21.82C Vancouver 21.82C VancouverJan 15, 2021 4:39 PM -
ਪ੍ਰੋਕਿਉਰਮੈਂਟ ਮਨਿਸਟਰ ਅਨੀਤਾ ਆਨੰਦ ਦਾ ਕਹਿਣਾ ਹੈ ਕਿ ਯੂਰੋਪ ਦੇ ਵਿੱਚ ਉਤਪਾਦਨ ਨਾਲ ਜੁੜੇ ਕੁਝ ਮਸਲਿਆਂ ਕਾਰਨ ਫਾਈਜ਼ਰ ਵੱਲੋਂ ਕੈਨੇਡਾ ਵੈਕਸੀਨ ਪਹੁੰਚਾਣ ਵਿੱਚ ਅਸਥਾਈ ਤੌਰ ’ਤੇ ਦੇਰੀ ਹੋਵੇਗੀ।
ਆਨੰਦ ਮੁਤਾਬਕ ਅਮਰੀਕੀ ਕੰਪਨੀ ਵੱਲੋਂ ਆਪਣੀਆਂ ਯੂਰੋਪੀਅਨ ਪ੍ਰੋਡਕਸ਼ਨ ਲਾਈਨਾਂ ਵਿਚ ਦਿੱਕਤਾਂ ਦੀ ਵਜ੍ਹਾ ਨਾਲ ਅਸਥਾਈ ਤੌਰ ਤੇ ਟੀਕਿਆਂ ਦੀ ਡਿਲਿਵਰੀ ਵਿਚ ਕਟੌਤੀ ਕੀਤੀ ਜਾ ਰਹੀ ਹੈ।
ਉਨ੍ਹਾਂ ਕਿਹਾ ਕਿ ਜਿੱਥੇ ਕੰਪਨੀ ਨੇ ਮਾਰਚ ਦੇ ਅਖੀਰ ਤੱਕ ਟੀਕਿਆਂ ਦੀਆਂ 4 ਮਿਲੀਅਨ ਖੁਰਾਕਾਂ ਕੈਨੇਡਾ ਭੇਜਣ ਦਾ ਵਾਅਦਾ ਕੀਤਾ ਸੀ, ਇਸ ਗੱਲ ਦੀ ਹੁਣ ਕੋਈ ਗਾਰੰਟੀ ਨਹੀਂ ਹੈ।
ਯਾਦ ਰਹੇ ਕਿ ਹੁਣ ਤੱਕ ਕੈਨੇਡਾ ਕੋਲ ਫਾਈਜ਼ਰ-ਬਾਇਓਐਨਟੈਕ ਦੇ ਟੀਕਿਆਂ ਦੀਆਂ 380,000 ਖੁਰਾਕਾਂ ਪਹੁੰਚ ਚੁੱਕੀਆਂ ਹਨ, ਇਸ ਮਹੀਨੇ 400,000 ਹੋਰ ਖੁਰਾਕਾਂ ਪਹੁੰਚਣ ਦਾ ਅਨੁਮਾਨ ਸੀ ਅਤੇ ਫਰਵਰੀ ਵਿੱਚ ਤਕਰੀਬਨ 2 ਮਿਲੀਅਨ ਖੁਰਾਕਾਂ ਪਹੁੰਚਣੀਆਂ ਸਨ।
ਕੈਨੇਡਾ ਵਿੱਚ ਕੋਵਿਡ-19 ਦੀ ਮਾਡਲਿੰਗ ਸਬੰਧੀ ਨਵੀਂ ਜਾਣਕਾਰੀ ਫੈਡਰਲ ਸਿਹਤ ਅਧਿਕਾਰੀਆਂ ਵੱਲੋਂ ਅੱਜ ਸਾਂਝੀ ਕੀਤੀ ਗਈ ਜਿਸ ਮੁਤਾਬਕ ਦੇਸ਼ ਭਰ ਵਿੱਚ ਵਾਇਰਸ ਦਾ ਫੈਲਾਅ ਤੇਜ਼ੀ ਨਾਲ ਜਾਰੀ ਹੈ।
ਚੀਫ ਪਬਲਿਕ ਹੈਲਥ ਅਫਸਰ ਡਾਕਟਰ ਟੈਰੇਸਾ ਟੈਮ ਮੁਤਾਬਕ 24 ਜਨਵਰੀ ਤੱਕ ਦੇਸ਼ ਭਰ ਵਿੱਚ ਵਾਇਰਸ ਕਾਰਣ ਮਰਨ ਵਾਲਿਆਂ ਦੀ ਗਿਣਤੀ 19,630 ਤੱਕ ਪਹੁੰਚ ਜਾਵੇਗੀ।
ਉਨ੍ਹਾਂ ਅਨੁਸਾਰ ਵਾਇਰਸ ਦੇ ਫੈਲਾਅ ਨੂੰ ਘਟਾਉਣ ਦੇ ਸਾਰੇ ਯਤਨ ਸਰਕਾਰਾਂ ਅਤੇ ਹਰ ਵਿਅਕਤੀ ਵੱਲੋਂ ਜਾਰੀ ਰੱਖਣ ਦੀ ਲੋੜ ਹੈ ਖ਼ਾਸਕਰ ਵਧੇਰੇ ਮਾਮਲਿਆਂ ਵਾਲੇ ਓਂਟੈਰੀਓ ਅਤੇ ਕਿਊਬੈਕ ਵਰਗੇ ਖੇਤਰਾਂ ਵਿਚ ਜਿੱਥੇ ਵਾਇਰਸ ਕਾਰਨ ਹਸਪਤਾਲਾਂ ਦੇ ਵਿੱਚ ਦਾਖ਼ਲ ਹੋ ਰਹੇ ਵਿਅਕਤੀਆਂ ਦੀ ਗਿਣਤੀ ਵਿੱਚ ਲਗਾਤਾਰ ਵਾਧਾ ਜਾਰੀ ਹੈ ਅਤੇ ਹੈਲਥ ਸਿਸਟਮ ‘ਤੇ ਬੇਹੱਦ ਦਬਾਅ ਮਹਿਸੂਸ ਕੀਤਾ ਜਾ ਰਿਹਾ ਹੈ।
