ਔਟਵਾ ਨੇ ਵਿਵਾਦਿਤ ਔਨਲਾਈਨ ਨਿਊਜ਼ ਐਕਟ ਨੂੰ ਲੈ ਕੇ ਗੂਗਲ ਨਾਲ ਕੀਤਾ ਸਮਝੌਤਾ

ਕੈਨੇਡਾ ਸਰਕਾਰ ਦੇ ਵਿਵਾਦਤ ਔਨਲਾਈਨ ਨਿਊਜ਼ ਐਕਟ ਦੇ ਨਿਯਮ ਲਾਗੂ ਹੋਣ ਤੋਂ 3 ਹਫ਼ਤੇ ਪਹਿਲਾਂ ਗੂਗਲ ਨਾਲ ਇੱਕ ਸਮਝੌਤੇ 'ਤੇ ਸਹਿਮਤੀ ਬਣ ਗਈ ਹੈ। ਸੂਤਰਾਂ ਮੁਤਾਬਕ ਗੂਗਲ ਆਪਣੇ ਪਲੇਟਫਾਰਮ 'ਤੇ ਕੈਨੇਡੀਅਨ ਖ਼ਬਰਾਂ ਸਾਂਝੀਆਂ ਕਰਨ ਦੇ ਬਦਲੇ ਨਿਊਜ਼ ਕੰਪਨੀਆਂ ਨੂੰ ਸਾਲਾਨਾ $100 ਮਿਲੀਅਨ ਦੀ ਰੇਂਜ ਵਿੱਚ ਭੁਗਤਾਨ ਕਰੇਗਾ।

ਫੈਡਰਲ ਸਰਕਾਰ ਅਤੇ ਗੂਗਲ ਵਿਚਕਾਰ ਇਸੇ ਹਫਤੇ ਸਹਿਮਤੀ ਬਣੀ ਹੈ। ਸਰਕਾਰ ਨੇ ਪਹਿਲਾਂ ਕਿਹਾ ਸੀ ਕਿ ਗੂਗਲ ਨੂੰ ਕੈਨੇਡੀਅਨ ਖ਼ਬਰਾਂ ਦੇ ਬਦਲੇ ਲਗਭਗ $172 ਮਿਲੀਅਨ ਦੀ ਪੇਮੈਂਟ ਕਰਨੀ ਹੋਵੇਗੀ।

ਹਾਲ ਹੀ ਵਿੱਚ ਔਨਲਾਈਨ ਨਿਊਜ਼ ਐਕਟ ਦੇ ਨਿਯਮਾਂ ਵਿੱਚ ਦਿੱਤੀ ਗਈ ਢਿੱਲ ਤਹਿਤ ਗੂਗਲ ਵਰਗੇ ਟੈੱਕ ਦਿੱਗਜ ਕੈਨੇਡੀਅਨ ਮੀਡੀਆ ਦੀ ਨੁਮਾਇੰਦਗੀ ਕਰਨ ਵਾਲੇ ਸਿੰਗਲ ਗਰੁੱਪ ਨਾਲ ਖ਼ਬਰਾਂ ਲਈ ਪੇਮੈਂਟ ਕਰਨ ਸਬੰਧੀ ਸਮਝੌਤਾ ਕਰ ਸਕਦੇ ਹਨ। ਗੌਰਤਲਬ ਹੈ ਕਿ ਗੂਗਲ ਨੇ ਮੇਟਾ ਦੀ ਤਰ੍ਹਾਂ ਇਸ ਕਾਨੂੰਨ ਦੇ ਜਵਾਬ ਵਿੱਚ ਆਪਣੇ ਪਲੇਟਫਾਰਮ 'ਤੇ ਕੈਨੇਡੀਅਨ ਨਿਊਜ਼ ਨੂੰ ਬਲੌਕ ਕਰਨ ਦੀ ਧਮਕੀ ਦਿੱਤੀ ਸੀ ਪਰ ਸਰਕਾਰ ਨਾਲ ਆਪਣੀ ਗੱਲਬਾਤ ਖਤਮ ਨਹੀਂ ਕੀਤੀ, ਜਦੋਂ ਕਿ ਮੇਟਾ ਨੇ ਫੇਸਬੁੱਕ ਅਤੇ ਇੰਸਟਾਗ੍ਰਾਮ 'ਤੇ ਕੈਨੇਡੀਅਨ ਖਬਰਾਂ ਨੂੰ ਬੰਦ ਕਰ ਦਿੱਤਾ।

ਗੂਗਲ ਦੇ ਕਦਮ ਨੂੰ ਦੇਖਦੇ ਹੋਏ ਸਰਕਾਰ ਨੇ ਆਪਣੇ ਪੈਰ ਪਿੱਛੇ ਖਿੱਚੇ ਹਨ ਪਰ ਸਰਕਾਰੀ ਸੂਤਰਾਂ ਦਾ ਕਹਿਣਾ ਹੈ ਕਿ ਤਾਜ਼ਾ ਸਮਝੌਤਾ ਕੈਨੇਡੀਅਨ ਮੀਡੀਆ ਲਈ ਇੱਕ ਜਿੱਤ ਅਤੇ ਸ਼ੁੱਧ ਲਾਭ ਹੈ।