ਕੈਨੇਡਾ ਕਾਰਬਨ ਛੋਟ ਨੂੰ ਲੈ ਕੇ ਸਰਕਾਰ ਦੀ ਬੈਂਕਾਂ ਨਾਲ ਖੜਕੀ

ਕੈਨੇਡਾ ਕਾਰਬਨ ਛੋਟ ਨੂੰ ਲੈ ਕੇ ਸਰਕਾਰ ਦੀ ਬੈਂਕਾਂ ਨਾਲ ਖੜਕ ਗਈ ਹੈ। ਵਾਤਾਵਰਣ ਮੰਤਰੀ ਸਟੀਵਨ ਗਿਲਬੌਲਟ ਦਾ ਕਹਿਣਾ ਹੈ ਕਿ ਕੈਨੇਡੀਅਨਾਂ ਦੇ ਅਕਾਊਂਟ ਵਿਚ ਸਿੱਧੇ ਜਮ੍ਹਾ ਹੋਣ ਵਾਲੀ ਕਾਰਬਨ ਛੋਟ ਨੂੰ ਬੈਂਕ ਉਸੇ ਨਾਂ ਨਾਲ ਨਹੀਂ ਜਮ੍ਹਾ ਕਰ ਰਹੇ ਜੋ ਸਰਕਾਰ ਨੂੰ ਕਾਨੂੰਨ ਬਦਲਣ ਲਈ ਮਜਬੂਰ ਕਰ ਰਹੇ ਹਨ।

ਵਾਤਾਵਰਣ ਮੰਤਰੀ ਦੀ ਇਹ ਟਿੱਪਣੀ ਉਸ ਸਮੇਂ ਆਈ ਹੈ ਜਦੋਂ ਸਰਕਾਰ ਨੇ ਮੰਗਲਵਾਰ ਪੇਸ਼ ਕੀਤੇ ਬਜਟ ਵਿਚ ਵਿੱਤੀ ਪ੍ਰਸ਼ਾਸਨ ਐਕਟ ਵਿਚ ਸੋਧ ਦਾ ਪ੍ਰਸਤਾਵ ਦਿੱਤਾ ਹੈ ਤਾਂ ਜੋ ਸਰਕਾਰੀ ਸਕੀਮ ਤਹਿਤ ਜਮ੍ਹਾ ਹੋਣ ਵਾਲੇ ਪੈਸੇ ਲਈ ਨਾਮ ਬੈਂਕ ਓਹੀ ਰੱਖਣ ਜੋ ਸਰਕਾਰ ਚਾਹੁੰਦੀ ਹੈ। ਗਿਲਬੌਲਟ ਨੇ ਕਿਹਾ ਕਿ ਉਨ੍ਹਾਂ ਦਾ ਡਿਪਾਰਟਮੈਂਟ ਪਿਛਲੇ ਲਗਭਗ ਦੋ ਸਾਲਾਂ ਤੋਂ ਇਸ ਲਈ ਸੰਘਰਸ਼ ਕਰ ਰਿਹਾ ਹੈ ਕਿ ਕਾਰਬਨ ਛੋਟ ਦੀ ਰਾਸ਼ੀ ਇਸੇ ਨਾਮ ਨਾਲ ਕੈਨੇਡੀਅਨਾਂ ਦੇ ਅਕਾਊਂਟ ਵਿਚ ਜਮ੍ਹਾ ਕੀਤੀ ਜਾਵੇ ਤਾਂ ਕਿ ਲੋਕਾਂ ਵਿਚ ਉਲਝਣ ਨਾ ਹੋਵੇ।

ਉਨ੍ਹਾਂ ਕਿਹਾ ਕਿ 2022 ਵਿਚ ਬੈਂਕਾਂ ਨੇ ਪਹਿਲੀ ਰਿਬੇਟ ਡਿਪਾਜ਼ਿਟ ਨੂੰ ਬੜਾ ਹੀ ਆਮ ਲੇਬਲ ਦਿੱਤਾ, ਜਿਵੇਂ ਕਿ ਫੈਡਰਲ ਭੁਗਤਾਨ ਅਤੇ ਈ.ਐੱਫ.ਟੀ. ਕੈਨੇਡਾ ਜਿਸ ਦਾ ਮਤਲਬ ਹੈ ਕਿ ਪ੍ਰਾਪਤਕਰਤਾਵਾਂ ਨੂੰ ਇਹ ਨਹੀਂ ਪਤਾ ਸੀ ਕਿ ਉਹ ਪੈਸੇ ਕਿਉਂ ਪ੍ਰਾਪਤ ਕਰ ਰਹੇ ਸਨ।

ਮਿਨਿਸਟਰ ਨੇ ਕਿਹਾ ਕਿ ਟੀ.ਡੀ. ਅਤੇ ਬੀ.ਐੱਮ.ਓ. ਨੇ ਸਹੀ ਨਾਮ ਨੂੰ ਦਰਸਾਉਣ ਲਈ ਆਪਣੀਆਂ ਪ੍ਰਕਿਰਿਆਵਾਂ ਵਿਚ ਸੋਧ ਕੀਤਾ, ਜਦੋਂ ਕਿ ਆਰ.ਬੀ.ਸੀ. ਅਤੇ ਸਕੋਸ਼ੀਆਬੈਂਕ ਨੇ ਕਿਹਾ ਕਿ ਉਹ ਨਵੇਂ ਨਾਮ ਨੂੰ ਅਪਡੇਟ ਕਰ ਰਹੇ ਹਨ। ਉਥੇ ਹੀ, ਸੀ.ਆਈ.ਬੀ.ਸੀ ਅਜੇ ਵੀ ਇਸ ਨੂੰ ਡਿਪਾਜ਼ਿਟ ਕੈਨੇਡਾ ਨਾਮ ਨਾਲ ਚਲਾ ਰਿਹਾ ਹੈ। ਗਿਲਬੌਲਟ ਨੇ ਕਿਹਾ ਕਿ ਇਸ ਉਲਝਣ ਨੂੰ ਦੂਰ ਕਰਨ ਲਈ ਕੰਮ ਕੀਤਾ ਜਾਵੇਗਾ।