ਕੈਨੇਡੀਅਨ ਸਰਕਾਰ ਵਿਸ਼ਵ ਕੱਪ ਦੀ ਮੇਜ਼ਬਾਨੀ 'ਤੇ ਖਰਚ ਕਰੇਗੀ $1 ਬਿਲੀਅਨ

ਕੈਨੇਡੀਅਨ ਟੈਕਸਦਾਤਾ ਨੂੰ ਦੇਸ਼ ਵਿਚ ਹੋਣ ਵਾਲੇ ਫੀਫਾ ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਲਗਭਗ $1 ਬਿਲੀਅਨ ਵਿਚ ਪੈਣ ਜਾ ਰਹੀ ਹੈ। ਇਹ ਪ੍ਰਗਟਾਵਾ ਪਾਰਲੀਮੈਂਟਰੀ ਬਜਟ ਔਫੀਸਰ ਵੱਲੋਂ ਜਾਰੀ ਤਾਜ਼ਾ ਰਿਪੋਰਟ ਵਿਚ ਕੀਤਾ ਗਿਆ ਹੈ। ਰਿਪੋਰਟ ਮੁਤਾਬਕ, ਵੈਨਕੂਵਰ ਅਤੇ ਟੋਰਾਂਟੋ ਵਿਚ ਖੇਡੇ ਜਾਣ ਵਾਲੇ ਮੈਚਾਂ ਦੀ ਮੇਜ਼ਬਾਨੀ 'ਤੇ ਕੁੱਲ $1.066 ਬਿਲੀਅਨ ਦਾ ਖਰਚਾ ਆਉਣ ਦਾ ਅਨੁਮਾਨ ਹੈ, ਜਿਸ ਨਾਲ ਹਰੇਕ ਮੈਚ ਦਾ ਖਰਚ ਲਗਭਗ $82 ਮਿਲੀਅਨ ਬਣਦਾ ਹੈ।

ਇਸ ਕੁੱਲ ਬਜਟ ਵਿਚੋਂ ਫੈਡਰਲ ਸਰਕਾਰ $473 ਮਿਲੀਅਨ ਦਾ ਹਿੱਸਾ ਪਾ ਰਹੀ ਹੈ, ਜਦੋਂ ਕਿ ਬਾਕੀ ਖ਼ਰਚ ਦੂਜੇ ਪੱਧਰ ਦੀਆਂ ਸਰਕਾਰਾਂ ਵੱਲੋਂ ਉਠਾਇਆ ਜਾਵੇਗਾ, ਜਿਥੇ ਇਹ ਮੈਚ ਹੋਣੇ ਹਨ। ਜ਼ਿਕਰਯੋਗ ਹੈ ਕਿ 11 ਜੂਨ ਤੋਂ 19 ਜੁਲਾਈ ਤੱਕ ਕੈਨੇਡਾ, ਮੈਕਸੀਕੋ ਅਤੇ ਅਮਰੀਕਾ ਵਿਚ ਸਾਂਝੇ ਤੌਰ 'ਤੇ ਖੇਡੇ ਜਾਣ ਵਾਲੇ ਕੁੱਲ 104 ਮੈਚਾਂ ਵਿਚੋਂ ਕੈਨੇਡਾ 13 ਮੈਚਾਂ ਦੀ ਮੇਜ਼ਬਾਨੀ ਕਰ ਰਿਹਾ ਹੈ।

ਇਨ੍ਹਾਂ ਵਿਚੋਂ 7 ਮੈਚ ਵੈਨਕੂਵਰ ਅਤੇ 6 ਮੈਚ ਟੋਰੌਂਟੋ ਵਿਚ ਖੇਡੇ ਜਾਣਗੇ। ਫੈਡਰਲ ਸਪੋਰਟ ਦਾ ਵੱਡਾ ਹਿੱਸਾ ਇਨ੍ਹਾਂ ਮੈਚਾਂ ਲਈ ਇਨਫਰਾਸਟਕਚਰ ਅਤੇ ਸੁਰੱਖਿਆ ਕਾਰਵਾਈਆਂ ਲਈ ਦਿੱਤਾ ਜਾ ਰਿਹਾ ਹੈ।