14.58C Vancouver 14.58C VancouverAug 1, 2024 6:53 PM - Connect Newsroom
ਭਾਰਤ ਨੂੰ ਪੈਰਿਸ ਓਲਿੰਪਕ ਵਿਚ ਹੁਣ ਤੱਕ ਤਿੰਨ ਮੈਡਲ ਪ੍ਰਾਪਤ ਹੋਏ ਹਨ। ਪੁਰਸ਼ਾਂ ਦੀ 50 ਮੀਟਰ ਰਾਈਫਲ ਥਰੀ ਪੋਜ਼ੀਸ਼ਨ ਵਿਚ ਲੇਟਸਟ ਮੈਡਲ ਸਵਪਨਿਲ ਕੁਸਾਲੇ ਨੇ ਜਿੱਤਿਆ। ਇਹ ਉਨਾਂ ਦਾ ਪਹਿਲਾ ਓਲਿੰਪਕ ਮੈਚ ਸੀ, ਜਿਸ ਵਿਚ ਉਨ੍ਹਾਂ ਨੇ ਕਾਂਸੀ ਦਾ ਤਗਮਾ ਹਾਸਲ ਕੀਤਾ।
ਖਾਸ ਗੱਲ ਇਹ ਹੈ ਕਿ ਭਾਰਤ ਨੇ ਓਲੰਪਿਕ ਵਿਚ ਹੁਣ ਤੱਕ ਤਿੰਨੋਂ ਮੈਡਲ ਨਿਸ਼ਾਨੇਬਾਜ਼ੀ ਵਿਚ ਜਿੱਤੇ ਹਨ। ਉਥੇ ਹੀ, ਹਰਮਨਪ੍ਰੀਤ ਸਿੰਘ ਦੀ ਅਗਵਾਈ ਵਾਲੀ ਭਾਰਤੀ ਹੌਕੀ ਟੀਮ ਨੇ ਵੀਰਵਾਰ ਨੂੰ ਪੂਲ ਬੀ ਦੇ ਗਰੁੱਪ ਮੈਚ ਵਿਚ ਬੈਲਜੀਅਮ ਤੋਂ 2-1 ਨਾਲ ਪਹਿਲੀ ਹਾਰ ਦਾ ਸਾਹਮਣਾ ਕੀਤਾ।
ਭਾਰਤੀ ਫਾਰਵਰਡ ਅਭਿਸ਼ੇਕ ਨੇ ਪਹਿਲੇ ਹਾਫ ਦੇ 18ਵੇਂ ਮਿੰਟ ਵਿਚ ਗੋਲ ਕਰਕੇ ਭਾਰਤ ਨੂੰ ਬੜ੍ਹਤ ਦਿਵਾਈ, ਜਦੋਂ ਕਿ ਬੈਲਜੀਅਮ ਨੇ ਦੂਜੇ ਹਾਫ ਵਿਚ ਹਮਲਾਵਰ ਤਰੀਕੇ ਨਾਲ ਵਾਪਸੀ ਕੀਤੀ ਅਤੇ 33ਵੇਂ ਮਿੰਟ ਵਿਚ ਗੋਲ ਕਰਕੇ ਸਕੋਰ ਬਰਾਬਰ ਕਰ ਦਿੱਤਾ ਤੇ 44ਵੇਂ ਮਿੰਟ ਵਿਚ ਇੱਕ ਹੋਰ ਗੋਲ ਨਾਲ ਜਿੱਤ ਦਰਜ ਕਰ ਲਈ।
ਭਾਰਤੀ ਕਪਤਾਨ ਹਰਮਨਪ੍ਰੀਤ ਸਿੰਘ ਅੱਜ ਦੇ ਮੈਚ ਵਿਚ ਕੋਈ ਗੋਲ ਨਹੀਂ ਕਰ ਸਕੇ, ਜਦੋਂ ਕਿ ਆਇਰਲੈਂਡ ਖ਼ਿਲਾਫ਼ ਪਿਛਲੇ ਮੈਚ ਵਿਚ ਉਸ ਨੇ 2 ਗੋਲ ਕੀਤੇ ਸਨ ਅਤੇ ਭਾਰਤ 2-0 ਨਾਲ ਜਿੱਤਿਆ ਸੀ। ਭਾਰਤ ਦਾ ਅਗਲਾ ਮੈਚ ਹੁਣ ਆਸਟ੍ਰੇਲੀਆ ਨਾਲ ਹੋਵੇਗਾ, ਹਾਲਾਂਕਿ ਭਾਰਤੀ ਹੌਕੀ ਟੀਮ ਕੁਆਰਟਰਫਾਈਨਲ ਲਈ ਕੁਆਲੀਫਾਈ ਕਰ ਚੁੱਕੀ ਹੈ।
