19.99C Vancouver 19.99C VancouverJan 22, 2021 4:39 PM -
ਅੰਤਰ-ਸਰਕਾਰੀ ਮਾਮਲਿਆਂ ਦੇ ਮੰਤਰੀ ਡੌਮਿਨਿਕ ਲਬਲਾਉਂਕ ਮੁਤਾਬਕ ਜੂਲੀ ਪਾਯੈਟ ਦੇ ਗਵਰਨਰ ਜਨਰਲ ਦੇ ਔਹਦੇ ਤੋਂ ਅਸਤੀਫ਼ੇ ਨੇ ਇਹ ਗੱਲ ਸਾਬਤ ਕਰ ਦਿੱਤੀ ਹੈ ਕਿ ‘ਵਾਈਸ-ਰੀਗਲ’ ਨਿਯੁਕਤੀਆਂ ਦੀ ਜਾਂਚ ਲਈ ਪ੍ਰਕਿਰਿਆ ਨੂੰ ਮਜ਼ਬੂਤ ਕਰਨ ਦੀ ਜ਼ਰੂਰਤ ਹੈ।
ਰੀਡੋ ਹਾਲ ਵਿਖੇ ਕੰਮ ਦੇ ਖ਼ਰਾਬ ਮਾਹੌਲ ਦੇ ਸੰਬੰਧ ਵਿੱਚ ਲਾਏ ਦੋਸ਼ਾਂ ਦੀ ਸੁਤੰਤਰ ਜਾਂਚ ਦੇ ਮਾੜੇ ਨਤੀਜਿਆਂ ਤੋਂ ਬਾਅਦ ਪਾਯੈਟ ਨੇ ਵੀਰਵਾਰ ਨੂੰ ਆਪਣਾ ਅਸਤੀਫਾ ਦੇ ਦਿੱਤਾ।
ਲਬਲਾਉਂਕ ਮੁਤਾਬਕ ‘ਪ੍ਰੀਵੀ ਕਾਉਂਸਿਲ ਆਫਿਸ’ ਦੀ ਰਿਪੋਰਟ ਦੇ ਨਤੀਜੇ ਇਹ ਸਾਫ ਦਰਸ਼ਾਉਂਦੇ ਹਨ ਕਿ ਅਜਿਹੇ ਅਹੁਦਿਆਂ ਦੀ ਨਿਯੁਕਤੀ ਦੀ ਪ੍ਰਕਿਰਿਆ ਵਿੱਚ ਸੁਧਾਰ ਕਰਨ ਦੀ ਲੋੜ ਹੈ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਪਿਛਲੀ ਕੰਜ਼ਰਵੇਟਿਵ ਸਰਕਾਰ ਦੁਆਰਾ ‘ਵਾਈਸ-ਰੀਗਲ’ ਨਿਯੁਕਤੀਆਂ ਲਈ ਯੋਗ ਵਿਅਕਤੀਆਂ ਦੇ ਨਾਂ ਨਾਮਜ਼ਦ ਕਰਨ ਲਈ ਬਣਾਈ ਗਈ ਗੈਰ-ਪੱਖਪਾਤੀ ਕਮੇਟੀ ਨੂੰ ਭੰਗ ਕਰਨ ਤੋਂ ਬਾਅਦ 2017 ਵਿਚ ਸਾਬਕਾ ਪੁਲਾੜ ਯਾਤਰੀ ਨੂੰ ਕੈਨੇਡਾ ਦਾ 29 ਵਾਂ ਗਵਰਨਰ ਜਨਰਲ ਚੁਣਿਆ ਸੀ।
ਰੀਡੋ ਹਾਲ ਵਿਚ ਕੰਮ ਦਾ ਮਾਹੌਲ ਖ਼ਰਾਬ ਕਰਨ ਅਤੇ ਸਟਾਫ ਨਾਲ ਬਦਸਲੂਕੀ ਦੀਆਂ ਰਿਪੋਰਟਾਂ ਤੋਂ ਪਹਿਲਾਂ ਵੀ ਮੌਂਟਰੀਆਲ ਸਾਇੰਸ ਸੈਂਟਰ ਅਤੇ ਕਨੇਡੀਅਨ ਓਲੰਪਿਕ ਕਮੇਟੀ ਵਿੱਚ ਨੌਕਰੀ ਦੌਰਾਨ ਪਾਯੈਟ ਵੱਲੋਂ ਸਟਾਫ ਨੂੰ ਤੰਗ ਅਤੇ ਪਰੇਸ਼ਾਨ ਕਰਨ ਦੀ ਜਾਣਕਾਰੀ ਸਾਹਮਣੇ ਆ ਚੁੱਕੀ ਹੈ।
