11.7C Vancouver 11.7C VancouverSep 1, 2020 3:43 PM -
ਪਾਰਲੀਮੈਂਟ ਹਿੱਲ ਵਿਖੇ ਕੰਮ ਦੀਆਂ ਥਾਵਾਂ ਤੇ ਉਤਪੀੜਨ ਦੇ ਦੋਸ਼ਾਂ ਦੀ ਨਜ਼ਰਸਾਨੀ ਕਰਦੀ ਔਟਵਾ ਦੇ ਵਿੱਚ ਸਥਿਤ ਇੱਕ ਕਨਸਲਟਿੰਗ ਫਰਮ ਹੁਣ ਰੀਡੋ ਹਾਲ ਦੇ ਮਾਮਲੇ ਦੀ ਪੜਚੋਲ ਕਰੇਗੀ।
ਪ੍ਰੀਵੀ ਕਾਊਂਸਲ ਮੁਤਾਬਕ ਕੁਇੰਟੇਂਟ ਕੰਸਲਟਿੰਗ ਕਾਰਪੋਰੇਸ਼ਨ ਗਵਰਨਰ ਜਨਰਲ ਜੂਲੀ ਪੇਅਟ ‘ਤੇ ਕੰਮ ਦਾ ਮਾਹੌਲ ਖ਼ਰਾਬ ਕਰਨ ਦੇ ਲੱਗੇ ਇਲਜ਼ਾਮਾਂ ਦੀ ਜਾਂਚ ਕਰੇਗੀ।
ਇੱਕ ਆਨਲਾਈਨ ਨੋਟਿਸ ਮੁਤਾਬਕ ਕੁਇੰਟੇਂਟ ਗਵਰਨਰ ਜਨਰਲ ਦੇ ਦਫ਼ਤਰ ਦੇ ਮੌਜੂਦਾ ਅਤੇ ਸਾਬਕਾ ਮੁਲਾਜ਼ਮਾਂ ਨਾਲ ਉਨ੍ਹਾਂ ਦੇ ਤਜਰਬੇ ਜਾਨਣ ਲਈ ਗੱਲਬਾਤ ਕਰੇਗੀ।
ਕੰਮ ਦੇ ਮਾਹੌਲ ਨੂੰ ਖ਼ਰਾਬ ਕਰਨ ਦੇ ਕਾਰਨਾਂ ਦੀ ਤਹਿ ਤੱਕ ਜਾਣ ਲਈ ਪੇਅਟ ਦੀ ਵੀ ਕੰਸਲਟੈਂਟਾਂ ਨਾਲ ਬੈਠਕ ਹੋਵੇਗੀ।
ਨੋਟਿਸ ਮੁਤਾਬਕ ਪੇਅਟ ਲਈ ਕੰਮ ਕਰਦੇ ਜਾਂ ਪਹਿਲਾਂ ਕੰਮ ਕਰਦੇ ਰਹੇ ਮੁਲਾਜ਼ਮ ਆਪਣੀ ਮਰਜ਼ੀ ਨਾਲ ਇਸ ਵਿੱਚ ਹਿੱਸਾ ਲੈ ਸਕਣਗੇ ਅਤੇ ਕਈਆਂ ਨੂੰ ਆਪਣੀ ਪਹਿਚਾਣ ਦਾ ਖੁਲਾਸਾ ਕਰਨਾ ਪੈ ਸਕਦਾ ਹੈ।
ਸੀ.ਬੀ.ਸੀ. ਦੀ ਰਿਪੋਰਟ ਮੁਤਾਬਕ ਪੇਅਟ ‘ਤੇ ਆਪਣੇ ਮੁਲਾਜ਼ਮਾਂ ਨਾਲ ਬਦਸਲੂਕੀ ਕਰਨ ਅਤੇ ਉੱਚੀ ਆਵਾਜ਼ ਵਿੱਚ ਗੱਲ ਕਰਨ ਦੇ ਇਲਜ਼ਾਮ ਲਾਏ ਗਏ ਹਨ ਜਿਸ ਕਾਰਨ ਕਈ ਮੁਲਾਜ਼ਮ ਆਪਣੀਆਂ ਨੌਕਰੀਆਂ ਛੱਡਣ ਲਈ ਮਜਬੂਰ ਹੋ ਗਏ ਸਨ।
ਇਨ੍ਹਾਂ ਇਲਜ਼ਾਮਾਂ ਦੇ ਚੱਲਦਿਆਂ ਪ੍ਰੀਵੀ ਕਾਊਂਸਲ ਆਫਿਸ ਵੱਲੋਂ ਇੱਕ ਰੀਵਿਊ ਕਰਵਾਉਣ ਦਾ ਐਲਾਨ ਕੀਤਾ ਗਿਆ ਜਿਸ ਦਾ ਪੇਅਟ ਨੇ ਸਮਰਥਨ ਕਰਦਿਆਂ ਕਿਹਾ ਕਿ ਉਹ ਇਨ੍ਹਾਂ ਦੋਸ਼ਾਂ ਨੂੰ ਲੈ ਕੇ ਚਿੰਤਤ ਹਨ।
ਕੁਇੰਟੇਂਟ ਕੰਸਲਟਿੰਗ ਵੱਲੋਂ ਇਹ ਰਿਪੋਰਟ ਇੰਟਰਗਵਰਨਮੈਂਟਲ ਅਫੇਅਰਜ਼ ਮਨਿਸਟਰ ਡੋਮਿਨਿਕ ਬਲੌਂਕ ਦੇ ਸਾਹਮਣੇ ਪਤਝੜ ਦੇ ਅੰਤ ਤੱਕ ਪੇਸ਼ ਕਰਨ ਦੀ ਉਮੀਦ ਹੈ।
