ਕੈਨੇਡੀਅਨ ਪਾਰਲੀਮੈਂਟ ਵਿਚ ਫਲਸਤੀਨ ਨੂੰ ਮੁਲਕ ਦਾ ਦਰਜਾ ਦੇਣ ਦੀ ਸਪੋਰਟ ਕਰਨ ਵਾਲੇ ਪ੍ਰਸਤਾਵ ’ਤੇ ਹੋਵੇਗੀ ਵੋਟਿੰਗ

ਕੈਨੇਡੀਅਨ ਪਾਰਲੀਮੈਂਟ ਵਿਚ ਸੋਮਵਾਰ ਨੂੰ ਫਲਸਤੀਨ ਨੂੰ ਮੁਲਕ ਦਾ ਦਰਜਾ ਦੇਣ ਦੀ ਸਪੋਰਟ ਕਰਨ ਵਾਲੇ ਪ੍ਰਸਤਾਵ ’ਤੇ ਵੋਟਿੰਗ ਹੋਵੇਗੀ, ਜਿਸ ਦੀ ਇਜ਼ਰਾਈਲ ਨੇ ਕਰੜੀ ਨਿੰਦਾ ਕੀਤੀ ਹੈ।

ਹਾਲਾਂਕਿ, ਸਰਕਾਰ ਵੋਟਿੰਗ ਦੇ ਨਤੀਜੇ ਮੰਨਣ ਲਈ ਪਾਬੰਦ ਨਹੀਂ ਹੋਵੇਗੀ ਪਰ ਇਹ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਲਈ ਸਿਆਸੀ ਮੁਸ਼ਕਲ ਪੈਦਾ ਕਰਨ ਵਾਲਾ ਹੈ ਕਿਉਂਕਿ ਲਿਬਰਲ ਵਿਚ ਇਸ ਮੋਸ਼ਨ ਨੂੰ ਲੈ ਕੇ ਮਤਭੇਦ ਹਨ। ਮਾਂਟਰੀਆਲ ਤੋਂ ਪਾਰਟੀ ਦੇ ਐੱਮ.ਪੀ. ਐਂਥਨੀ ਹਾਊਸਫਾਦਰ ਇਸ ਦੇ ਵਿਰੋਧ ਵਿਚ ਵੋਟਿੰਗ ਕਰਨਗੇ।

ਇਸ ਮੋਸ਼ਨ ਨੂੰ ਐੱਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਨੇ ਪਾਰਟੀ ਦੀ ਵਿਦੇਸ਼ ਮਾਮਲਿਆਂ ਦੀ ਆਲੋਚਕ ਹੀਥਰ ਮੈਕਫਰਸਨ ਨਾਲ ਮਿਲ ਕੇ ਪੇਸ਼ ਕੀਤਾ ਹੈ। ਟਰੂਡੋ ਦੀ ਲਿਬਰਲ ਸਰਕਾਰ ਐੱਨ.ਡੀ.ਪੀ. ਦੇ ਸਮਰਥਨ ਨਾਲ ਚੱਲ ਰਹੀ ਹੈ ਪਰ ਪਾਰਟੀ ਦਾ ਕਹਿਣਾ ਹੈ ਕਿ ਸਰਕਾਰ ਵਲੋਂ ਗਾਜ਼ਾ ਵਿਚ ਆਮ ਲੋਕਾਂ ਦੀ ਸੁਰੱਖਿਆ ਲਈ ਚੁੱਕੇ ਗਏ ਕਦਮ ਨਾ-ਕਾਫ਼ੀ ਹਨ।

ਜਗਮੀਤ ਸਿੰਘ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਜਸਟਿਨ ਟਰੂਡੋ ਗਾਜ਼ਾ ਵਿਚ ਸ਼ਾਂਤੀ ਅਤੇ ਨਿਆਂ ਲਈ ਦਲੇਰਾਨਾ ਕਦਮ ਚੁੱਕ ਸਕਦੇ ਹਨ ਪਰ ਉਨ੍ਹਾਂ ਵਿਚ ਹਿੰਮਤ ਨਹੀਂ, ਇਸ ਲਈ ਐੱਨ.ਡੀ.ਪੀ. ਨੇ ਲਿਬਰਲ ਸਰਕਾਰ ਨੂੰ ਇਸ ਖੂਨ-ਖਰਾਬੇ ਨੂੰ ਖਤਮ ਕਰਨ ਵਿਚ ਕਦਮ ਚੁੱਕਣ ਲਈ ਇੱਕ ਮਤਾ ਲਿਆਂਦਾ ਹੈ, ਜੋ ਸਰਕਾਰ ਨੂੰ ਮਜ਼ਬੂਰ ਕਰੇਗਾ। ਜਗਮੀਤ ਸਿੰਘ ਨੇ ਕਿਹਾ ਕਿ ਫਲਸਤੀਨੀ ਅਤੇ ਇਜ਼ਰਾਈਲੀ ਦੋਵੇਂ ਸ਼ਾਂਤੀ ਨਾਲ ਰਹਿਣ ਦੇ ਹੱਕਦਾਰ ਹਨ।