14.51C Vancouver 14.51C VancouverMar 10, 2026 2:06 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਸਰਕਾਰ ਨੇ ਟਿਕਟੋਕ ਦੇ ਦੇਸ਼ ਵਿਚ ਕਾਰੋਬਾਰ 'ਤੇ ਲਗਾਈ ਪਾਬੰਦੀ ਨੂੰ ਅਧਿਕਾਰਤ ਤੌਰ 'ਤੇ ਵਾਪਸ ਲੈ ਲਿਆ ਹੈ। ਇਸ ਫੈਸਲੇ ਨਾਲ ਸੋਸ਼ਲ ਮੀਡੀਆ ਕੰਪਨੀ ਦੇ ਟੋਰਾਂਟੋ ਅਤੇ ਵੈਨਕੂਵਰ ਵਾਲੇ ਦਫਤਰ ਬੰਦ ਹੋਣ ਦੀ ਲਟਕ ਰਹੀ ਤਲਵਾਰ ਹਟ ਗਈ ਹੈ, ਜਿਸ ਨਾਲ ਸੈਂਕੜੇ ਨੌਕਰੀਆਂ ਨੂੰ ਵੀ ਰਾਹਤ ਮਿਲੀ ਹੈ।
ਉਦਯੋਗ ਮੰਤਰੀ ਮੇਲਾਨੀ ਜੋਲੀ ਅਨੁਸਾਰ, ਇਹ ਫੈਸਲਾ ਕੁਝ ਸਖ਼ਤ ਸ਼ਰਤਾਂ 'ਤੇ ਆਧਾਰਿਤ ਹੈ। ਟਿਕਟੋਕ ਨੂੰ ਕੈਨੇਡੀਅਨ ਯੂਜ਼ਰਸ ਦੇ ਡੇਟਾ ਦੀ ਸੁਰੱਖਿਆ ਲਈ ਨਵੇਂ ਸਕਿਓਰਿਟੀ ਗੇਟਵੇ ਅਤੇ ਪ੍ਰਾਈਵੇਸੀ ਵਧਾਉਣ ਵਾਲੀ ਤਕਨਾਲੋਜੀ ਨੂੰ ਸਥਾਪਤ ਕਰਨਾ ਹੋਵੇਗਾ। ਕੰਪਨੀ ਨੇ ਨਾਬਾਲਗਾਂ ਦੀ ਸੁਰੱਖਿਆ ਲਈ ਵਾਧੂ ਕਦਮ ਚੁੱਕਣ ਦਾ ਭਰੋਸਾ ਵੀ ਦਿੱਤਾ ਹੈ।
ਇਸ ਤੋਂ ਇਲਾਵਾ ਇੱਕ ਸੁਤੰਤਰ ਤੀਜੀ-ਧਿਰ ਮਾਨੀਟਰ ਨਿਯੁਕਤ ਕੀਤਾ ਜਾਵੇਗਾ ਜੋ ਇਹ ਦੇਖੇਗਾ ਕਿ ਕੰਪਨੀ ਇਨ੍ਹਾਂ ਨਿਯਮਾਂ ਦੀ ਪਾਲਣਾ ਕਰ ਰਹੀ ਹੈ ਜਾਂ ਨਹੀਂ। ਨਵੰਬਰ 2024 ਵਿਚ ਟਰੂਡੋ ਸਰਕਾਰ ਨੇ ਰਾਸ਼ਟਰੀ ਸੁਰੱਖਿਆ ਦਾ ਹਵਾਲਾ ਦਿੰਦੇ ਹੋਏ ਟਿਕਟੋਕ ਨੂੰ ਆਪਣਾ ਕਾਰੋਬਾਰ ਸਮੇਟਣ ਦਾ ਹੁਕਮ ਦਿੱਤਾ ਸੀ।
ਹਾਲਾਂਕਿ,ਜਨਵਰੀ ਵਿਚ ਫੈਡਰਲ ਕੋਰਟ ਨੇ ਇਸ ਹੁਕਮ ਨੂੰ ਰੱਦ ਕਰ ਦਿੱਤਾ ਸੀ, ਜਿਸ ਤੋਂ ਬਾਅਦ ਨਵਾਂ ਫੈਸਲਾ ਆਇਆ ਹੈ। ਇਹ ਮਾਮਲਾ ਸਿਰਫ਼ ਕੰਪਨੀ ਦੇ ਵਪਾਰਕ ਦਫਤਰਾਂ ਨਾਲ ਸਬੰਧਤ ਸੀ, ਆਮ ਲੋਕਾਂ ਲਈ ਟਿਕਟੋਕ ਦੀ ਵਰਤੋਂ 'ਤੇ ਪਹਿਲਾਂ ਵੀ ਕੋਈ ਪਾਬੰਦੀ ਨਹੀਂ ਸੀ। ਕੈਨੇਡਾ ਵਿਚ ਟਿਕਟੋਕ ਦੇ 16 ਮਿਲੀਅਨ ਉਪਭੋਗਤਾ ਹਨ।
