ਵਾਸ਼ਿੰਗਟਨ ਨਾਲ ਸਾਡੀ ਵਪਾਰ ਵਾਰਤਾ ਆਉਣ ਵਾਲੇ ਹਫ਼ਤਿਆਂ ਵਿਚ ਵੀ ਜਾਰੀ ਰਹੇਗੀ: ਡੋਮਿਨਿਕ ਲੇਬਲੈਂਕ

ਕੈਨੇਡਾ-ਅਮਰੀਕਾ ਵਿਚਕਾਰ ਵਪਾਰ ਲਈ ਜਿੰਮੇਵਾਰ ਮੰਤਰੀ ਡੋਮਿਨਿਕ ਲੇਬਲੈਂਕ ਦਾ ਕਹਿਣਾ ਹੈ ਕਿ ਵਾਸ਼ਿੰਗਟਨ ਨਾਲ ਸਾਡੀ ਵਪਾਰ ਵਾਰਤਾ ਆਉਣ ਵਾਲੇ ਹਫ਼ਤਿਆਂ ਵਿਚ ਵੀ ਜਾਰੀ ਰਹੇਗੀ, ਉਨ੍ਹਾਂ ਦੀ ਇਹ ਟਿੱਪਣੀ ਉਦੋਂ ਆਈ ਹੈ ਜਦੋਂ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਕੈਨੇਡਾ 'ਤੇ ਟੈਰਿਫ 25 ਫੀਸਦੀ ਤੋਂ ਵਧਾ ਕੇ 35 ਫੀਸਦੀ ਕਰ ਦਿੱਤਾ ਹੈ। ਲੇਬਲੈਂਕ ਇਸ ਦੌਰਾਨ ਵਾਸ਼ਿੰਗਟਨ ਵਿਚ ਹੀ ਸਨ, ਉਨ੍ਹਾਂ ਕਿਹਾ ਕਿ ਜਲਦੀ ਵਿਚ ਕਿਸੇ ਵਿਕਾਸ ਦੀ ਉਮੀਦ ਨਹੀਂ ਹੈ।

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦੇ ਮੰਤਰੀ ਨੇ ਕਿਹਾ ਕਿ ਉਹ ਅਗਲੇ ਹਫ਼ਤੇ ਅਮਰੀਕਾ ਦੇ Commerce Secretary ਹਾਵਰਡ ਲੂਟਨਿਕ ਨਾਲ ਗੱਲ ਕਰਨਗੇ ਅਤੇ ਅਗਸਤ ਦੇ ਅਖੀਰ ਵਿਚ ਦੋਵੇਂ ਆਹਮੋ-ਸਾਹਮਣੇ ਇਸ ਮਸਲੇ 'ਤੇ ਵਿਚਾਰ-ਵਟਾਂਦਰਾ ਲਈ ਮਿਲਣਗੇ। ਲੇਬਲੈਂਕ ਨੇ ਕਿਹਾ ਕਿ ਅਮਰੀਕਾ ਵਿਚ ਕੈਨੇਡਾ ਦੀ ਰਾਜਦੂਤ ਕ੍ਰਿਸਟਿਨ ਹਿਲਮੈਨ ਵਾਸ਼ਿੰਗਟਨ ਵਿਚ ਵਪਾਰ ਵਾਰਤਾ ਜਾਰੀ ਰੱਖੇਗੀ।

ਗੌਰਤਲਬ ਹੈ ਕਿ ਲੇਬਲੈਂਕ ਟਰੰਪ ਵਲੋਂ ਨਿਰਧਾਰਤ ਸਮੇਂ ਦੇ ਅੰਤਿਮ ਪਲ ਵਿਚ ਗੱਲਬਾਤ ਲਈ ਮੰਗਲਵਾਰ ਨੂੰ ਵਾਸ਼ਿੰਗਟਨ ਗਏ ਸਨ ਪਰ ਟਰੰਪ ਨੇ ਫੈਂਟਾਨਿਲ ਦਾ ਹਵਾਲਾ ਦਿੰਦੇ ਹੋਏ ਕੈਨੇਡਾ 'ਤੇ ਟੈਰਿਫ ਵਧਾ ਦਿੱਤਾ।