਾ ਹੈ।

ਇਸੇ ਤਰ੍ਹਾਂ ਵਿਦੇਸ਼ ਕਾਮਿਆਂ ਦੇ ਜੀਵਨ ਸਾਥੀ ਦੇ ਮਾਮਲੇ ਵਿਚ ਵੀ ਵਰਕ ਪਰਮਿਟ ਨੂੰ ਪ੍ਰਬੰਧਨ, ਪੇਸ਼ੇਵਰ ਕਿੱਤੇ ਅਤੇ ਮਜ਼ਦੂਰੀ ਦੀ ਘਾਟ ਵਾਲੇ ਸੈਕਟਰਸ ਤੱਕ ਸੀਮਤ ਕਰ ਦਿੱਤਾ ਗਿਆ ਹੈ।