15.04C Vancouver 15.04C VancouverJan 30, 2025 8:05 PM - Connect Newsroom
ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਵਿਦੇਸ਼ੀ ਦਖ਼ਲ ਬਾਰੇ ਰਿਪੋਰਟ ਪੜ੍ਹਨ ਲਈ ਕੈਨੇਡੀਅਨ ਸੁਰੱਖਿਆ ਖੁਫੀਆ ਜਾਣਕਾਰੀ ਤੋਂ ਲਾਜ਼ਮੀ ਤੌਰ ’ਤੇ ਸਕਿਓਰਿਟੀ ਕਲੀਅਰੈਂਸ ਲੈਣ ਨਾਲ ਸਬੰਧਤ ਸ਼ਰਤਾਂ ਨੂੰ ਰੱਦ ਕਰਦੇ ਹੋਏ ਇਸ ਲਈ ਅਪਲਾਈ ਕਰਨ ਤੋਂ ਇਨਕਾਰ ਕਰ ਦਿੱਤਾ ਹੈ।
ਉਨ੍ਹਾਂ ਕਿਹਾ ਕਿ ਸਕਿਓਰਿਟੀ ਕਲੀਅਰੈਂਸ ਦੀਆਂ ਸ਼ਰਤਾਂ ਦੇ ਚੱਲਦੇ ਉਹ ਇਸ ਮੁੱਦੇ ’ਤੇ ਬੋਲ ਨਹੀਂ ਸਕਣਗੇ ਅਤੇ ਉਨ੍ਹਾਂ ਦੀ ਲਿਬਰਲ ਸਰਕਾਰ ਨੂੰ ਜਵਾਬਦੇਹ ਠਹਿਰਾਉਣ ਦੀ ਸਮਰਥਾ ਵੀ ਸੀਮਤ ਹੋ ਜਾਵੇਗੀ।
ਪੌਲੀਐਵ ਨੇ ਕਿਹਾ ਕਿ ਜੇ ਸਪਾਈ ਏਜੰਸੀ ਨੂੰ ਲੱਗਦਾ ਹੈ ਕਿ ਵਿਦੇਸ਼ੀ ਦਖਲਅੰਦਾਜ਼ੀ ਉਨ੍ਹਾਂ ਦੇ ਕਿਸੇ ਪਾਰਟੀ ਮੈਂਬਰ ਲਈ ਰਿਸਕ ਹੈ ਤਾਂ ਏਜੰਸੀ ਉਨ੍ਹਾਂ ਦੇ ਕਿਸੇ ਵੀ ਐਮ.ਪੀ. ਤੇ ਸੈਨੇਟਰ ਨੂੰ ਸਿੱਧੇ ਤੌਰ ’ਤੇ ਇਸ ਦੀ ਜਾਣਕਾਰੀ ਦੇਣ ਲਈ ਸੁਤੰਤਰ ਹੈ।
ਗੌਰਤਲਬ ਹੈ ਕਿ ਕੈਨੇਡਾ ਦੀਆਂ ਪਿਛਲੀਆਂ ਚੋਣਾਂ ਵਿਚ ਵਿਦੇਸ਼ੀ ਦਖਲ ਦੀ ਜਾਂਚ ਕਰ ਰਹੇ ਕਮਿਸ਼ਨ ਦੀ ਪ੍ਰਮੁੱਖ ਮੈਰੀ-ਜੋਸੀ ਹੌਗ ਨੇ ਮੰਗਲਵਾਰ ਆਪਣੀ ਅੰਤਿਮ ਰਿਪੋਰਟ ਜਾਰੀ ਕੀਤੀ ਸੀ।
ਉਨ੍ਹਾਂ ਕਿਹਾ ਸੀ ਕਿ ਅਜਿਹਾ ਕੋਈ ਸਬੂਤ ਨਹੀਂ ਮਿਲਿਆ ਕਿ ਸੰਸਦ ਵਿਚ ਕੋਈ ਗੱਦਾਰ ਹੈ ਜੋ ਕੈਨੇਡਾ ਦੇ ਹਿੱਤਾਂ ਵਿਰੁੱਧ ਦੁਸ਼ਮਣ ਮੁਲਕਾਂ ਨਾਲ ਸਾਜ਼ਿਸ਼ ਵਿਚ ਸ਼ਾਮਲ ਹੈ। ਹਾਲਾਂਕਿ, ਹੌਗ ਨੇ ਵਿਦੇਸ਼ੀ ਦਖ਼ਲ ਦਾ ਮੁਕਾਬਲਾ ਕਰਨ ਲਈ ਆਪਣੀਆਂ ਸਿਫ਼ਾਰਸ਼ਾਂ ਦੀ ਸੂਚੀ ਵਿਚ ਪਾਰਟੀ ਲੀਡਰਸ ਨੂੰ ਟੌਪ ਸੀਕਰੇਟ ਬ੍ਰੀਫਿੰਗ ਲਈ ਜਿੰਨੀ ਜਲਦੀ ਹੋ ਸਕੇ ਸੁਰੱਖਿਆ ਪ੍ਰਵਾਨਗੀਆਂ ਲੈਣ ਦੀ ਅਪੀਲ ਕੀਤੀ ਸੀ।
