ਕੈਨੇਡਾ ਦਾ ਪ੍ਰਧਾਨ ਮੰਤਰੀ ਬਣਨ ਦੀ ਦੌੜ 'ਚ ਸ਼ਾਮਲ ਪਾਰਟੀ ਲੀਡਰਾਂ ਦੀ ਦੂਜੀ ਡਿਬੇਟ ਹੋਵੇਗੀ ਅੱਜ

ਕੈਨੇਡਾ ਦੀਆਂ 4 ਪ੍ਰਮੁੱਖ ਰਾਜਨੀਤਿਕ ਪਾਰਟੀਆਂ ਦੇ ਲੀਡਰ ਬੁੱਧਵਾਰ ਰਾਤ ਫ੍ਰੈਂਚ ਭਾਸ਼ਾ ਵਿਚ ਡਿਬੇਟ ਤੋਂ ਬਾਅਦ ਅੱਜ ਦੂਜੀ ਡਿਬੇਟ ਲਈ ਆਹਮੋ-ਸਾਹਮਣੇ ਹੋਣਗੇ।

ਇੰਗਲਿਸ਼ ਵਿਚ ਹੋਣ ਵਾਲੀ ਇਹ ਡਿਬੇਟ ਮਾਂਟ੍ਰੀਅਲ ਵਿਚ ਸ਼ਾਮ 7 ਵਜੇ ਸ਼ੁਰੂ ਹੋਵੇਗੀ, ਜਿਸ ਵਿਚ ਲਿਬਰਲ ਲੀਡਰ ਮਾਰਕ ਕਾਰਨੀ, ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ, ਐੱਨ. ਡੀ. ਪੀ. ਲੀਡਰ ਜਗਮੀਤ ਸਿੰਘ ਅਤੇ ਬਲਾਕ ਕਿਬੀਕੁਆ ਦੇ ਪ੍ਰਧਾਨ ਈਵ-ਫ੍ਰਾਂਸੋਆ ਬਲੈਂਚੇਟ 28 ਅਪ੍ਰੈਲ ਨੂੰ ਵੋਟਾਂ ਤੋਂ ਪਹਿਲਾਂ ਆਖਰੀ ਵਾਰ ਸਟੇਜ 'ਤੇ ਮਿਲਣਗੇ। ਬੀਤੀ ਰਾਤ ਫ੍ਰੈਂਚ ਡਿਬੇਟ ਵਿਚ ਇਹ ਲੀਡਰਸ ਪਾਈਪਲਾਈਨਾਂ, ਅਰਥਵਿਵਸਥਾ, ਟਰੰਪ ਦੀ ਵਪਾਰ ਯੁੱਧ ਅਤੇ ਰਿਹਾਇਸ਼ ਸਮੇਤ ਹੋਰ ਮੁੱਦਿਆਂ 'ਤੇ ਇੱਕ-ਦੂਜੇ ਨਾਲ ਭਿੜੇ ਸਨ।

ਕਾਰਨੀ ਇਸ ਦੋ ਘੰਟੇ ਦੀ ਡਿਬੇਟ ਵਿਚ ਮੁੱਖ ਨਿਸ਼ਾਨਾ ਸਨ, ਜੋ ਚੋਣ ਸਰਵਿਆਂ ਵਿਚ ਅੱਗੇ ਚੱਲ ਰਹੇ ਹਨ। ਪੌਲੀਐਵ ਨੇ ਉਨ੍ਹਾਂ 'ਤੇ ਲਗਾਤਾਰ ਟਰੂਡੋ ਦੀ ਤਰ੍ਹਾਂ ਹੋਣ ਦਾ ਅਰੋਪ ਲਗਾਇਆ। ਉਥੇ ਹੀ, ਜਗਮੀਤ ਸਿੰਘ ਨੇ ਕਾਰਨੀ ਅਤੇ ਪੌਲੀਐਵ ਦੋਵਾਂ ਨੂੰ ਨਿਸ਼ਾਨੇ 'ਤੇ ਲਿਆ, ਜਦੋਂ ਗੱਲਬਾਤ ਪਾਈਪਲਾਈਨ ਪ੍ਰੋਜੈਕਟ ਵੱਲ ਮੁੜੀ ਤਾਂ ਪੌਲੀਐਵ ਅਤੇ ਬਲੈਂਚੇਟ ਵਿਚਕਾਰ ਤਿੱਖੀ ਬਹਿਸ ਹੋਈ। ਬਲੈਂਚੇਟ ਨੇ ਪਾਈਪਲਾਈਨ ਦਾ ਖੁੱਲ੍ਹ ਕੇ ਵਿਰੋਧ ਕੀਤਾ। ਹਾਲਾਂਕਿ, ਸਾਰੇ ਨੇਤਾ ਇਸ ਗੱਲ 'ਤੇ ਸਹਿਮਤ ਹੋਏ ਕਿ ਟਰੰਪ ਨੂੰ ਕੰਟਰੋਲ ਨਹੀਂ ਕੀਤਾ ਜਾ ਸਕਦਾ ਪਰ ਕਾਰਨੀ ਨੇ ਕਿਹਾ ਕਿ ਉਨ੍ਹਾਂ ਕੋਲ ਰਾਸ਼ਟਰਪਤੀ ਨਾਲ ਕੰਮ ਕਰਨ ਲਈ ਲੋੜੀਂਦਾ ਤਜਰਬਾ ਹੈ।