ਇਮੀਗ੍ਰੇਸ਼ਨ ਧੋਖਾਧੜੀ ਦੀ ਜਾਂਚ ਵਿੱਚ ਇੱਕ ਵਿਅਕਤੀ 'ਤੇ ਲੱਗੇ ਦੋਸ਼

ਔਟਵਾ ਪੁਲਿਸ ਨੇ 35 ਸਾਲਾ ਵਿਨੈ ਪਾਲ ਸਿੰਘ ਬਰਾੜ ਨਾਮ ਦੇ ਇੱਕ ਵਿਅਕਤੀ ਨੂੰ ਇਮੀਗ੍ਰੇਸ਼ਨ ਧੋਖਾਧੜੀ ਦੇ ਕਈ ਦੋਸ਼ਾਂ ਨਾਲ ਚਾਰਜ ਕੀਤਾ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਇਸ ਮਾਮਲੇ ਨਾਲ ਸੰਬੰਧਤ ਪੀੜਤ ਕੈਨੇਡਾ ਭਰ ਵਿਚ ਹੋ ਸਕਦੇ ਹਨ, ਜਿਨ੍ਹਾਂ ਵਿਚ ਸਰੀ, ਵੈਨਕੂਵਰ, ਕੈਲਗਰੀ ਅਤੇ ਗ੍ਰੇਟਰ ਟੋਰਾਂਟੋ ਏਰੀਆ ਵੀ ਸ਼ਾਮਲ ਹਨ। ਕਥਿਤ ਤੌਰ 'ਤੇ ਬਰਾੜ ਨੇ ਇਮੀਗ੍ਰੇਸ਼ਨ ਸਲਾਹਕਾਰ ਬਣ ਕੇ ਕਈ ਲੋਕਾਂ ਨਾਲ ਧੋਖਾ ਕੀਤਾ।

ਔਟਵਾ ਪੁਲਿਸ ਦਾ ਕਹਿਣਾ ਹੈ ਕਿ ਉਸ ਨੇ ਸਲਾਹਕਾਰ ਵਜੋਂ ਕਈ ਨਾਂ ਵਰਤੇ, ਜਿਵੇਂ ਕਿ ਗਗਨਦੀਪ ਸਿੰਘ, ਵਾਰਿਸਦੀਪ ਸਿੰਘ, ਵਾਰਿਸ ਸਿੰਘ, ਵਾਰਿਸ ਦੀਪ ਸਹਿਮੀ ਅਤੇ ਹਰਸ਼ ਹਰਸ਼। ਪੁਲਿਸ ਅਨੁਸਾਰ, ਜਾਂਚ ਸਤੰਬਰ 2024 ਵਿਚ ਸ਼ੁਰੂ ਹੋਈ ਜਦੋਂ ਕਈ ਲੋਕਾਂ ਨੇ ਉਨ੍ਹਾਂ ਨਾਲ ਇਮੀਗ੍ਰੇਸ਼ਨ ਧੋਖਾਧੜੀ ਹੋਣ ਦੀ ਰਿਪੋਰਟ ਕੀਤੀ। ਇਹ ਘਟਨਾਵਾਂ ਜਨਵਰੀ ਤੋਂ ਜੁਲਾਈ 2024 ਵਿਚਕਾਰ ਹੋਈਆਂ।

ਜਾਂਚ ਦੌਰਾਨ ਦੋਸ਼ੀ ਦੀ ਪਛਾਣ ਵਿਨੈ ਪਾਲ ਸਿੰਘ ਬਰਾੜ ਔਟਵਾ ਨਿਵਾਸੀ ਵਜੋਂ ਹੋਈ। ਇਨਵੈਸਟੀਗੇਟਰਸ ਨੇ ਉਸ 'ਤੇ $5,000 ਤੋਂ ਵੱਧ ਦੇ ਧੋਖਾਧੜੀ ਅਤੇ ਚੋਰੀਸ਼ੁਦਾ ਸੰਪਤੀ ਰੱਖਣ ਦੇ ਦੋ-ਦੋ ਦੋਸ਼ ਅਤੇ ਹਮਲਾ ਤੇ ਗਲਾ ਘੁੱਟਣ ਅਤੇ ਧਮਕੀਆਂ ਦੇਣ ਦੇ ਵੀ ਦੋਸ਼ ਲਗਾਏ ਹਨ।

ਪੁਲਿਸ ਦਾ ਕਹਿਣਾ ਹੈ ਕਿ ਜੋ ਵੀ ਵਿਅਕਤੀ ਇਸ ਆਦਮੀ ਨਾਲ ਸੰਪਰਕ ਵਿਚ ਆਇਆ ਹੋਵੇ ਜਾਂ ਖੁਦ ਨੂੰ ਪੀੜਤ ਸਮਝਦਾ ਹੈ ਉਹ ਔਟਵਾ ਪੁਲਿਸ ਨਾਲ 613-236-1222 'ਤੇ ਜਾਂ ਕ੍ਰਾਈਮ Stoppers ਨਾਲ ਸੰਪਰਕ ਕਰ ਸਕਦਾ ਹੈ।