16.25C Vancouver 16.25C VancouverFeb 3, 2025 5:22 PM - Connect Newsroom
ਕੈਨੇਡਾ ਦੀ ਮੁੱਖ ਵਿਰੋਧੀ ਧਿਰ ਦੇ ਲੀਡਰ ਪੀਅਰ ਪੌਲੀਐਵ ਨੇ ਸੋਮਵਾਰ ਨੂੰ ਕਿਹਾ ਕਿ ਜੇ ਉਹ ਪ੍ਰਧਾਨ ਮੰਤਰੀ ਬਣੇ ਤਾਂ ਉਹ ਕੈਨੇਡਾ ਵਿਚ ਅੰਦਰੂਨੀ ਵਪਾਰ ਨੂੰ ਵਧਾਉਣ ਲਈ ਇੱਕ ਯੋਜਨਾ ਲਾਗੂ ਕਰਨਗੇ, ਜਿਸ ਨਾਲ ਕੈਨੇਡਾ ਦੀ ਜੀਡੀਪੀ ਵਿਚ $200 ਬਿਲੀਅਨ ਤੋਂ ਜ਼ਿਆਦਾ ਦਾ ਵਾਧਾ ਹੋਵੇਗਾ।
ਕੰਜ਼ਰਵੇਟਿਵ ਲੀਡਰ ਨੇ ਟਰੰਪ ਦੇ ਟੈਰਿਫ ਨੂੰ ਕੈਨੇਡਾ ਲਈ ‘ਵੇਕ ਅੱਪ ਕਾਲ’ ਕਰਾਰ ਦਿੰਦੇ ਕਿਹਾ ਕਿ ਹੁਣ ਸਮਾਂ ਆ ਗਿਆ ਹੈ ਕਿ ਸੂਬੇ ਦੇਸ਼ ਦੇ ਅੰਦਰ ਵਪਾਰ ਦੇ ਫਲੋਅ ਨੂੰ ਬਿਹਤਰ ਬਣਾਉਣ ਲਈ ਇਕੱਠੇ ਮਿਲ ਕੇ ਕੰਮ ਕਰਨ।
ਪੌਲੀਐਵ ਨੇ ਕਿਹਾ ਕਿ ਹਰ ਕੈਨੇਡੀਅਨ ਅੱਜ ਇਹ ਉਮੀਦ ਕਰਦਾ ਹੈ ਕਿ ਉਨ੍ਹਾਂ ਦੇ ਸਿਆਸੀ ਆਗੂ ਦੇਸ਼ ਨੂੰ ਸਵੈ-ਨਿਰਭਰ ਬਣਾਉਣ ਲਈ ਜੋ ਵੀ ਹੋਵੇ ਉਹ ਕਰਨਗੇ ਅਤੇ ਇਸ ਦੀ ਸ਼ੁਰੂਆਤ ਆਪਣੇ ਦੇਸ਼ ਵਿਚ ਵਪਾਰ ਨਾਲ ਹੀ ਹੋਵੇਗੀ।
ਹਾਲਾਂਕਿ, ਪੌਲੀਐਵ ਨੇ ਮੰਨਿਆ ਕਿ ਆਰਥਿਕ ਨੁਕਸਾਨ ਦੀ ਭਰਪਾਈ ਲਈ ਇਹ ਕਾਫ਼ੀ ਨਹੀਂ ਹੋਵੇਗਾ ਪਰ ਉਨ੍ਹਾਂ ਕਿਹਾ ਕਿ ਇਹ ਕਦਮ ਕੈਨੇਡਾ ਨੂੰ ਘੱਟੋ-ਘੱਟ ਬਾਹਰੀ ਮੁਲਕਾਂ ’ਤੇ ਘੱਟ ਨਿਰਭਰ ਬਣਾਵੇਗਾ।
ਆਈਐਮਐਫ ਦੀ 2019 ਦੀ ਰਿਪੋਰਟ ਅਨੁਸਾਰ, ਕੈਨੇਡਾ ਦੇ ਸੂਬਿਆਂ ਵਿਚਕਾਰ ਵਪਾਰ ਵਿਚ 4 ਮੁੱਖ ਰੁਕਾਵਟਾਂ ਹਨ, ਜਿਨ੍ਹਾਂ ਵਿਚ ਭੂਗੋਲਿਕ, ਇੱਕ ਸੂਬੇ ਤੋਂ ਦੂਜੇ ਸੂਬੇ ਵਿਚ ਮਾਲ ਵੇਚਣ ’ਤੇ ਰੋਕ, ਤੀਜਾ ਵਾਹਨ ਦੇ ਭਾਰ ਦੇ ਮਿਆਰ ਵਰਗੇ ਤਕਨੀਕੀ ਰੁਕਾਵਟਾਂ ਅਤੇ ਚੌਥਾ ਰੈਗੂਲੇਟਰੀ ਰੁਕਾਵਟ ਹੈ।
