12.75C Vancouver 12.75C VancouverMay 15, 2020 8:35 PM -
ਬੀ.ਸੀ. ਸਰਕਾਰ ਨੇ ਪਹਿਲੀ ਜੂਨ (1st June) ਤੋਂ ਵਿਦਿਆਰਥੀਆਂ ਦੀ ਸਕੂਲਾਂ ਵਿੱਚ ਪਾਰਟ-ਟਾਈਮ (part-time) ਵਾਪਸੀ ਦਾ ਐਲਾਨ ਕੀਤਾ ਹੈ।
ਵਿਕਟੋਰੀਆ ਵਿੱਚ ਇਸ ਸੰਬੰਧੀ ਐਲਾਨ ਕਰਦਿਆਂ ਬੀ.ਸੀ. ਦੇ ਪ੍ਰੀਮੀਅਰ ਜੌਨ ਹੌਰਗਨ ਨੇ ਕਿਹਾ ਕਿ ਪਹਿਲੀ ਜੂਨ ਤੋਂ ਬੱਚਿਆਂ ਨੂੰ ਸਕੂਲ ਭੇਜਣਾ ਮਾਪਿਆਂ ਦੀ ਚੋਣ ਹੋਵੇਗੀ, ਪਰ ਇਸ ਸੰਬੰਧੀ ਉਨ੍ਹਾਂ 'ਤੇ ਕੋਈ ਦਬਾਅ ਨਹੀਂ ਹੋਵੇਗਾ।
ਸਕੂਲਾਂ ਵਿੱਚ ਵਿਦਿਆਰਥੀਆਂ ਦੀ ਪੂਰੀ ਤਰ੍ਹਾਂ ਵਾਪਸੀ ਸਿਤੰਬਰ ਵਿੱਚ ਹੋਵੇਗੀ।
ਇਸ ਯੋਜਨਾ ਦੇ ਵੇਰਵੇ ਦਿੰਦੇ ਹੋਏ ਸਿੱਖਿਆ ਮੰਤਰੀ ਰੌਬ ਫਲੈਮਿੰਗ (Rob Fleming) ਨੇ ਦੱਸਿਆ ਕਿ K-6 ਵਿਦਿਆਰਥੀ ਸਿਰਫ ਅੱਧੇ ਸਮੇਂ ਲਈ, ਜਿਵੇਂ ਕਿ ਹਰ ਦੂਜੇ ਦਿਨ ਸਕੂਲ ਜਾਣਗੇ ਅਤੇ ਉਨ੍ਹਾਂ ਦੀ ਬ੍ਰੇਕਸ (breaks) ਦਾ ਪ੍ਰਬੰਧ ਵੀ ਵੱਖ-ਵੱਖ ਸਮੇਂ ਤੇ ਹੋਵੇਗਾ।
ਇਸੇ ਤਰ੍ਹਾਂ ਗਰੇਡ 6 ਤੋਂ 12 ਦੇ ਵਿਦਿਆਰਥੀ ਹਫ਼ਤੇ ਵਿੱਚ ਸਿਰਫ਼ ਇੱਕ ਦਿਨ ਸਕੂਲ ਜਾ ਸਕਣਗੇ।
ਦਿਨਾਂ ਅਤੇ ਸਮੇਂ ਸੰਬੰਧੀ ਵੇਰਵਿਆਂ ਦੇ ਲਈ ਸਕੂਲ 22 ਮਈ ਤੱਕ ਪਰਿਵਾਰਾਂ ਦੇ ਨਾਲ ਸੰਪਰਕ ਕਰਨਗੇ।
ਉਹ ਪਰਿਵਾਰ ਜੋ ਬੱਚਿਆਂ ਨੂੰ ਸਕੂਲ ਨਾ ਭੇਜਣ ਦਾ ਫ਼ੈਸਲਾ ਕਰਨਗੇ, ਘਰੋਂ ਹੀ ਐਜੂਕੇਸ਼ਨ ਜਾਰੀ ਰੱਖ ਸਕਣਗੇ।
ਇਸ ਮੌਕੇ ਪ੍ਰੋਵਿੰਸ਼ੀਅਲ ਸਿਹਤ ਅਫਸਰ ਡਾ. ਬੌਨੀ ਹੈਨਰੀ ਨੇ ਦੱਸਿਆ ਕਿ ਜੇਕਰ ਅਜਿਹੀ ਸਥਿਤੀ ਬਣਦੀ ਹੈ ਕਿ ਕੋਈ ਵਿਦਿਆਰਥੀ ਸਕੂਲ ਸਿਸਟਮ ਵਿੱਚ ਬਿਮਾਰ ਹੋ ਜਾਂਦਾ ਹੈ, ਤਾਂ ਇਸ ਦੇ ਨਾਲ ਨਜਿੱਠਣ ਲਈ ਇੱਕ ਪੂਰੀ ਯੋਜਨਾ ਤਿਆਰ ਹੈ।
ਇਸ ਮੌਕੇ ਮਿਨਿਸਟਰ ਆਫ ਸਟੇਟ ਫਾਰ ਚਾਈਲਡ ਕੇਅਰ, ਕੈਟਰੀਨਾ ਚੈਨ ਨੇ ਕਿਹਾ ਕਿ ਚਾਈਲਡ ਕੇਅਰ ਸੈਂਟਰਜ਼ ਨੂੰ ਸੁਰੱਖਿਅਤ ਤੌਰ ਤੇ ਕੰਮ ਕਰਨ ਲਈ ਸਰਕਾਰ ਵੱਲੋਂ ਮਦਦ ਪ੍ਰਦਾਨ ਕੀਤੀ ਜਾਵੇਗੀ, ਪਰ ਸੈਂਟਰਜ਼ ਵਿੱਚ ਬੱਚਿਆਂ ਨੂੰ ਭੇਜਣ ਦਾ ਫ਼ੈਸਲਾ ਸੈਂਟਰ ਅਤੇ ਪਰਿਵਾਰ ਖ਼ੁਦ ਕਰਨਗੇ।
