ਕੈਨੇਡਾ ਚਾਈਲਡ ਬੈਨੀਫਿਟ ਪ੍ਰੋਗਰਾਮ ਦੇ ਚੈੱਕ ਲਈ ਮਾਪਿਆਂ ਨੂੰ ਕਰਨਾ ਪਵੇਗਾ ਇੰਤਜ਼ਾਰ

ਕੈਨੇਡਾ ਚਾਈਲਡ ਬੈਨੀਫਿਟ ਪ੍ਰੋਗਰਾਮ ਦੇ ਚੈੱਕ ਲਈ ਮਾਪਿਆਂ ਨੂੰ ਕੈਨੇਡਾ ਪੋਸਟ ਦੀ ਚੱਲ ਰਹੀ ਹੜਤਾਲ ਕਾਰਨ ਥੋੜ੍ਹਾ ਇੰਤਜ਼ਾਰ ਕਰਨਾ ਪਵੇਗਾ। ਕੈਨੇਡਾ ਰੈਵੇਨਿਊ ਏਜੰਸੀ ਮੁਤਾਬਕ, ਉਹ ਸ਼ੁੱਕਰਵਾਰ ਤੋਂ ਪੇਮੈਂਟ ਜਾਰੀ ਕਰ ਰਹੀ ਹੈ ਪਰ ਜੋ ਲੋਕ ਚੈੱਕ ਦੀ ਉਮੀਦ ਕਰ ਰਹੇ ਹਨ ਉਨ੍ਹਾਂ ਨੂੰ ਇੱਕ ਹਫ਼ਤੇ ਦੀ ਦੇਰੀ ਹੋਵੇਗੀ।

ਡਿਪਾਰਟਮੈਂਟ ਨੇ ਬਿਆਨ ਵਿਚ ਕਿਹਾ ਕਿ ਕੈਨੇਡਾ ਪੋਸਟ ਇਹ ਚੈੱਕ 20 ਦਸੰਬਰ ਨੂੰ ਡਿਲਿਵਰ ਕਰੇਗਾ। ਹਾਲਾਂਕਿ, ਜਿਨ੍ਹਾਂ ਦੇ ਬੈਂਕ ਅਕਾਊਂਟ ਇਸ ਪੇਮੈਂਟ ਲਈ ਰਜਿਸਟਰਡ ਹਨ, ਉਨ੍ਹਾਂ ਨੂੰ ਭਲਕੇ ਨਿਰਧਾਰਤ ਸਮੇਂ ’ਤੇ ਹੀ ਪੇਮੈਂਟ ਮਿਲ ਜਾਵੇਗੀ। ਕੈਨੇਡਾ ਪੋਸਟ ਨੇ ਦੱਸਿਆ ਕਿ ਸਮਝੌਤੇ ਤਹਿਤ ਯੂਨੀਅਨ ਨੇ ਸਮਾਜਿਕ ਪ੍ਰੋਗਰਾਮ ਨਾਲ ਸਬੰਧਤ ਚੈੱਕ ਡਿਲਿਵਰ ਕਰਨ ਦੀ ਵਚਨਬੱਧਤਾ ਜਤਾਈ ਹੈ।

ਗੌਰਤਲਬ ਹੈ ਕਿ ਦਸੰਬਰ ਵਿਚ ਮਾਂ-ਪਿਓ ਨੂੰ ਕੈਨੇਡਾ ਚਾਈਲਡ ਬੈਨੀਫਿਟ ਸਕੀਮ ਤਹਿਤ ਉਨ੍ਹਾਂ ਦੇ ਛੇ ਸਾਲ ਤੋਂ ਘੱਟ ਉਮਰ ਦੇ ਬੱਚੇ ਲਈ ਵੱਧ-ਵੱਧ $648 ਦੀ ਪੇਮੈਂਟ ਮਿਲੇਗੀ। 6 ਤੋਂ 17 ਸਾਲ ਦੀ ਉਮਰ ਦੇ ਬੱਚੇ ਲਈ ਵੱਧ-ਵੱਧ ਰਕਮ $547 ਹੈ।

ਉਥੇ ਹੀ, ਜਿਨ੍ਹਾਂ ਪਰਿਵਾਰਾਂ ਦੀ ਸਾਲ ਦੀ ਕੁੱਲ ਪੇਮੈਂਟ $240 ਤੋਂ ਘੱਟ ਹੈ, ਉਨ੍ਹਾਂ ਨੂੰ ਜੁਲਾਈ ਵਿਚ ਹੀ ਇਕਮੁਸ਼ਤ ਰਾਸ਼ੀ ਮਿਲੇਗੀ, ਇਸ ਲਈ ਦਸੰਬਰ ਵਿਚ ਉਨ੍ਹਾਂ ਨੂੰ ਕੁਝ ਨਹੀਂ ਮਿਲੇਗਾ।