ਟੋਇੰਗ ਸੰਬੰਧੀ ਅਪਰਾਧਿਕ ਨੈਟਵਰਕ ਖਿਲਾਫ ਪੀਲ ਪੁਲਿਸ ਦੀ ਅਹਿਮ ਕਾਮਯਾਬੀ

ਓਨਟਾਰੀਓ ਦੀ ਪੀਲ ਪੁਲਿਸ ਨੇ ਲੋਕਲ ਅਤੇ ਸੂਬੇ ਦੀਆਂ ਹੋਰ ਲਾਅ ਇਨਫੋਰਸਮੈਂਟ ਏਜੰਸੀਆਂ ਨਾਲ ਸਾਂਝੇ ਓਪਰੇਸ਼ਨ ਤਹਿਤ ਜਬਰੀ ਵਸੂਲੀ ਤੇ ਹੋਰ ਅਪਰਾਧਾਂ ਨਾਲ ਜੁੜੇ ਸੰਗਠਿਤ ਅਪਰਾਧਿਕ ਨੈਟਵਰਕ ਦਾ ਪਰਦਾਫਾਸ਼ ਕੀਤਾ ਹੈ। ਇਸ ਓਪਰੇਸ਼ਨ ਵਿਚ 18 ਲੋਕ ਗ੍ਰਿਫਤਾਰ ਕੀਤੇ ਗਏ ਹਨ, ਜਿਨ੍ਹਾਂ ਵਿਚ ਕਈ ਪੰਜਾਬੀ ਨੌਜਵਾਨ ਹਨ। ਇਨ੍ਹਾਂ 'ਤੇ ਲਗਭਗ 100 ਚਾਰਜਿਜ਼ ਲਗਾਏ ਗਏ ਹਨ, ਜਿਸ ਵਿਚ ਜ਼ਬਰਨ ਵਸੂਲੀ, ਅਪਰਾਧਿਕ ਸੰਗਠਨ ਨਾਲ ਲਿੰਕ ਤੇ ਟੋਅ ਟਰੱਕ ਨਾਲ ਜੁੜੇ ਅਪਰਾਧਾਂ ਦੇ ਦੋਸ਼ ਸ਼ਾਮਲ ਹਨ।

ਪੁਲਿਸ ਦਾ ਕਹਿਣਾ ਹੈ ਕਿ ਜੁਲਾਈ 2024 ਵਿਚ ਪ੍ਰੋਜੈਕਟ ਆਊਟਸੋਰਸ ਨੂੰ ਇੱਕ ਅਪਰਾਧਿਕ ਸੰਗਠਨ ਖਿਲਾਫ ਲਾਂਚ ਕੀਤਾ ਗਿਆ ਸੀ, ਜੋ ਜਬਰੀ ਵਸੂਲੀ ਤੇ ਇਸ ਨਾਲ ਸਬੰਧਤ ਹਿੰਸਕ ਘਟਨਾਵਾਂ ਦੇ ਪਿੱਛੇ ਸੀ।

ਪੁਲਿਸ ਨੇ ਕਿਹਾ ਕਿ 10 ਜੂਨ 2025 ਤੱਕ ਕਿੰਗ ਸਿਟੀ ਦੀ ਇੱਕ 37 ਸਾਲਾ ਮਹਿਲਾ ਅਤੇ ਬਰੈਂਪਟਨ ਤੋਂ 17 ਆਦਮੀਆਂ ਨੂੰ ਜਾਂਚ ਦੇ ਸੰਬੰਧ ਵਿਚ ਗ੍ਰਿਫਤਾਰ ਕੀਤਾ ਗਿਆ, ਇਨ੍ਹਾਂ ਵਿਚ ਇੰਦਰਜੀਤ ਧਾਮੀ, ਗੁਰਬਿੰਦਰ ਸਿੰਘ, ਪਰਿਤੋਸ਼ ਚੋਪੜਾ, ਕੁਲਵਿੰਦਰ ਪੁਰੀ, ਪਰਮਿੰਦਰ ਪੁਰੀ, ਇੰਦਰਜੀਤ ਬੱਲ, ਦੀਪਾਂਸ਼ੂ ਗਰਗ, ਅਭਿਨਵ ਭਾਰਦਵਾਜ ਅਤੇ ਕਰਨ ਬੋਪਾਰਾਏ, ਮਨਕੀਰਤ ਬੋਪਾਰਾ ਤੇ ਸਿਮਰ ਬੋਪਾਰਾਏ ਸਮੇਤ ਹੋਰ ਨਾਂ ਸ਼ਾਮਲ ਹਨ, ਇਨ੍ਹਾਂ ਦੀ ਉਮਰ 21 ਤੋਂ 38 ਸਾਲ ਹੈ।

ਜਾਂਚ ਦੌਰਾਨ ਪੁਲਿਸ ਨੇ 18 ਟੋਅ ਟਰੱਕ, 6 ਹਥਿਆਰ, 600 ਰਾਊਂਡ ਰੌਂਦ ਤੇ $45,000ਕੈਨੇਡੀਅਨ ਕਰੰਸੀ ਸਣੇ $4.2 ਮਿਲੀਅਨ ਦੇ ਸੰਪਤੀਆਂ ਜ਼ਬਤ ਕੀਤੀਆਂ ਹਨ।