ਔਟਵਾ ਨੇ ਨੋਵਾ ਸਕੋਸ਼ੀਆ 'ਚ ਸੈਟੇਲਾਈਟ ਲਾਂਚ ਪੈਡ ਲਈ $200 ਮਿਲੀਅਨ ਦੇਣ ਦਾ ਕੀਤਾ ਐਲਾਨ

ਕੈਨੇਡਾ ਹੁਣ ਪੁਲਾੜ ਦੇ ਖੇਤਰ ਵਿਚ ਆਤਮ-ਨਿਰਭਰ ਹੋਣ ਵੱਲ ਇੱਕ ਵੱਡੀ ਪੁਲਾਂਘ ਪੁੱਟਣ ਜਾ ਰਿਹਾ ਹੈ। ਫੈਡਰਲ ਸਰਕਾਰ ਨੇ ਪੁਲਾੜ ਲਾਂਚ ਪੈਡ ਲਈ $200 ਮਿਲੀਅਨ ਦੇ ਨਿਵੇਸ਼ ਦਾ ਐਲਾਨ ਕੀਤਾ ਹੈ, ਜਿਸ ਰਾਹੀਂ ਕੈਨੇਡਾ ਆਪਣੇ ਸੈਟੇਲਾਈਟ ਖੁਦ ਪੁਲਾੜ ਵਿਚ ਭੇਜ ਸਕੇਗਾ। ਡਿਫੈਂਸ ਮਿਨਿਸਟਰ ਡੇਵਿਡ ਮੈਕਗਿੰਟੀ ਨੇ ਅੱਜ ਔਟਵਾ ਵਿਚ ਕੈਨੇਡੀਅਨ ਸਪੇਸ ਏਜੰਸੀ ਲੈਬ ਵਿਚ ਇਸ ਪ੍ਰੋਜੈਕਟ ਦਾ ਐਲਾਨ ਕੀਤਾ।

ਸਰਕਾਰ ਇਨ੍ਹਾਂ ਫੰਡਾਂ ਦੀ ਵਰਤੋਂ ਅਗਲੇ ਦਹਾਕੇ ਦੌਰਾਨ ਨੋਵਾ ਸਕੋਸ਼ੀਆ ਦੇ ਕੈਨਸੋ ਨੇੜੇ ਪੁਲਾੜ ਲਾਂਚ ਪੈਡ ਸਥਾਪਿਤ ਕਰਨ ਲਈ ਕਰੇਗੀ, ਜੋ ਭਵਿੱਖ ਵਿਚ ਦੇਸ਼ ਦੇ ਸਪੇਸਪੋਰਟ ਵਜੋਂ ਕੰਮ ਕਰੇਗਾ। ਵਰਤਮਾਨ ਵਿਚ ਕੈਨੇਡਾ ਕੋਲ ਆਪਣਾ ਕੋਈ ਲੌਂਚ ਸਿਸਟਮ ਨਹੀਂ ਹੈ ਅਤੇ ਆਪਣੇ ਸੈਟੇਲਾਈਟਸ ਨੂੰ ਪੁਲਾੜ ਵਿਚ ਭੇਜਣ ਲਈ ਪੂਰੀ ਤਰ੍ਹਾਂ ਅਮਰੀਕਾ 'ਤੇ ਨਿਰਭਰ ਹੈ। ਇਹ ਪਹਿਲਕਦਮੀ ਲਿਬਰਲ ਸਰਕਾਰ ਦੀ ਉਸ ਨਵੀਂ ਰਣਨੀਤੀ ਦਾ ਹਿੱਸਾ ਹੈ,ਜਿਸ ਤਹਿਤ ਘਰੇਲੂ ਰੱਖਿਆ ਉਦਯੋਗ ਨੂੰ ਮਜ਼ਬੂਤ ਕੀਤਾ ਜਾ ਰਿਹਾ ਹੈ।

ਜ਼ਿਕਰਯੋਗ ਹੈ ਕਿ ਸਾਲ 2025 ਦੇ ਬਜਟ ਵਿਚ ਇਸ ਕੰਮ ਲਈ ਪਹਿਲਾਂ ਹੀ $183 ਮਿਲੀਅਨ ਰਾਖਵੇਂ ਰੱਖੇ ਗਏ ਸਨ। ਇਸ ਪ੍ਰੋਜੈਕਟ ਨਾਲ ਕੈਨੇਡਾ ਵਿਸ਼ਵ ਦੇ ਉਨ੍ਹਾਂ ਚੋਣਵੇਂ ਦੇਸ਼ਾਂ ਦੀ ਸੂਚੀ ਵਿਚ ਸ਼ਾਮਲ ਹੋਵੇਗਾ,ਜਿਨ੍ਹਾਂ ਕੋਲ ਆਪਣੀ ਪੁਲਾੜ ਟੈਕਨੋਲੋਜੀ ਅਤੇ ਲੌਂਚ ਸਮਰੱਥਾ ਹੈ।